29‏/12‏/2011

حدوتة الضفدع

لا تيأس ستجد من يؤمن بك، ويتبعك

كان ياما كان في سالف العصر والآوان ، ضفدع صغير لونه أصفر ومنقط باللون الأحمر، مع ان كل الضفادع حواليه لونها اخضر، وكان ضفدوع الأحمر ياحرام كل ما يحب يلعب مع الضفادع جيرانه، يقعدوا يضحكوا عليه
واحد يقول : هههه شايفين لونه
واحد تاني يقول : ده أحمر لون الورد ده مش ضفدع زينا
وكلهم يضحكوا وميردوش يلعبوا معاه
كان يروح لشلة تانية من الضفادع قاعدين يلعبوا استغماية، أول ما يشوفوه يوقفوا لعب وهاتك يا ضحك، ويغنوا له : ياحمرا يا بلحة يا مقمعة شرفتي اخواتك الأربعة
يمشي ضفدوع الأحمر بعيد ويروح يقعد على شط البحيرة يعيط، يمسك طوبة ويحدفها بايده جوه الميه، البحيرة تعمل دواير دواير مكشرة، يزعل أكتر ويمشي يدور على بحيرة تانية.
يقول لنفسه وهو ماشي : حتى البحيرة اللي مش بتضحك عليا ، بتكشر لما تشوفني، أنا ماليش اصحاب خالص
*****
وفي البحيرة التانية يقابل ضفدوع الأحمر ضفادع خضرا تانية بتلعب "تيك على العالي وتيك على الواطي"، أول ما أقولهم ممكن العب معاكم، خافوا في الأول وجريوا، قالوا ايه الكائن الغريب ده، وبعدين واحد قال بصوت عالي : الحقوا ده ضفدع لون أحمر.
كلهم قعدوا يضحكوا لحد ما ضفدوع مشي وراح على شط البحيرة الجديدة، حدف طوبة تانية، الدواير عملت تكشيرة كبيييييرة، قام ضفدوع طلع يجري بعيد
*****
وصل ضفدوع عند بحيرة جديدة، وقف يبص عليها وهو بيحاول يمسح دموعه، عدت جنبه ضفدوعة جميلة بس لونها أحمر وعلى ضهرها نقط صفرا، مكنش مصدق نفسه، نداها بصوت عالي
- يا ضفدعة
وقفت وبصتله وابتسمت وقالتله
- أهلا وسهلاً أنا اسمي صفورة انت اسمك ايه
قالها
- أسمي أحمر، ممكن نلعب سوا
شدته من ايده بسرعة وقالتله تعالى الأول نعوم في البحيرة وبعدين نطلع نلعب نط الحبل
ونطوا جوه الميه اللي المرادي عملت دواير كتير كتير بس كانت بتبتسم
ضحك ضفدوع وقالها
- ميرسي يا بحيرة انك ضحكتيلي
قالتله البحيرة
- انا ضحكتلك علشان انت نطيت في حضني، اما البحيرتين التانين فزعلوا منك علشان حدفتهم بالطوب
ومن يوميها وضفدوع الاحمر مش بيرمي حد بالطوب وكبر وعايش على شط البحيرة اللي بقى كل ضفادعها لونهم بين الأحمر والأصفر
وتوتة توتة خلصت الحدوتة

28‏/12‏/2011

حدوتة الفار

مفيش حاكم إلا من خيال محكوم ... تميم البرغوثي

كان ياما كان في سالف العصر والاوان، أسد عجوز أسنانه مخلعة ونظره شيش بيش، قاعد في عرينه اللي هو بيته، وبيحكم منه الغابة كلها، ومفيش أي حد من سكان الغابة دي مبيخافش منه، ويموت من الرعب لما يسمع زئيره وهو بيزأر بصوت عالي كل يوم الصبح، لأن دي الحاجة الوحيدة اللي فاضلاله من أيام العز، ولأنه زمان كان قوي جدا، مفتري جدا، محدش بقى متخيل إنه ممكن يبقى ضعيف، ممكن حتى يعجز ولا يموت.

وكانت كل فصيلة حيوانات مسؤولة كل يوم انها تأكله، النمور تجيبله الاكل يوم لحد مدخل العرين، القرود تجيبه اليوم اللي بعديه والافيال اليوم اللي بعديه وهكذا تلاقي كل فصيلة أو نوع بيجيبله الاكل يوم في الشهر، وكلهم فرحانين انه مبيخرجش من بيته ويقولوا بينهم وبين بعض، أهو تعب يوم في الشهر ولا الأسد المفتري ده يخرج لنا.

لحد في يوم من الايام كان الفار زنفل بيتمشى في الغابة زهقان وقرفان من الزحمة اللي عندهم في الجحر، ويمكن كمان جعان لان مناخيره شمت ريحة غريبة، جاية من ناحية بيت الأسد ملك الغابة، خاف في الاول يروح هناك بس الجوع كان اقوى منه ومن خوفه قرب بالراحة وقلبه بيدق جامد، لقى حتة لحمة كبيرة مرمية قصاد الباب ومغروس فيها سنتين، استغرب قوي من منظر الاسنان قرب أكتر وبص عليهم وهو بيقول لنفسه

- ياترى ايه دول، معقولة تكون اسنان ملك الغابة

سمع صاحبنا الفار زنفل صوت الاسد من جوه وهو بيعيط بصوت واطي وبيقول

- خلاص دول كانوا اخر سنتين في بقي مش حعرف اكل تاني... آه ياني

صاحبنا زنفل فكر بسرعة، أكل كمان بسرعة , خد السنتين ومشي

وبقى كل يوم يروح ياكل من الاكل اللي محطوط قصاد بيت الملك، أول ما يسمع الزئير الصبح بدل ما يخاف يبتسم.

وكل يوم يعدي على بيت الملك يتأكد هو حي ولا مات خلاص، لحد يوم ما راح وعرف ان الملك مات، دخل بسرعة العرين ولبس سلسلة علق فيها السنتين بتوع الاسد، وخرج للغابة يصرخ بصوت عالي : أنا قتلت الأسد أنا قتلت الملك، أنا زنفل

الحيوانات ضحكت في الاول وقالوا الفار اتجنن خلاص، لكن تاني يوم النمور راحت تودي الاكل بتاع الملك شافوا زنفل معلق السلسلة وفيها اسنان الاسد

مبقوش مصدقين، اليوم اللي بعدها الغزلان جابت أكل الملك وشافوا زنفل برضو لابس السلسلة وساكن بيت الملك

ولحد النهاردة الحيوانات بتاعة الغابة كلها بتودي الاكل في ميعاده عند باب البيت ويستغربوا من منظر زنفل وهو لابس السلسلة وهو بياكل لحد ما يشبع وفرحان لكنهم عمرهم ما بطلوا يودوا الاكل

وتوتة توتة خلصت الحدوتة

25‏/12‏/2011

حدوتة الحمار

كان يا ما كان في سالف العصر والآوان، غابة زي كل الغابات، بياكل فيها القوي الضعيف، بس الغابة دي كان فيها قطيع كبير من الحمير، مساكين الاسود والفهود والنمور والضباع بتهاجمهم كل يوم، ياكلوا بدال الواحد عشرة، ويصيبوا عشرة تانيين، الحمير البيضا، تعبت م الخوف، قررت تجتمع، وتفكر في طريقة لحل مشكلة الخساير دي.
وعند العصر والشمس البرتقاني بتودع السما، علشان القمر زقها، اجتمع القطيع، وقف كبير الحمير وبص واتأكد إن الكل موجود وقال بصوت حاول يكون غاضب
- وبعدين يا حمير، حنفضل نموت في الغابة دي لحد امتى
رد الحمار الخواف وقال
- احنا نسيب الغابة دي ونهاجر، العمر مش بعزقة يا كبير
رد الجميع في صوت واحد
- أي غابة حنروحها حيحصلنا زي ما بيحصل هنا والوحوش حتاكلنا
رد الكبير
- ومش ممكن نسيب أرضنا أبداً، دي أرض جدودنا اللي ورثناها منهم
رد الحمار المكار وقال
- احنا نروح للقرد الحكيم نسأله على حل، احنا حمير وبرضو مخنا على قدنا
هاص الحيوانات بعضهم فرحان بالفكرة، وبعضهم مش عاجبه، شايف نفسه حمار بيفهم، بس الكبير رفع صوته ونهق وقال
- سمع هس، الكل يسكت ويخرص، أنا حشكل وفد ونروح نقابل القرد الحكيم
*****
وبعد مشاورات مع القرد، وهات وخد، وصلوا لاتفاق عظيم، بعد ما القرد نفسه اتقطع بين الوحوش والحمير، ان قطيع الحمير يقدم كل يوم حمار واحد بس للوحوش، وبكده تبقى الخساير قلت كتير قوي، الحمير علشان الوحوش متتلخبطش، قرروا يخططوا الحمار اللي اختاروه علشان يبقى متعلم والوحوش ميغلطوش ويهجموا على حد تاني.
وبعد ما عملوا القُرعة واختاروا الحمار وخططوه بالاسود وحطوه في المكان المتفق عليه، رجعوا بيوتهم فرحانين.
هرب الحمار وخاف من الموت وراح يعيش لوحده، الوحوش غضبوا لما ملقوش الفريسة لكن القرد هداهم
ويوم بعد يوم بقى الحمير يخططوا حمار ويسيبوه، الحمار المخطط يهرب وهما يتعاقبوا
ومع مرور الزمن بقت الحمير المخططة اللي رفضت تتاكل حرة وطليقة في الغابة، والحمير البيضا اللي ما اتاكلش منها اتركب
وتوتة توتة خلصت الحدوتة حلوة ولا ملتوتة

20‏/12‏/2011

حدوتة عامود نور

كما عمود النور كنت واقف، في عز البرد دافي منور الدنيا
لما النهار يطلع بابقى خايف، يجوني يطفوني وف ثانية
وأتاري الصبح كما الليل عتمة
مليان بالعسس ...بالكلاب زحمة
والعسكري يا با قلبه مليان سواد
لا حد قادر ينوره، ناشف كما الجماد
يقتل أخوه يدبحه ولايهمه
لو يطول يهتك عرض اللي جاب أمه
لاعنده نخوة وكرامه، وكل اللي كان همه
يسمع كلام القيادة، يحمي الفراعنة الجداد
******
تحت مني كان زمان، كان واد بيذاكر
منهم الي أصبح واللي كان، ولساه فاكر
ومنهم اللي باع واللي خان، واللي صار فاجر
ييجي في قلب الميدان ويقتل الثائر
محتاج عقاب ربنا، كما ثمود أو عاد

*******
طفوني ما عاد نوري له لازمة
عيون الشباب انطفت والنظرة لسه حازمة
ما حد خاف قلبه م العسكري الجزمة
على الصباح والنهار القلوب عازمة
مش محتاجين نوري، نورهم يغطي البلد

*******
خلوني مقلاع جايز أو حتى منجنيق
خلوني احارب معاكم خلوني أبقى صديق
مين يطيق اللي شايفه، ده لو حجر ما يطيق
أحارب العسكر كأني ..يا اخويا نورت الطريق
عمود نور صحيح أنا لكن .. حي على الجهاد

07‏/12‏/2011

أســود


إهداء إلى سيادة اللواء محمد إبراهيم المرشح لوزارة داخلية حكومة الإنقاذ

الكل ينظر لي بدهشه ممزوجه بفرحة غامضة، اتلفت حولى لأرى هذا العالم الجديد
يلفت إنتباهي العديد من الوجوه السوداء التي تزينها أسنانا بيضاء و من فوقها سماء زرقاء ... ولكن عفوا ما هذا انها أرضيه عشبيه تلك التي تجلس عليها المرأة التي تحملني ..لابد انها امى.... نعم هى امى ، و لكن ما هذا الهزال الذى يسكنها و من هذا الذى يأخذنى منها.... لا أعرف لكنهم يباركون له مولدي، لابد انه أبى ، ذلك الرجل الذى تدعوه أمى جورج
، والذي يسير حاملاً إياي الان فى شارع نظيف متسع... ارى وجوها بيضاء وأخرى سمراء تنظر لى و له بدهشه و غضب ....يا ترى ما هو لونى انا؟
هل هو ابيض كتلك المرأه التى تركب سيارتها لا اعتقد فهى ترمينا بنظره كالشرار
هل هو اسمر مثل هذا البائع العجوز
اعتقد اننى اسود مثلهم مثل والدي ووالدتي.
ها انا ذا اعود لحضن امى التى تبدى لهفه شديدة و تضمنى بشده
و لكنها تسأل أبى عن هذا الحصار الذى يضربه الجنود حولنا و على ماذا ينتهى و لكن لا ادرى ما معنى الحصار و لا معنى الجنود
أمى تحاول ارضاعى فيمنعها شلال من الماء الغزير الذى يسقط علينا ، يحتضننا أبى بفزع و يحاول جذبنا بعيدا
لكن عفوا من هؤلاء الذين يضربون جيراننا..... كلا منهم يرتدى زيا اسود مثل لوننا و غطاء للرأس
عفوا الماء يزداد اندفاعا و أبي جورج يسقط على الارض تحت اقدام ذوي الزي الأسود
يا للهول ما هذا أمى تقع بى و تحاول ان تحمينى من ضرب هرواتهم الضخمه و احذيتهم الصلبه
أمى صارت لا تتحرك بل و وتوقفت أنفاسها التي كانت تدفئني، لكنها ما زالت تحتضنى لتحمينى و لا ارى من حضنها الا لون السماء الذى صار اسود مثل لوننا
عفوا انا جائع و لكنى لست قادراً على الصراخ من شدة الجوع عفوا يا أمى ألا ترضعينى انا جائع انا جائع جائع جائع
****
و مع ارتفاع صوت المؤذن فى اذان الفجرمن مسجد مصطفى محمود
اقترب احد الجنود من احد الضباط و رفع يده بالتحيه و هو يشير باليد الاخرى
: الست دى يا فندم ميته و تقريبا معاها عيل صغير فى حضنها ميت هو كمان
فيرد الضابط بقرف :غور تاويهم فى اى عربيه مش عايز وجع دماغ
تمت
قصة من مجموعة "جمهورية الغابة العربية" نشرت عام 2006

18‏/11‏/2011

الأحلام المبتورة

ملعونة الأحلام المبتـــــــــــورة
ملعونة الضاحكة الساخرة .... لما بشوف نفسي في صورة
وأتخيل إيه كان حلمي، وإزاي اتبخر.....
وارتجعت روحــــــــي مكســـورة
*****
ملعونة الفكرة اللي تضحــك
تسعد روحي و تتمحك
في الحزن.... وتطير طوالي
مع باقي الأحلام المنثـــورة
*****
ملعونة الدنيا وتصاريفهـــا
ملعون القلب اللي عارفهــا
ومُصر إنه حيحلم تانـــــي
.... مبيهموش من كسرة جديدة
حتسيب روحي المأســــورة
ملعونة الأحلام المبتورة

10‏/11‏/2011

إلى أبي .... في ذكراه العاشرة

يا أبويا وحشتني حتى تجاعيدك
 ولا ألف مليون راجل يقدر يعيدك
 ولا حتى في حد في حنانك
 محتاج تعود .. بس أبوس إيدك
*****
ضهري اللي قام بيك انكسر
كما أرض غادرتها سماها
لا انا مهزوم ولا منتصر
لكني من غيرك بعيش المتاهة
*****
لا متغطى بنظرة عينك
أنا عريان بتجلدني سياط البرد
وبرد الدنيا من غيرك
كما الشيطان لاهل الأرض
بيغويني ويدنيني ويرميني
ولا عمره يوم وفا بالوعد
*****
ولسه ماشي عالمبدأ
لو حتى دمي يتفرق
لو اتغرب أو أتشرق
محافظ أنا أهو عالعهد
*****
لكن محتاج أكيد حضنك
أعيد من تاني تكويني
تشد وداني تحويني
تقولي شيل يا واد همك
واقول اكتافي مش قادرة
تداري ضحكة مش قادرة
تمحي همومي تحميني
تخاف دمعتي من عيني
أطاطي أبوس ايديك واسرح
في كف ايد كما المسرح
عروقه شكل طين بلدي
تقولي تعالى في حضني يا ولدي
ينبت فرحي في جبيني

23‏/10‏/2011

خدودك

من خدك الأحمر ساعة الكسوف

                                         اتعلم القمر الكســــــوف

لما نور الشمس يغيب عنه يبقى اسود
زي عينيك انتي في لحظة الخــــــوف
*****
ساعتها بس كفوفي تحضن خدودك
ينسحب سواد الخوف بسرعة من حدودك
تتولد شمس النهار من جديد
تتزرع لحظة شروق فوق خدودك

28‏/09‏/2011

رأيت أبي

أحاول إغماض عيناى متجاهلا تلك الأصوات من حولي
حابساً دموعي التي أنتجها الألم
تصر الحرارة على استمرار الارتجاف الذي أنهكني حتى صار التنفس عزيزا
تأخذنى الهلاوس لعوالم أخرى , فأراني وأراني واراني
أسحب الاغطية المتعددة واتخذ وضع الجنين عائدا لرحم الدنيا
تفر قطرة عرق من فوق جفني، تجبرنى على فتح عينى
أرى أمى واقفة بصعوبة تعد لى الكمادات محاولة الانتصار على وهج الحرارة المنبعث من جسدي
يحتل وجهي شبح ابتسامة انتزعتها من الألم، أظن دموعي حجبتها فلم تراها امي لترتاح قليلا
يشغلنى لحظيا اتساع قلب الام وهذا الحنان المتدفق من مجرد لمسة
تعاود الألام جذبى لدائرتها السوداء المغلقة
أشعر بقبلة على باطن قدمى التي أفلتت من الغطاء ، طبعها زوج من الشفاة الصغيرة
أدرك تماما أنها لصغيري ذو السنوات الثلاث
أتذكر جيدا أنى فعلتها منذ سنوات لأبى على فراش مرضه ,
الان بين احضان أمي ارى أبــــي بشفاه صغيري.

31‏/08‏/2011

أحمد رمضان

برنامج "ولاد الحرام مسابوش لولاد الحرام التانيين حاجة" راديو ميجا اف ام 92.7 ’ رمضان 2011


أحمد رمضان، شاب مصري جدا، متفوق في شغله، شاطر كل الناس بيحبوه، وهو كمان بيحب كل الناس وهي دي مشكلة حياته.
أحمد ضعيف جدا قدام الجنس الناعم، عينه زايغة يعني زي ما بيقولوا ، يشوف الواحدة من دول قلبه يقع في رجليه، في ظرف خمستاشر دقيقة يكون حبها،وعزمها على فنجان قهوة ، تلاتين دقيقة يكون صاحبها ومتسألنيش ازاي هو موهوب بصراحة، كلمتين على كام نظرة من عيونه الخاضر البنت من دول متستحملش في ايده غلوة، بكرة الصبح بتكون العلاقة انتهت، لان الاخ أحمد زهق.
أو وهو مروح شاف واحدة تانية وقلبه الشرير سخسخ وحبها.
بس هو صاحب مبدأ ومبدأه في الحياة قعدة الراجل بميت ست، بس لو جت الست طظ في مليون راجل
ماكينة حب متنقلة، حبيب كما قال الكتاب، دون جوان عصره وأوانه، مهما كان فرحان او متضايق تعبان أو مشغول، أو حتى عيان، لازم يحب، بس لان المثل بيقول لكل جواد كبوة، احمد اتجوز من شهرين، اخيرا واحدة عرفت تكعبله وتخليه يتجوزها بعد ما قدرت تصمد معاه 3 ايام ورا بعض، أحمد دخل دنيا، بس ياريته ما دخل.
عارفين ليه
ادعوا لاحمد في الشهر الكريم ده يخف ويخرج من المستشفى اللي بيتعالج فيها من الصدمة العصبية اللي عنده، أحمد اكتشف بعد شهر ونص جواز ان حرمه المصون عندها ملف في الاداب والملف ده يادوب معمولها فيه حوالي 39 قضية بس ، المسكين مستحملش
وصدق اللي قال غلطة الشاطر بالف
 

أحمد مهدي

برنامج "ولاد الحرام مسابوش لولاد الحرام التانيين حاجة" راديو ميجا اف ام 92.7 ’ رمضان 2011


احمد مهدي شاب مصري زي الفل، تشوفه ترتاحله من أول نظرة، وحتبقوا اصحاب في ظرف نص ساعة، وبعد ساعة الا ربع حيكون بيكلمك وكأنه يعرفك من أيام ما كنتوا في الحضانة، ودود جدا ابو المهد، اه هو اسم الشهرة بتاعه ابو المهد
حاصل على بكالوريوس هندسة قسم سيارات، يعني مهندس قد الدنيا، اشتغل بدل المرة تلاتة مع انه يادوب متخرج من سنيتين، بس متفهمونيش غلط مش معنى كده انه مطلوب لا بالعكس ده حيشرحلنا مشكلة ابو المهد مع الحياة.
مهدي يا جدعان بني ادم فقر، لو مسك الدهب بايده يتحول تراب، لو دخل مسابقة لسوء الحظ تأكدوا انه حيطلع الأول بلا منافس، من كام سنة قرر وهو طالب يدخل مشروع مع واحد صاحبه المشروع مضمون حيسافر واحد فيهم الصين يشتري شوية حاجات ويرجع مصر يعملوا اوبن داي ويبيعوها
صاحبه سافر بالسلامة تفتكروا حصل ايه، لا لا دماغكم متروحش لبعيد كده الطيارة موقعتش وهو راجع ، صاحبه جاله سارس في الصين ومات، وراحت فلوسك يا مهدي، المهم انه محرمش، قرر يشارك واحد صاحبه تاني في مزرعة فراخ، هوب جت انفلونزا الطيور والحكومة قفلت المزرعة، زعل شوية بصراحة وقرر انه يتأنى شوية في مشروعه اللي جاي
واحد ابن حلال مكانش يعرفه كويس اقنعه يسيبه من المشاريع الاقتصادية ويفكر في السياسة، وانضم مهدي للحزب الوطني في 2010، وكان بشرة خير على مصر كلها وانتهى الحزب الوطني.
وأيام ثورة يناير كنت سعيد جدا بأن أبو المهد قرر ما يشاركش فيها ويفضل في البيت، بصراحة اطمنت على الثورة.
بس اليومين دول في مشكلة كبيرة قوي، أبو المهد مصر وكله عشم انه يسافر معايا الشهر الجاي وانا رايح تركيا، و اللي انا متأكد منه ان لا تركيا ولا هو حيحصلهم حاجة، بس انا ذنبي ايه اروح بلاش، انا غيرت رأيي ومش مسافر، حد عايز ينتحر يسافر مع ابو المهد بدل ما يسافر لوحده
 

حاتم شفيق

برنامج "ولاد الحرام مسابوش لولاد الحرام التانيين حاجة" راديو ميجا اف ام 92.7 ’ رمضان 2011\

حاتم شفيق، اغبى بني ادم ممكن تقابله في حياتك، تلاتة من مدرسينه في المرحلة الابتدائية انتحروا بسببه، وهو ساب المدرسة بعد 11 سنة، في الاعدادية مدرس العلوم بتاعه دخل مستشفى الأمراض العقلية، ومسكوا واحد على حدود ليبيا بيحاول يهرب، بس هو المرادي كان احسن وخد الاعدادية في خمس سنين، جه بقى في ثانوية عامة وحجرت معاه، لدرجة ان اخر استاذ حاول معاه، الاستاذ عرابي المشد اكتشف انه كان دفعته في اول ابتدائي، وساعتها بس حاتم صعبت نفسه عليه، وفهم ان طالما سنه وصل 30 سنة وما اخدش الثانوية العامة يبقى يجرب في حاجة تانية.
كان والده يا عيني ربنا رحمه وتوفي بعد ما اتشل من غباء حاتم، وفي ذكرى وفاة مامته اللي انتحرت لما فشلت تفهمه ان الرضاعة مش من صوابع رجلها، حاتم قرر يعتزل الدنيا.
باع كل املاك باباه وحطها في البنك وقرر يعيش في شقته وميخرجش منها غير علشان يقبض العائد أول كل شهر.
بس للاسف البنك غلط غلطة عمره وادى حاتم كارت ايه تي ام، وكان طبعا كل شهر بيروح البنك اكتر من خمس ست مرات، مرة يجيب الكارت اللي اتسحب في المكنة، مرة يغير الكارت اللي ضاع، مرة يسحب من الشباك وهكذا.
بس هو كان سعيد في البيت، وكان مرتاح انه مبيتعاملش مع بني ادين تانيين، بس المصيبة ان حاتم قرر يتجوز، ولانه كان وصل لسن ال39 كان لازم يدور على حد مناسب، ولان حاتم في اخر قياس لقدراته العقلية ثبت انه في مستوى تفكير دودة القز، قرر انه يتجوز واحدة زكية جدا، علشان مشكلته متتكررش في ولاده
والغريبة ان حاتم اتجوز في ظرف شهرين، بس الأغرب ان مراته اتطلقت بعد 13 يوم و رجعت بيت ابوها، بعد ما سابت حاتم على الحديدة، وحولت كل فلوسه في البنك لحسابه
وحاتم لحد دلوقتي قاعد قدام البنك كل يوم علشان يحاول يسحب العائد بتاعه، وكسر ييجي عشر مكن لانه بيقوله مفيش رصيد
ربنا يسهل ويموت من الجوع يمكن يرتاح
 

زيزو

برنامج "ولاد الحرام مسابوش لولاد الحرام التانيين حاجة" راديو ميجا اف ام 92.7 ’ رمضان 2011


زيزو مجنون كورة، يقدر بحمد الله يقولك نتيجة ماتش الاهلي واسكو سنة خمسة وتمانين في الدور الاول، ويوصفلك كمان الجون اللي جابه بيبو من باصة مختار مختار في الدقيقة تسعة وعشرين لما الماتش خلص واحد صفر.
حضر كل ماتشات الاهلى والمنتخب في الاستاد من سنة تسعين، عضو ناشط في كل منتديات الكورة على الانترنت، رئيس رابطة مشجعي الاهلي في مدينة دكرنس.
زيزو ياجماعة من الموهوبين اللي مخادوش فرصة، يقدر يحلل اي ماتش وهو قاعد على القهوة بعد الاستاد ويقولك عيوب الخطة وغلطات المدرب، يقدر كمان يقولك التشكيل المناسب لكل ماتش قبل ما يبدأ ولو اتحاد الكورة سمع عنه أكيد مش حيلاقي غيره يمسك المنتخب بعد الكابتن حسن شحاتة.
مشكلته انه اهلاوي متعصب، وده خلاه طلق مراته علشان اكتشف ان جوز بنت عمتها زملكاوي ، ابوه اللي هو ابوه قاطعة تلات سنين لانه حاول وهو في تانية اعدادي يمنعه يحضر المباراة المهمة بين الاهلي و الكروم، لكن كل ده مش مهم طالما الاهلي بيكسب وبياخد الدوري
المشكلة اليومين دول ان وليد بعد العمر ده كله قرر يلعب كورة، قال يمشي رجليه ويجرب يلعب بعد ما قضى العمر ده كله متفرج.
وبغض النظر عن انه بقى مسخرة الملعب، وانه خد ييجي تلاتين كوبري، وانه اترقص لدرجة متقدرش شاكيرا بذات نفسها متقدرش عليها، الا انه لما وقع على وشه في نهاية الماتش واتكسرله اربع ضلوع ومناخير مبقاش قادر يحضر ماتش الاهلى في دور التمانية في بطولة افريقيا.
وده بالنسبة لزيزو اوحش بكتير من يوم ابوه الله يرحمه ما مات يوم ماتش الاهلي والترجي واللي اضطر علشان يحضر العزا يروحه في الشوط التاني.
 

27‏/08‏/2011

بندق

برنامج "ولاد الحرام مسابوش لولاد الحرام التانيين حاجة" راديو ميجا اف ام 92.7 ’ رمضان 2011




بندق شاب مصري شعره شاب وهو بيحاول يفهم، بس الحقيقة عمره ما فهم حاجة خالص، وده نتيجة انه لجأ لكمية من المخدرات تكفي لنوم قطيع من الأفيال أصغر فيل فيهم عنده اتناشر سنة.
محاولة بندق للفهم انتهت في تالتة ابتدائي لما اكتشف انها مش فارقة كتير بين ايجيبت واليفانت، وان الجرامر هو النحو بتاع الانجليزي، وان المدرس بتاع الانجليزي اللي هو في الاصل مدرس جغرافيا لما كان بيديهم حصة العربي بيغلط في الاملاء.
وانه حتى لو ذاكر ونجح واتخرج في يوم من الأيام حيفضل برضو جاهل، وعلشان بندق فهم الفولة ساب الدراسة واكتفى بانه يكون حسب تصنيف وزارة التعليم للبني ادمين راسب تالتة ابتدائي، واشتغل في ورشة سمكرة سيارات.
هناك في الورشة لقى نفسه، الاسطى بتاعه لا بيعرف يقرا ولا يكتب لكن عليه ماسكة اجنة ولا تامر حسني وهو ماسك الجيتار، في ظرف سنة واحدة علمه كل حاجة، واترقى بندق من مجرد بلية، لاسطى صغير بيعمل المرمات اللي بتيجي الورشة، والمرمات دي اللي هو الحوادث الطياري، رفرف معوج والعربية ايه غير اربع رفارف، اكصدام واقع، كبوت عايز استعدال، المهم انه بقى صنايعي كسيب.
وبعد فترة لما زادت كمية المخدرات مع زيادة الدخل، بندق مبقاش قادر يشتغل، قرر انه يشتغل شغلانة اسهل، وليها علاقة برضو بالعربيات، بس مجهودها أقل، صاحبنا اشتغل سايس.
وتعريف السايس العلمي هو الراجل اللي بتشوفه وانت نازل من عربيتك بعد ما تكون خلاص ركنت، وبيجيلك جري وانت خارج بالعربية من مكان ركنتك علشان يقولك اكسر العجل، وغالبا لو سمعت كلامه حتخبط العربية اللي قدامك.
بندق دلوقتي ماشاء الله اشهر سايس في مصر الجديدة، بس المشكلة انه ابتدى يتعب من الشغلانة دي كمان، فعلشان خاطر الانسانية حد عنده وظيفة لبندق ميزيدش المجهود بتاعها عن أنه يبربش بعنيه.

ابتسام مجدي

برنامج "ولاد الحرام مسابوش لولاد الحرام التانيين حاجة" راديو ميجا اف ام 92.7 ’ رمضان 2011



ابتسام مجدي، اشهر مذيعة راديو في مصر، وصلت في سن التلاتين انها تكون مديرة لاشهر واكبر محطة راديو في مصر، عصبية شوية، وسر عصبيتها رغبتها المستمرة في التفوق والنجاح.
كل اللي اتعاملوا معاها بقوا عارفين انها اول ما تبرق حتزعق، بس الحقيقة قلبها طيب، طلعت قرار اداري من كام يوم بصرف عدد اتنين كيس قطن لكل موظف في الاذاعة علشان يسدوا ودانهم لما تزعق.
لا وكمان صرفت لكل موظف نص شهر بدل زعيق، مش بقولكم قلبها طيب.
مشكلة ابتسام بقى انها جنب عصبيتها ، نرفوزة، عارف انكم حتقولولي ايه يا ابو العريف الفرق بين العصبية والنرفزة، حقولكم العصبي بيتعصب، النرفوز بيتنرفز، ووئام لما بتتعصب بتزعق، لما بتتنرفز بتتخانق، واجارك الله لو اتخانقت معاك، حتفقد يا حاسة السمع يا النطق، بس صدقوني قلبها طيب، لو حصلك كده فعلا حتقدر تجيبلك قرار بالعلاج على نفقة الدولة.
بس ابتسام وهي رايقة حاجة تانية خالص، ضحك وتهريج وجدعنة ، صحيح حتخصمهم من بدل الزعيق بس مفيش اغلى من راحة البال، ومع الضيوف طبعا حاجة تانية خالص، تشبه كده ليلة دافية في شهر يناير في الساحل الشمالي.
بس مش عارف ليه حاسس انكم مش مصدقني لما بقولكم انها طيبة، لكن انا حاثبتلكم ده حالا، اول امبارح واحنا في الشهر الكريم اللي احنا فيه ده، وئام اتعصبت عليا، تخيلوا عملت ايه.
خدتني في الاستوديو المعزول علشان محدش يتأثر بالزعيق السلبي اللي تأثيره على ودانك بالظبط زي تأثير التدخين السلبي على صدرك، وادتني كيس قطن قبل ما تبدأ في الزعيق.
بذمتكم في حد في الزمن ده بالطيبة دي.

24‏/08‏/2011

هنيـــــــــــة

برنامج "ولاد الحرام مسابوش لولاد الحرام التانيين حاجة" راديو ميجا اف ام 92.7 ’ رمضان 2011




هنية بتاعة الفول والطعمية، أشهر ست في بولاق تمن، العمر كتيير توعى على فحت البحر، الحالة الاجتماعية أرملة جوزها مات ايام ثورة يوليو، ولادها خمسة كلهم ماتوا بسبب الشيخوخة ، احفادها اتناشر اصغر واحد عايش فيهم طلع على المعاش من سنتين.
هنية بسم الله ما شاء الله لسه بصحتها لا عندها زهايمر ولا مبتقدرش تتحرك زي الاصغر منها بتلاتين سنة، لا لسه بتقوم الصبح من النجمة، تخرج على نصبتها في الحارة تولع على الزيت وتقرص الطعمية وتقلب قدرة الفول وتبيع لزباينها.
ناس كتير احتاروا في سبب صحتها في السن ده، كتير قالوا السبب انها كانت بتستخدم زيت موبيل وان في قلية الطعمية وده خلاها تمام، ناس تانية قالوا انها من كتر اكل الفول المسوس، بقى عندها قدرة جبارة في تحمل الامراض، لكن في النهاية محدش عرف السر، بس الاكيد الكل بيحسدها على صحتها.
المشكلة الوحيدة عند هنية هي الوحدة، خاصة وان الدنيا اتغيرت ومبقاش في صلة رحم، والعيال ولاد احفادها كل واحد فيهم مشغول ببيته ومراته، اما احفادها فنصهم مات ونصهم مبقاش قادر يتحرك ويزورها، علشان كده هنية فكرت وقررت تبعت في بريد الجمهورية في باب أريد زوجاً.
الجواز هو الحل بدل ما تمشي مشي بطال، وكتبت في الاعلان ده، عروس ذات مال وعيال ، بيضاء اكلح لونها بفعل عوامل التعرية ترغب في زوج متدين، يرعى الله في بيته واسرته. الشروط الخاصة لا يزيد سنه عن خمسين سنة.
اه هنية مش عبيطة تتجوز واحد تشتغله ممرضة، هنية عايزة تدخل دنيا طالما فشلت تروح للأخرة.

وليد نبيل

برنامج "ولاد الحرام مسابوش لولاد الحرام التانيين حاجة" راديو ميجا اف ام 92.7 ’ رمضان 2011




وليد نبيل، شاب فيسبكاوي اصيل، ارتبطت حياته بالفيس بوك بعد أول أكاونت عمله عليه سنة 2007، بقى بيشتغل حوالي ساعتين في اليوم، وبينام اربع ساعات وبيعمل بقية الحاجات الحياتية التانية ما بين اكل وحمام ومواصلات في تلات ساعات وخمستاشر ساعة على الفيسبوك.
يعني قعد في الاربع سنين دول حوالي خمستاشر في تلتماية خمسة وستين في اربعة ييجي واحد وعشرين ألف وتسعمية ساعة يعني تسعمية واتناشر يوم يعني تلاتين شهر ونص، يعني سنتين ونص.
وليد قضى في اخر اربع سنين سنتين ونص على الفيس بوك، حب فيهم اتناشر فريند، اكتشف في النهاية ان ستة فيهم رجالة، واربعة اصغر واحدة فيهم عندها خمسين سنة، واتنين بيتعالجوا في مستشفى للامراض العصبية.
اتصاحب على اكتر من ميت صديق، لستة الفريندز عنده وصلت لالفين ونص، صحيح نصهم لاجنبيات لابسين مايوهات بيتكلموا لغات مبيعرفش يتكلمها لكن المايوه بيتكلم لغة موحدة لكل البشر.
نسيت اقولكم وليد في الاساس شغال موظف في الشهر العقاري، ولانه خلاص خطب وربنا هداه قرر يعمل ايفينت لفرحه على الفيسبوك، لانه خلاص لقى البنت اللي ممكن يعمل لها لايك، وققر يعمل اجنور لكل اللي فات، ويبطل يلعب فارم فيل ويركز في البيت سوسايتي لانه حيفتح بيت.
وليد خلاص حيكتب على الفيس بوك انجيجد، يعني حيعمل ريموف لكل المايوهات، وليد اللي خطيبته عندها تو اكاونت على الفيسبوك قرر يكتب استيتوس النهاردة يقول فيه
متضيعوش وقتكم يا شباب على الفيس، لانك بعد اربع سنين حتبقى عامل زي التيس

23‏/08‏/2011

توتي

برنامج "ولاد الحرام مسابوش لولاد الحرام التانيين حاجة" راديو ميجا اف ام 92.7 ’ رمضان 2011



توتي شاب فانكي كل أمله في الحياة يبقى مطرب ومغرق الدنيا كليبات، والكليبات يعني مزز كتير بترقص حواليه، ومطرب يعني ملايين المعجبات اللي حيموتوا عليه، توتي عنده مشروع شخصي قرر يشتغل عليه.
أول مواصفة هو تخيلها في كل مطرب انه لازم يبقى عنده جيتار، توتي اشترى بدل الجيتار اتنين، واحد عادي وواحد اليكتريك، برضو استايل يا جماعة.
تاني حاجة لازم يكون بادي بيلدنج، فينك ياجيم توتي بقى طول النهار في عضل جيم، وبالليل بيتعلم يعزف جيتار، الدامبلز بين ايديه الصبح، وبالليل الجيتار في حضنه.
توتي في ظرف سنتين بقى بيعرف يلعب على الجيتار، وبقى عامل زي ضلفة دولاب جدي اللي من الخشب الزان وساعتها بس عرف انه ابتدى الطريق.
لف كتير على مكاتب المنتجين، اللي كلهم حاولوا ياخدوا منه فلوس علشان ينتجوله، بس هو اقتناعه بموهبته منعه انه يشتري الفرصة.
فاتت سنة ورا سنة وحلم توتي مش عايز يتحقق، اتكسر الجيتار وجاب مكانه كام جيتار، عضل جيم عمله عضوية شرفية لانه اقدم واضخم عضو في المكان.
ولما توتي يأس ، ربنا منسيهوش، صاحبه الانتيم جابله حفلة في العجمي عاملها شوية شباب وجايبين فيها كام مطرب من اللي لسه بيبتدوا، وهو رشحلهم توتي اقتناعا بموهبته.
ولما توتي طلع على المسرح وابتدى يغني اغنية لعمرو دياب، فهم للمرة الأولى هو ليه كل السنين دي كان محتاج يعمل بادي بيلدنج.
علشان يستحمل كم الضرب اللي اتضربه أول ما الناس سمعت صوته، اللي يشبه كتير نوبة صحيان في اي وحدة عسكرية.
على فكرة توتي لسه ميأسش، توتي عارف ومدرك ان كل الناس اللي سمعت صوته ومعجبهاش جهلة ومعندهومش اذن موسيقية، وكفاية عليه ابراهيم عضل صاحب الجيم، اللي أول كل شهر وهو بيدفعله الشهرية بيسمع منه اغنية جديدة وهو سعيد بالفلوس.

22‏/08‏/2011

عمرو مصطفى

برنامج "ولاد الحرام مسابوش لولاد الحرام التانيين حاجة" راديو ميجا اف ام 92.7 ’ رمضان 2011



الفنان، ايوة الفنان وده مش لقب ده غصب واقتدار، صاحبنا في حلقة النهاردة اللي بقى شاعر ومغني بوضع اليد في الأصل ملحن، بس مبيحبش حد يناديه غير يا فنان، مع انه اشتهر في الوسط الفني الغنائي بالترزي، وده عاشان قدرته الفائقة في قلب أي أغنية زي الشراب المقلوب.
لحن أغنية وطنية قديمة بين ايديه في ثواني يبقى اغنية عاطفية، اوبريت لسيد درويش يقلبه موسقى تصويرية لفيلم أكشن، صاحبنا الترزي الفنان مفيش حاجة بتقف قدامه، موهوب بالفترة، كفاية انه رغم فشل عملية اللحمية اللي عملها خمس مرات أصر يغني، وعمل كده فعلا ومتمش تقديمه للمحاكمة لحد دلوقتي.
منظمة الصحة العالمية اعتبرته كيان فريد لأنه أول مطرب في تاريخ البشرية بيغني بلحميته، أما اليونسكو فطالب باعتباره محمية طبيعية، لكن مصر اعترضت وتم الاتفاق بعد تحكيم دولي على اعتبار مناخيره بس محمية طبيعية.
الجديد في صاحبنا الشاعر والملحن والمطرب انه قرر بعد ثورة خمسة وعشرين يناير يبقى كمان يبقى سياسي، وايه المانع ما السياسة فن وهو فنان، وابتدى من خلال الانترنت يروج لفكره السياسي اللي بيعتمد على نظرية المؤامرة.
صاحبنا شايف ان مصر في خطر، البلد اللي عدد سكانها فوق التمانين مليون بتتعرض لحرب خفية من التحالف الايراني الاسرائيلي الأمريكي السوداني، ولانه مقاتل وسلاحه جيتاره فهو لازم ينقذ مصر.
ولان الفنان مقتنع بأن المرحلة دي صعبة وهو لازم علشان يعديها يهزم الوحش في النهاية ، قرر يرشح نفسه لرياسة الجمهورية.
فعلشان خاطر الفن وعلشان خاطر مصر، لو رشح نفسه اعزائي المستمعين انتخبوه، يمكن يبطل يغني

عادل الكردوسي

برنامج "ولاد الحرام مسابوش لولاد الحرام التانيين حاجة" راديو ميجا اف ام 92.7 ’ رمضان 2011



عادل الكردوسي، شاب مصري أصيل، ابن نكتة دمه خفيف زيه زي كل المصريين، ملامحه مصرية جدا لدرجة انك تشك انه مسروق من المتحف المصري، وعمنا زاهي حواس لو خد بيه خبر حيكتشفه حيكتشفه.
شغال محاسب في شركة كبيرة للاستيراد والتصدير، متجوز وعنده ولد واحد، بس للاسف مراته عايزة تطلق، مع ان عادل راجل كسيب ماهيته فيها عدد من الاصفار اللي يخليه يفتح بيت مرتاح، شخصيته فيها مميزات تخللى أي ست تبقى سعيدة جنبه، ماعدا عيب واحد بس.
عادل الكردوسي بخيل جدا، لدرجة انه يوم ما تولد نزل في عربية باباه قبل ما يوصل بمامته المستشفى علشان يوفر تمن عملية الولادة، مكنش بيرضى من وهو صغير يشتري زي اصحابه شيبسي وبيبسي وكلام فارغ من ده، لا كان بيحوش، باباه اكتشف في ثانوية عامة ان عادل حوش كل مصروفه من كي جي 1 مصرفش منه غير 50 جنيه لما اتمسك وهو بيحاول يزوغ في مترو الانفاق علشان يوفر تمن التذكرة.
ده ميمنعش ان عادل بيقعد مع اصحابه على القهوة، صحيح دايماً يقول انه صايم، بغض النظر الوقت ليل ولا صبح، بس اصحابه بيطنشوا.
ولما قرر يتجوز كان مقتنع ان الجواز مشروع فاشل جدا، يجيب ليه واحدة غريبة يصرف عليها ويأكلها، لكن لما اكتشف ان الممرضة اللي حتقعد مع مامته بعد ما باباه مات حتتكلف اكتر، اتجوز الممرضة، واللي طبعا فقدت أهميتها بعد وفاة والدته، وبقت حمل زيادة على مصاريف عادل اللي مبتزيدش باي حال من الأحوال عن 150 جنيه في الشهر.
المصيبة كمان بالنسبة لعادل الاستاذ الصغير اللي شرف، وفتح معاه باب مصاريف جديدة ايشى بامبرز وايشي لبن ولا دوا لما يعيا.
عادل الحقيقة فكر في الملجأ بس برضه ده دمه ولحمه، وده خلاه عاجز عن التصرف لاول مرة في حياته.
بس اعتقد النهاردة بعد ما عادل فاض بيه الكيل وطفح قرر يضحي بالام اللي هي مراته ويكتفي بالابن علشان هو يقدر يعيش.

20‏/08‏/2011

فارس خشب


الااونا الادو

فتحوا المزاد

وناس كتير

اتجمعت من غير ميعاد

***

صرخ المنادى بالتمن

والثانية كان عمر الزمن

هتف المزايد وبشجن

رسيت عليه والصمت ساد

***

الااونا الادو

فتحوا المزاد

نادى قوى على تانى صنف

صوت كما الكرباج يطرقع

وصوت تانى كان ساكنه ضعف

ورقم يزيد ورا واو العطف

مالك جديد بفلوسه جاد

***

الااونا الادو

فتحوا المزاد

دورى انا مين يشترى

فى وش خاف

صوته جرى

سكت المنادى م الزهق

صرخ نهق

ما حد رد

ولا نطق

***

مين يشترى فارس خشب

سوس خلاص من التعب

صوت المنادى خلاص خفت

لجلج سكت

ورجعت تانى للرفوف

تبر التراب كسانى صوف

قررت فى ليلة

بلا اى خوف

انى انكسر

تعبت جدا م الكساد

قفلوا المزاد

19‏/08‏/2011

سليمان خاطر يبتسم من جديد


في الوقت الذي تبكي فيه ثلاث امهات ابنائهن الذين سالت دماهم على رمال سيناء، التي فيما يبدو قد أدمنت الدم، كان الشهيد سليمان خاطر يبتسم ساخراً في الأعالي، وفي ذات الوقت الذي حاول فيه البعض الاستفادة من الحدث، والترويع والترويج لفكرة أن اسرائيل على بوابة مصر الشرقية تستعد لاقتحامها، وان جيشنا يستعد لصدها، كان سليمان يتكأ في جلسته بجوار عازف الربابة المفضل لديه ليروي قصته، ذلك الفتى الشاب الذى كان يقوم بنوبة حراسته المعتادة بمنطقة رأس برقة أو رأس برجة بجنوب سيناء، اثناء فترة خدمته وتجنيده في الامن المركزي، ثم فوجئ بمجموعة من السياح الإسرائيليين يحاولون تسلق الهضبة التي تقع عليها نقطة حراسته فحاول منعهم وأخبرهم بالانجليزية أن هذه المنطقة ممنوع العبور فيها قائلا: (بالإنجليزية: stop no passing) إلا انهم لم يلتزموا بالتعليمات وواصلوا سيرهم بجوار نقطة الحراسة التي توجد بها أجهزة وأسلحة خاصة فأطلق عليهم الرصاص. كانت المجموعة تحتوي 12 شخصا، فقتل منهم سبعة في الخامس من أكتوبر عام 1985.
ثم تمت محاكمته عسكريا، ثم صدر الحكم عليه في 28 ديسمبر عام 1985 بالأشغال الشاقة المؤبدة لمدة 25 عامًا، وتم ترحيله إلى السجن الحربي بمدينة نصر بالقاهرة. بعد أن صدر الحكم علي خاطر نقل إلى السجن ومنه إلى مستشفى السجن بدعوى معالجته من البلهارسيا، وهناك وفي اليوم التاسع لحبسه، وتحديداً في 7 يناير 1986 أعلنت الإذاعة ونشرت الصحف خبر انتحار الجندي سليمان خاطر في ظروف غامضة.
ثم صدر قرار بمنع التحاق اي حامل مؤهل دراسي بالامن المركزي ، خوفا من تكرار ما فعله سليمان، والذي قال عنه مبارك "إنني في غاية الخجل، فقد قام أحد جنودي بفتح النار على مجموعة من الإسرائيليين اخترقوا الحدود، مما أدي إلى قتل سبعة منهم" !!!
********
من المؤكد ان واحداً من الشهداء الثلاثة لم يسمع سليمان عقب صدور الحكم عليه بالمؤبد حين قال "أنا لا اخشي الموت... ولا أرهبه... إنه قضاء الله وقدره، لكنني أخشي أن يكون للحكم الذي سوف يصدر ضدي آثار سيئة على زملائي ، تصيبهم بالخوف وتقتل فيهم وطنيتهم".
لأنهم لم يخافوا، وكيف يخاف جندي يحمل سلاحاً على أرض مصرية، الا أن يد الغدر التي قتلت سليمان في محبسه، امتدت لتسرق أعمارهم، بنفس الخسة والحقارة.
*******
وما بين سليمان الذي قال في مصر "أفكر في مصر أمي، أتصور أنها امرأة طيبة مثل أمي تتعب وتعمل مثلها، وأقولها يا أمي أنا واحد من أبنائك المخلصين.. من ترابك.. ودمي من نيلك. وحين أبكي أتصورها تجلس بجانبي مثل أمي في البيت في كل إجازة تأخذ رأسي في صدرها الحنون، وتقول: لا تبكي يا سليمان، أنت فعلت كل ما كنت أنتظره منك يا بني".
وبين هؤلاء الجنود الذين ما رأوا مصر اما يوما ما، ولم يشهدوا سوى تلك القسوة ما بين تضاريس الحياة، وقهر الفقر، ليصلوا الى مرحلة تجنيدهم، فيصيبهم الذل أيضا، افيحلمون بان تنتهي فترة التجنيد ليعاودوا الارتماء في احضان الفقر وحده، بجوار الارض التي كانت يوما ما طيبة.
*******
سليمان الذي نحروه قال البيان الرسمي عن انتخاره انه تم بمشمع الفراش، ثم قالت مجلة المصور أن الانتحار تم بملاءة السرير، وقال الطب الشرعي أن الانتحار تم بقطعة قماش من ما تستعمله الصاعقة. أمام كل ما قيل، تقدمت أسرته بطلب إعادة تشريح الجثة عن طريق لجنة مستقلة لمعرفة سبب الوفاة، وتم رفض الطلب مما زاد الشكوك وأصبح القتل سيناريو اقرب من الانتحار.
وجنودنا الذين يحاولون الان الترويج لنحرهم، بعد دفعهم في مهمة غامضة لم نعرف ملامحها حتى الان، سوف يصدر بيان اخر يخصهم قريبا، يحتوى على نفس الزيف، ولكنه هذه المرة يعطيهم الحق في ان يكونوا شهداء، الفارق ما بينهم وبين سليمان، أن الخسيس الذي قتله من مصلحته أن يجعله منتحرا، أما الخسيس الذي ساهم في قتل شهداء الأمس فمصلحته تحتم أن يكونوا شهداء، والفارق ما بين خسيس وخسيس ،تنحي واستفتاء
*******
ولكن علينا ألا ننسى قبل أن نبكي على شهدائنا أن خلال السنوات العشر الأخيرة قتل العدو الصهيوني لنا 15 شهيداً اخراً، وأصاب حوالي 7 اصابات خطيرة، دون أن يطرف لنا جفنا أو يهتز رمش، دون أن يصرخ احد قادة جيوشنا ويطالب بتهذيب العدو المتطاول، دون أن نسمع عن اغلب تلك الحالات، حينها كان سليمان يبكي ويستقبل زملائه الشهداء في موقعه المفضل بالجنة، اما شهداء اليوم، فهو في انتظارهم ليسمع سؤالهم حين يغني عازف الربابة مقولته التي قالها في السجن "طب السلاح ده أنا واخده ليه؟...... عشان ارقص بيه عشرة بلدي.... ولا عشان ادافع بيه عن تراب بلدي؟"، عن ما عاد لمصر من دمائهم، حتى يجيب قائلا" ولابد من يوم معلوم تترد فيه المظالم".
******
كشف بأسماء شهداء الصمت، اقرأوا لهم الفاتحة :

نوفمبر 2000 أصيب مواطن مصري يدعى سليمان قمبز وعمته برصاص إسرائيلي حينما كانا يجمعان محصول الزيتون بميدان صلاح الدين برفح سيناء

أبريل 2001 أصيبت سيدة مصرية بطلق ناري إسرائيلي أثناء وجودها بفناء منزلها القريب من الحدود مع غزة في مدينة رفح سيناء

أبريل 2001 قتل شاب مصري يدعى ميلاد محمد حميدة برصاص جنود إسرائيليين عندما حاول الوصول إلى غزة عبر بوابة صلاح الدين في رفح سيناء

مايو2001 أصيب مجند مصري يدعى أحمد عيسى برصاص إسرائيلي عندما كان يؤدي عمله على الحدود في رفح بِ شمال سيناء

مايو2001 أصيب مواطن مصري يدعى زامل أحمد سليمان (28 عاما) بنيران إسرائيلية في ركبته أثناء جلوسه بمنزله فِي رفح سيناء

يونيو 2001 قتل مجند يدعى السيد الغريب محمد أحمد بعد إصابته بأعيرة نارية إسرائيلية في الحدود الفاصلة بين مصر وإسرائيل

سبتمبر 2001 أصيب ضابط مصري برتبة نقيب يدعى عمر طه محمد (28 عاما) بطلق ناري وعدة شظايا في الفخذ اليسرى بنيران إسرائيلية برفح

نوفمبر 2001 أصيب ضابط الشرطة المصري الرائد محمد أحمد سلامة بالرصاص الإسرائيلي أثناء دورية له في منطقة الحدود برفح

ديسمبر 2001 أصيب الشاب المصري من أهالي رفح سيناء محمد جمعة البراهمة 17 عاما في كتفه بطلق ناري إسرائيلي

فبراير2002 أصيب الطفل فارس القمبز (5 سنوات) بشظية نيران إسرائيلية في فخذه أثناء لعبه وحده بفناء منزله في رفح سيناء

نوفمبر 2004 دبابة إسرائيلية تقتل ثلاثة جنود مصريين على الجانب المصري برفح على الحدود مع غزة

ديسمبر2007 قتل المجند المصري محمد عبد المحسن الجنيدى بطلق ناري إسرائيلي في رفح سيناء على الحدود مع غزة

يناير 2008 قتل المواطن حميدان سليمان سويلم (41 عاما) من رفح سيناء برصاص إسرائيلي أثناء ذهابه لعمله

فبراير 2008 قتلت الطفلة سماح نايف (14 عاما) برصاص القوات الإسرائيلية أمام منزلها على الحدود قرب معبر كرم سالم

مايو 2008 قتلت القوات الإسرائيلية المواطن سليمان عايد موسى (32 سنة) بحجة تسلله داخل الأراضي الإسرائيلية قرب كرم سالم

مايو 2008 قتل عايش سليمان موسى (32 عاما) برصاص الجيش الإسرائيلي عند منفذ العوجة

يوليو 2008 قتل الضابط بالجيش المصري محمد القرشي بنيران القوات الإسرائيلية برصاص إسرائيلي على الحدود

سبتمبر 2008 قتلت القوات الإسرائيلية المواطن سليمان سويلم سليمان (26 عاما) من منطقة القسيمة بوسط سيناء بحجة أنه حاول التسلل

ديسمبر 2008 قتل فلسطيني وضابط مصري في تبادل لإطلاق النار عند معبر رفح بعد محاولة العشرات من سكان غزة اقتحام المعبر هربا من قصف إسرائيلي، وقالت مصر إن الضابط قتل برصاص حركة حماس.

أغسطس 2009 قال الجيش الإسرائيلي إن جنوده أصابوا بالرصاص جنديا مصريا بعد أن ظنوا خطأ أنه "عدو يحاول التسلل عبر الحدود"

فيلم وثائقي عن البطل الشهيد سليمان خاطر

مدام جانجاه

برنامج "ولاد الحرام مسابوش لولاد الحرام التانيين حاجة" راديو ميجا اف ام 92.7 ’ رمضان 2011



مدام جنجا، ست مش حتقابلها كتير في حياتك، والحقيقة انك مش حتقابلها خالص اساساً لانها مبتمشيش في الشارع زينا، علاقتها بمصر عاملة زي علاقتك بهرم منقرع، زرته مرة قبل كده وبتقرا عنه في كتب التاريخ، وساعات بتضحك لما تسمع اسمه.
وحتى لما هي قررت تقوي العلاقة دي وتعيش فيها، برضو عاشت بطريقتها الخاصة، تصحى الصبح الساعة اتنين الضهر تاخد فطارها في جنينة الفيلا في الكومباوند اللي هي عايشة فيه، تعدي عليها الكوافيرة تسرحلها شعرها، مدام جنجا مش حتسرح لنفسها زي وزيك يعني، وبعد شوية المانيكير والباديكير والذي منه، تطلع قوام على الجيم، تمارس رياضتها الصباحية الساعة سبعة المغرب، نسيت اقولكم الجيم برضو في الكومباوند.
ترجع ترتاح وتتغدى وتكلم صاحباتها بروين، وشاهي علشان يسهروا النهاردة في المكان الفلاني، اللي هو مش في الكومباوند، بس في الكومباوند اللي جنبه، وهكذا يامعلم.
أقصى مجهود بتبذله مدام جنجا انها تحاول تكلم السواق بتاعها بالعربي، حاجة كده ياحرام زي "اتلا الا الجيم" مسكينة التعليم بره أكلها لسانها.
بس من كام شهر من الحسد والقر اللي في عينيا وودانكم مدام جنجا يا حرام جالها اكتئاب شديد، لانها مدام بروين صاحبتها الانتيم صارحتها بالحقيقة، ان الخدامة الفليبينية اللي هي خطفتها من عدوتها اللدودة لي لي واللي كانت شغالة في بيت وزير من الوزار الكبار اللي شرفوا في السجن، مكانتش رقم واحد عنده في الفيلا، وكان في قبلها واحدة اندونيسية راحت تشتغل عند لي لي.
ياحرام جنجا لبست الفلبينية

تيكا "دوجز"

برنامج "ولاد الحرام مسابوش لولاد الحرام التانيين حاجة" راديو ميجا اف ام 92.7 ’ رمضان 2011




تيكا دوجز، المرادي انا مختلف قلت الاسم والمهنة مرة واحدة، لا متفهمونيش غلط اللي حاتكلم عنه النهاردة لا هو شغال في مطعم بيعمل هوت دوجز، ولا هو كلب، بني أدم يا جدعان زينا بالظبط، بس هو الحقيقة غريب شوية.
من صغره وبيحب الكلاب لدرجة انه مبيصحابش غيرهم، ولما كبر والدنيا اجبرته يتعلم ويتخرج، اول ما اشتغل عمل مزرعة كلاب مع ان معاه بكالوريوس هندسة، وسماها بكل فخر "تيكا دوجز" ، وعملها كمان جروب على الفيسبوك.
بس مش هو ده الغريب اللي فيه خالص ، الغريب انه مثلاً ممكن يهوهو في نص الكلام، في الاول اللي بيكلمه بياخدها على سبيل التهريج، بس بعد شوية لما بيبدأ يشمشم فيه، بيقلق، وتبقى مصيبة لو زعله لانه حيعضه حيعضه.
مامته ياحرام اغمى عليها لما في يوم وهي بتنضف لقيته مخبي اكل تحت السرير، باباه جابلوا اكتر من عشرين عروسة، بس هو كل مرة يطلع فيها عيب، يقولك دي ودانه مش واقفة، العروسة دي الكسحة بتاعة رجلها مش تمام، لا دي عايزة تتشرس، والاخيرة ياعيني قوله ديلها بيقول ان جدها كان بلدي.
المشكلة الجديدة اللي ظهرت كمان انه مبقاش مركز مع حمام البيت، ابوه بقى مضطر ياخده كل يوم يمشيه في الشارع علشان يعمل زي الناس، او مش زي الناس قوي يعني، بس اللي زاد الطينة بله انه مبقاش عاجبه يمشي جنبه كده، لا بيطالب بطوق وسلسلة، بجد ربنا يكون في عون ابوه.
تيكا ياجماعة سابوا من عالم البشر خالص، وعاش في عالم الكلاب، معرفش ده هروب من المجتمع وأزماته، ولا هو اللي بيحب العضم.

17‏/08‏/2011

طرطرة

عيل راح عالحيطة يطرطر .... يرسم قال بالشخة مدينة

صاحبه معدى عاكسه وهزر

طرطش خلى مدينته... بقت عالحيطة مدينة حزينة

حفرة فى جنب الحيطة.... حفرها واحد غيره

نقرة فى قلب مدينته صريحة

واحد تانى كتر خيره

جاب طباشيرة كتبها صريحة

"يسقط يسقط حكم العسكر"

كشر لحظة صاحبنا وفكر

بص وراه اتعفرت صفر

شافهم حاصروا الحيطة اتحصر

رصوا كلام جامد فى المحضر

ان صاحبنا "حمامته" وسيلة

لقلب نظام الحكم العالى

قال يطاوعهم تبقى جميلة

مد دراعه وجاب سكينة

وضحى بحلم رجولته الغالى

تانى يوم الصبح وبدرى

دهنوا الحيطة زيت وفخيم

عدى صاحبنا المخصى الفقرى

كتب بالدوكو ... كلام مفهوم

"عاش المجلس يسقط غيره

الفاتحة لذكرى المرحوم"


إيمان قدري

برنامج "ولاد الحرام مسابوش لولاد الحرام التانيين حاجة" راديو ميجا اف ام 92.7 ’ رمضان 2011




ايمان قدري، شابة مصرية مختلفة، علاقة اي بني أدم بيها بتتوقف على قدرته على السمع، وطولة باله، وصبره لأنه بمجرد ما حتشوفك أو حتكلمك في التليفون انت يادوب حتقول ألو وخد عندك" انت فين من زمان، كنت في سيرتك امبارح مع مروة، مروة خطيبة ماجد، عارف ماجد اللي كان بيلعب بنج بونج في نادي الزمالك اللي كان عيان، بس خلاص اتعالج عند الدكتور حازم، اصل الدكتور حازم شاطر قوي على فكرة عيادته في وسط البلد، بمناسبة وسط البلد تخيل أول امبارح وانا ماشية هناك في حرامي سرق شنطتي، تخيل الناس بقت عاملة ازاي، بس الحمد لله عادل الظابط خطيب شريهان جابهالي، عارف شريهان مين اخت مروة اللي كنت بجيب في سيرتك معاها امبارح"
واتحداك يا مسكين لو لحقت تفتح بقك ونطقت كلمة، وبغض النظر عن انك ممكن تكون متعرفش ولا اسم من اللي اتقالوا في المكالمة، وان دي يادوب الافتتحاية بس وانا شخصياً مش حقدر اكملها علشان وقت البرنامج، بس ايمان عقاب الهي بيصيب كل اللي يعرفوها، وبتلاقي اودانهم بعد فترة كده بتدلدل، وياحرام بيجيلهم فوبيا التليفونات.
ايمان مكنة رغي متنقلة، اول ما بتدوس على الزرار بتنطلق، وللاسف نسيوا يعملولها زرار ايقاف، لما بشوف نمرتها على تليفوني بابقى متأكد اني عملت حاجة غلط النهاردة وربنا بيعاقبني.
عارف انكم مستغربين وبتسألوا " طيب بترد ليه يا فالح.
نسيت أقولكم ايمان دي مديرتي في الشغل، ايه ده أنا أصلاً مقولتلكوش أنا شغال ايه، أنا شغال مدرس اشارة في مدرسة للصم والبكم.

16‏/08‏/2011

محسن القليوبي

برنامج "ولاد الحرام مسابوش لولاد الحرام التانيين حاجة" راديو ميجا اف ام 92.7 ’ رمضان 2011




محسن القليوبي، هو بيحب ينطقها كده، بيعتبر أليوبي دي شتيمة وميصحش واحد في ثقافته يتنازل عن انه يتنادى باسمه صح، محسن بقى مثقف اصلي من مثقفين وسط البلد، اللي هما مطولين شعورهم، لابسين بنطلونات جينز مسمعتش عن اختراع الغسالة، لابسين نضارة ودقنهم دايماً طويلة، ضاربين تحت باطهم كتاب أو اتنين، ومعلقين على ضهرهم شنطة فيها اللاب توب بتاعهم، ومتسألنيش ليه مش حاطين الكتب في الشنظة لاني معرفش.
محسن القليوبي لازم لما يتكلم ينظر، تحس كده وهو قاعد على القهوة البلدي بيضرب القهوة في كوباية طبعا، انه واقف على مسرح بيخطب في المعجبين، ولازم يستشهد في كلامه بأراء فلاسفة وكتاب مشاهير، وياسلام لو اتريق على رأي واحد فيهم بس علشان يأكد للمستمعين ان عنده وجهة نظر.
محسن عادة مبيبقاش في جيبه اكتر من 3 جنيه، بيدفع بيهم حق القهوة، اللي هو اتنين جنيه ونص، ويروح بالنص جنيه اجرة اي توك توك.
من مستلزمات اي محسن برضو مزة من مزز وسط البلد، اللي هما برضو بيشبهوا بعض كتير، جينز وكوتشي وشعرها لاماه ببندانه، وعلى كتافها شال علشان القضية الفلسطينية، وطبعا بتشرب شيشة، محسن بيشرب سجاير برضو بس حسب الظروف، مصري مستورد مش مهم، المهم انه ينفخ الدخان في وش اللي بيكلمه.
محسن واحد من مئات المحاسن، قصدي المساوىء بتاعة مدعين وسط البلد، اللي عمق ثقافتهم ميزيدش عن رغيف كايزر، حافظين كام كلمة وبيرددوها من غير فهم ولا معنى، معارضين كل شىء حتى وجودهم.
لو حصل وشفتوه يوم في الأيام، متحاولوش تقنعوه يسرح شعره، ولا يغسل بنطلونه.
بس نادوا عليه بصوت عالي وقولوا يا أليووووووووووووووووبي

15‏/08‏/2011

خالد زكي

برنامج "ولاد الحرام مسابوش لولاد الحرام التانيين حاجة" راديو ميجا اف ام 92.7 ’ رمضان 2011



خالد زكي.. الشهير بـ"بعلزبول"، وبعلزبول دي يعني ابن الشيطان، بس ده كان وهو صغير، لان خالد بعد ما كبر قدر يثبت ان الشيطان نفسه مبقاش شاطر، لا ويمكن كمان يطلع معاش قريب.
خالد بيحب أي حاجة غلط، أو شمال يعني زي ماهو بيقول، يعملها من غير مايفكر، وعنده قدرة كمان يخللي اللي حواليه يعملوها وهما مقتنعين، لدرجة ابليس يا جماعة شخصياً كان بيكلمه يستشيره في حاجات كتير، وخالد لأنه مجدع وصاحب صاحبه بجد، كان بينصحه بكل اخلاص.
حتى زي اليومين دول في رمضان وابليس متسلسل في جهنم، بيبقى عامل حسابه وسايب لخالد ليستة بالحاجات اللي مخلصتش علشان يعملها مكانه، ولما بيرجع في العيد مبيسألوش لأنه متأكد ان خالد اكيد عملها احسن منه، ثقة متبادلة بين الاتنين.
خالد اساساً بيشتغل سلزجي، اه سلزجي يعني سيلز مان، مبيعات يعني بس هو بينطقها كده، وعلشان امكانياته المذهلة في الشيطنة يقدر يبعلك بيتك مرتين وتلاتة، رغم انه اصلا ملكك،ويبقى كمان عاجبك السعر وعايز تزودله بعلزبول ياجدعان.
ولكن برضو لانه في الاساس بني ادم، فميخلاش من كام حاجة حلوة، مثلاً يعني أي سفرية للساحل متحلاش من غيره، أي عطاية كده عطاية كده يا سلام لو هو فيها، النفسين من غيره ولايسووا.
خالد علامة مميزة حيفتكرها التاريخ لان زي ما كلنا عارفين ان اسلحة الشيطان في الاغراء تلاتة و هما الفلوس والستات والكيف زاد عليهم اليومين دول السلاح الأهم اللي هو خالد زكي.
اللي قبل ما تفكر في يوم انك تعمل حاجة شمال غلط يعني ، حتلاقيه واقف جنبك بيساعدك بس انت قرر وانوي وسيب الباقي عليه.

14‏/08‏/2011

حسني مبارك

برنامج "ولاد الحرام مسابوش لولاد الحرام التانيين حاجة" راديو ميجا اف ام 92.7 ’ رمضان 2011



فلان الفلاني... السن كتيييير تقريبا كده معدي التمانين، لا بيفهم ولا عايز يفهم، يمكن بحكم السن، ويمكن بحكم الغرور المهم انه دايما راكب دماغه والسلام.
فصيلة دمه ميم، ولما سألنا عليها الدكاترة قالوا يعني مفيش، مواصفاته ايد طويلة وضنير معدوم
بس الحقيقة هو عنده هوايتين كل واحدة فيهم اغرب من التانية، الهواية الاولى انه يبني كباري، في كل تقاطع، أو ميدان عمل كوبري، ولما سالنا دكاترة علم النفس قالوا ده دليل انه اتحرم يلعب بالميكانو وهو صغير، وزي ما احنا عارفين عقد الطفولة بتأثر فينا لما نكبر.
الهواية التانية الكراسي، واقع في غرام كرسيه، لدرجة انه لزق عليه سنين،وبيقول اسطوات النجارة عن الهواية دي ان اللزقة دي ميكفيهاش ولا ألف كيلو غرة، أما أصحاب المكتبات فبيقولوا انه علشان اللزقة دي كان محتاج يستورد كل انتاج العالم من الصمغ ييجي عشر سنين.
سمعه ضعيف، مبيسمعش غير نفسه، نظره اضعف من سمعه، فمشافش اي حاجة صح، اما احساسه فشبه معدوم علشان كده كان مستحيل يحس باللي بيحصل حواليه.
واللي حواليه ما بين قواد وطبال وحرامي، بيلاقي نفسه وسطهم ، وكأنهم بالظبط عصابة مافيا، وبيقول في ده العصبجية القدام اصحاب الخبرة الاجرامية انه راجع لكونه وهو صغير مكانش العيال زمايله في المدرسة بيرضوا يلعبوه معاهم عسكر وحرامية.
كمان وهو صغير المدرس بتاعه قاله والله ما انت نافع، ولما جاب تمانية واربعين في الميه في ثانوية عامة، اتاكد ان كلام المدرس كان صح، والايام بعد كده اثبتت ده جدا.
بصراحة انا نفسي مجبتنيش أقول اسمه في أول الحلقة ولا اخرها، وانتم برضو أكيد عرفتوه، اللي فقرنا وهبرنا وخرب البلد على دماغنا
اقولكم لو مش عارفينه، حتلاقوه في شرم الشيخ

13‏/08‏/2011

هند ياثين

برنامج "ولاد الحرام مسابوش لولاد الحرام التانيين حاجة" راديو ميجا اف ام 92.7 ’ رمضان 2011




هند ياثين، شابة مصرية طموحة جدا، من وهي صغيرة وهي بتحلم تبقى مذيعة، والبنت بصراحة عملت كل اللي عليها، ذاكرت واجتهدت وجابت مجموع دخلها كلية الاعلام واتخرجت وطلعت من الاوائل.
بس هند كان عندها مشكلة واحدة بس، هي صحيح مشكلة بسيطة بس وريتها الويل، المشكلة دي ان هند لذغة في السين اللي بتنطقها ثه، وكمان في الريه اللي بتنطقها لام.
علشان مده مفيش ولا قناة ولامحطة ولا اذاعة ولا حتى كوباية زبادي رضيت تشغلها مذيعة، جابت ييجي فدانين كوسة، علشان تشتغل بس ياحرام منفعش، بس هي عمرها ما يأست.
وفي عز ما كانت الثورة مشعللة ، وهند بتهتف في ميدان التحرير من كل قلبها "الشعب يليد اثقاط النظام" اتعرفت على أحمد ثلي مراسل قناة من قنوات الاخبار الاجنبية، وكيوبيد عمل عمايله وحبوا بعض خلال أيام بسيطة.
أحمد كأي حبيب يعني قرر يساعدها في تحقيق امنياتها، سجل معاها تقرير عن الثورة، اتشاف على اليوتيوب حوالي اربعين ألف مرة في يوم واحد ، كسر الدنيا يعني، صحيح الناس كانت بتشوفه علشان تضحك وهند بتقول " حثني لازم يمشي، لو لاجل ياخد قلاله بالتنحي، احنامش حنلوح بيوتنا، لازم يفهم انها ثولة، والثولة دي ثلها لغبة الشعب في التغييل، وشعالها الشعب يريد اثقاط اللئيث".
بس برضه هند مهماش، واعتبرت ده في حد ذاته نجاح لدرجة انها شيرت الفيديو ده عندها على الفيسبوك اكتر من عشرين مرة.
والنهاردة واحنا في الشهر الكريم ده، أحب أقولكم ان هند اشتغلت مذيعة، ايوة هند اشتغلت مذيعة، صحيح بلغة الاشارة للصم والبكم في قناة دينية، بس اشتغلت مذيعة، بس اللي نفسي اعرفه بقى هي لدغة كمان في لغة الاشارة ولا لأ.

سعيد نظيف

برنامج "ولاد الحرام مسابوش لولاد الحرام التانيين حاجة" راديو ميجا اف ام 92.7 ’ رمضان 2011




سعيد نظيف، اللي بمجرد ما بينطق اسمه الملايكة بيكتبوله سيئة علشان كدب، لانه بصراحة لا سعيد ولا نظيف، بس خلينا منتكلمش في موضوع هو ليه مش سعيد، علشان انا مبحبش اجيب في سيرة الناس، خلينا في موضوع مش نظيف ده، لانه تاعبني انا شخصيا ومكرهني ومكره نص شعب مصر في نصها التاني.
علاقة سعيد بالحمام غامضة جدا، وفي المرات النادرة اللي اتقابلوا فيها متفقوش مع بعض، لدرجة ان شركة الميه شكت في سعيد وركبتله تقريبا حسب ما عرفت عداد جديد بيقيس بالفيمو ميه على رأي الدكتور زويل.
ورغم كده عمر فاتورته ما زادت عن تلاتين قرش، انا اتهيألي هو بيكره الميه لدرجة انه مبيشربش كمان.
سعيد بقى موطنه الأصلى مترو الأنفاق، هناك بيلاقي نفسه وسط مئات من الروايح اللي تفتح القلب في عملية قلب مفتوح من الصدمة، بس اللي يغيظ انه عارف امكانياته، فعمره ما فرقت معاه زحمة، لانه اول ما يحس بالخطر وان الناس حتزنقه، هوب يروح رافع ايده ماسك ماسورة المترو، ومصدر للناس باطه اللي هو خط دفاعه الأول، يحصل نوع من الصدمة والرعب لكل اللي حواليه، تخليهم على الاقل يبعد من تلات لخمس خطوات، ولو كان المترو اوسع كانوا بعدوا اكتر.
سعيد طبعا عايش في البيت لوحده، لا حد بيزوره ولا بيزور حد، مين يعني حيستحمله، ولانه ميوعاش على باباه ومامته اللي تقريبا ماتوا هما الاتنين قبل ما يتولد، كانوا لما يسألوه في الفصل نفسك تطلع ايه لما تكبر، كان يسرح بخياله ويرد بكل حب ويقول : شجرة صبار
سعيد ياجماعة عنده مبدأ، أكيد حنختلف معاه فيه، بس لازم نحترمه، فمش لازم لو قابلتوه في الشارع يبان على وشكم القرف، علشان منجرحهوش، وده طبعا حيفرق حسب التوقيت اذا كان شتا ولا صيف، وطبعا الشتا أرحم بكتير.
بس انا نسيت اقولكم حاجة، ان سعيد نظيف المواطن المصري شغال في مرفق تجميل القاهرة.

12‏/08‏/2011

لعنة الفراعنة


مصر دولة عريقة، ليها تاريخ ممتد لاكتر من سبعتلاف سنة، زرع فيها تقاليد كتير زي تأليه الحاكم مثلاً، وده طبعا ميراث أجدادنا الفراعنة، لكن اللي احنا اكتشفنا حقيقته اليومين دول هو "لعنة الفراعنة"، اللي مطلعتش بتموت الناس وتدمر حياتهم لما يكتشفوا ويدخلوا مقابر الفراعنة العظام، لا... دي طلعت لعنة حطوها على كراسي السلطة في مصر.
أيوة لعنة الفراعنة هي لعنة اصابت كراسي السلطة في مصر، فتلاقي المسؤول من أول عضو مجلس محلي لحد رئيس جمهورية يبقى طيب ولذيذ كده قبل مايقعد على الكرسى، تصيبه ياحول الله لعنة الفراعنة يتحول وينسى أول ما ينسى الشعب اللي حطه على الكرسي ده.

الغريب ان الكرسي اللي بيعتبروه في الدول المتقدمة مجرد قطعة من الاثاث، اتحول بقدرة قادر في مصر لحلم، وهدف، وطريقة مثالية لرحلة المليار، وهو ده الفكر الجديد .
لعنة الفراعنة اتطورت في أخر تلاتين سنة علشان متكونش بس خاصة بالسلطة، لا كمان تبقى خاصة بالثروة، وبكده نقدر بكل فخر نواجه العالم كله ونتحدى كل المشككين في اصولنا الفرعونية ونقولهم، احنا المصريين أحفاد الفراعنة العظام والدليل اننا حافظنا على لعنتهم لا وكمان طورناها.

تعالوا بقى معايا نتكلم مثلا عن وظيفة رئيس الجمهورية، بصفتها صاحبة اكتر كرسي اصابته اللعنة دي، واللي سياسيا ودوليا وحتى بتحاليل الدي ان ايه ثبت انه مش أب للشعب، ولا اله مقدس وانه يادوب موظف حكومي بدرجة رئيس جمهورية وظيفته حسب المادة (73) في الدستور انه يسهر علي تأكيد سيادة الشعب‏ ، وعلي احترام الدستور‏،‏ وسيادة القانون‏،‏ وحماية الوحدة الوطنية‏ ،‏ والعدالة الاجتماعية‏ ،‏ ويرعى الحدود بين السلطات لضمان تأدية دورها فى العمل الوطنى‏. وطبعا ده اللي مبيحصلش خالص ولا عمرنا ما شفناه.
بس استنوا كده اتهيألي ان في جزء تاني من اللعنة دي كمان نسينا نتكلم عليها، الجزء اللي بيصيب الشعب بمجرد ما يشوف حد على الكرسي، ويقرر انه يحس باليتم فجأة ويبقى الريس بابا وماما وانور وجدي،لا والمصيبة الاكبر انه ساعات بيعبده، فرعوني فرعوني يعني، بس هواية عبادة الحاكم المرادي مش لعنة، ده اثبات نسب باننا مصريين فراعنة.



11‏/08‏/2011

أحمد عزت

برنامج "ولاد الحرام مسابوش لولاد الحرام التانيين حاجة" راديو ميجا اف ام 92.7 ’ رمضان 2011


احمد عزت شاب مصري طموووح، حاصل على بكالوريوس تجارة زي تمنتاشر ألف واحد بيتخرجوا سنويا، بيشتغل مندوب مبيعات في شركة عطور زيه زي غيره كتير، الفرق الوحيد بينه وبين غيره، ان احمد عنده مشروع شخصي، وبيشتغل على نفسه فيه.
نسيت اقولكم معلومة مهمة، احمد عزت منوفي ، وده في حد ذاته شىء عادي جدا، لكن عند أحمد لا ده شىء مش عادي.
أحمد اللي بيعتبر المنايفة اصحاب دم ازرق ملكي، وانهم كانوا دولة مستقلة من الاف السنين، قبل ما يتحدوا مع مصر ويحكموها، وبان اصول الفراعنة المنوفية اخفاها المؤرخين من الحقد والغيظ على الشعب المختار ده، تديله الحق في يوم انه يحكم مصر.
ايوة بمنتهى الصراحة أحمد بيحلم يحكم مصر، يبقى رئيس جمهورية، ولانه مدخلش الكلية الحربية، رغم انه قدم فيها اكتر من مرة، الا ان الامل ده اتجدد بعد ثورة 25 يناير ومطالبة الثورة برئيس مدني.
احمد ياجدعان مكدبش خبر، اشترى بكل ما يملك حوالي عشرين كتاب ايشى الليبرالية في غياب منظومة العدالة، الاشتراكية الحلم والكابوس، وهاتك يا قراية وتثقيف، ريس برضو لازم يعرف يتكلم وياخد ويدي، ضرب في السريع كورسين انجليزي، يخلوه على الاقل يعرف يقول ويلكوم ان ايجيبت.
اشترى كمان حوالي ست بدل بالتقسيط، وروح البلد طلب من والدته انها تطرزله اسمه على كل بدلة، جاب كل فيديوهات ناصر والسادات ومبارك من على اليوتيوب، وقدر يوصل لاسلوب تعامل الرؤساء في بر مصر، وفهم كويس انه مطلوب جدا انه يسمع بس، وبعد كده كأنه مسمعش حاجة، يعمل اللي هو شايفه، فهم كمان، انه بجنب البدلة محتاج برنامج انتخابي للترشيح، مش مهم انه ينفذه المهم انه يعرف يقدمه، ولانه مقتنع بمبدأ ان اللي بيقول مبيعملش، فالبرنامج فرصة انه يقول علشان ميعملش.
لكن أحمد للاسف عنده مشكلة واحدة، مش مخلياه ينام ولا ليل ولا نهار.
المشكلة دي انه مش المنوفي الوحيد في مصر، وان في اكتر من مليون منوفي ممكن يكونوا بيحلموا نفس الحلم، وانا بما اني انا كمان منوفي، بقوله عندك يا ابوحميد، انا كمان عايز ابقى رئيس جمهورية.
ووريني بقى مين اللي حيفوز.

سيد سلائون

برنامج "ولاد الحرام مسابوش لولاد الحرام التانيين حاجة" راديو ميجا اف ام 92.7 ’ رمضان 2011



سيد سلائون
مواطن مصرى
كتير منكم ميعرفهوش... لا تقريبا محدش يعرفه من اساسه
وانا النهاردة جى اعرفكم بيه
الاسم سيد سلائون .... سيد دى عارفينها انما سلائون ده اسم شهرة جه من مهنة ابوه
والسلائون دى مادة بيدهنوا بيها الخشب وابوه انتحر بشرب كمية مهوله منها
حاجة كده تدهن خشبتين مسرح
السن فشلو فى تحديده ولما غلبوا قالوا معدى التلاتين
الاب متوفى والام شبه متوفيه
يعنى مش ميته لكن باقى فيها نفسين
المهنه ولا حاجة عاطل من ضمن العاطلين
حاسس بسؤال بيتنطط جواكم كلكم
طيب بتكلمنا عنه ليه
ماهو واحد زى الملايين اللى بيمشوا فى الشارع
ومحدش حاسس بيهم
ولا زى ما بيقولوا فى الجرايد احد المهمشين
لكن يا جماعة سيد عنده ميزيتين
انه واحنا صغيرين كان بطل اسطورى بالنسبة ليا
كان بطل الشارع لا قول بطل العالم فى لعب البلى
عمر ما واحد عرف يكسب منه بلية واحدة لدرجة انى فى وقت من الاوقات اتخيلت انه حيشارك ضمن البعثة المصرية فى اولمبياد لوس انجلوس 84
كان عليه مسكة بليه ولا ابوتريكة وهو منفرد بالجون
ولما كبرنا وبطلنا بلى استمر سيد فى رياضته المفضلة
وفضل يكسب بلى اكترواكتر
الميزة التانية ان سيد مختل عقليا ايوه
مختل عقليا ودى حقيقة مهمة قوى لمستقبل سيد
لانها بترشحوا للعب دور مهم قوى فى المستقبل
مش بس مستقبله هو لا مستقبل مصر كلها
وترشحه
انه يكون بطل غلاف لجرايدنا القومية خلال وقت قريب
لما يتم اتهامه مثلا بحريق المسرح القومى
ولا اغتيال فلان بيه المهم ولا جريمة فتنة طائفيه
سيد يا جماعة مشروع نجم
لازم كلنا نهتم بيه
فافتكروا ملامحه كويس
طويل اسمر شعره اكرت عينيه دايما معمصة
وايديه بتوصل لركبه وهو ماشى تقريبا ده سر تفوقه فى البلى
حروفه كلها شبه بعض الالف بالظبط شكل البه
يعنى مش حتفهم منه كلمه وده حيسهل عليه قوى الاعتراف بالجريمة
عرفتوا بقى سيد سلائون
البطل الاوليمبى ونجم المستقبل

10‏/08‏/2011

حمادة رجب

برنامج "ولاد الحرام مسابوش لولاد الحرام التانيين حاجة" راديو ميجا اف ام 92.7 ’ رمضان 2011


حمادة رجب
بقال حتتنا
محدش يفتكر ان ده اعلان مدفوع الاجر لاسمح الله
بس انا لازم احكيلكم عن حمادة
صاحب محل بقالة فى شارع من الشوارع الجانبية فى مصر الجديدة
المحل تقريبا اتنين متر فى تلاته متر
علق عليه يافطة كبيرة كتب عليها اولاد رجب
وتقريبا حد فهمه ان ده انتحال شخصية سوبر ماركت بحالوا
فحط كارتونة بيض دارى بيها كلمة رجب
وبقى اولاد بس
باشوف حمادة يوميا بقالى اكتر من خمسة وعشرين سنة
لكن لحد دلوقتى ما اقدرش اوصف غير نصه الفوقانى لان نصه التحتانى دايما متدارى ورا فاترينة عريضة فيها لبان وبسكوت
ويمكن اشهر حاجة بتميز حمادة صلعته اللى مدياه شكل ستاند من الاستاندات اللى بيعرض عليها بضاعته
الاظرف كمان انه كان من اشد المعارضين للنظام القديم
وكان بيقاومه بطريقة مبتكرة ...انه بيغلى الاسعار تقريبا كل 8 ساعات
الغريب ان حماده عامل للاسعار شيفتات والاغرب ان اهل حتتنا المعارضين بيأيدوه ويشتروا منه
كمان بقى جنب موقفه الثوري ده كان عنده هواية عظيمة، انه
بيغش كمان فى الميزان، اصله مدارى الميزان ورا كوم من علب السمن عشان متشوفش قرايته
وفي يوم من الايام استفزتني الحركة دي وانا باشترى منه تمن لانشون اضربه فى رغيفين كايزر
وروحت قايله يا حمادة القرأن بيقول ويل للمطففين
والمطففين دول اللى بيغشوا يعني فى الميزان
قام ضحك بصوت عالى قوى
ضحكة اتهزت ليها قرعته
وقالى يا حبيبى ده كان ايام ما كان فى كفار
اما هو من حقه يغش فى الميزان
حمادة يا رجب يا بقال حتتنا
وانا باعملك اعلان اهو على ميجا اف ام
بوجهلك نداء انسانى
خلى الاسعار شيفيتن بس لانى مش عارف اكل لانشون
ربنا يخليك يا حمادة

مصطفى كامل

برنامج "ولاد الحرام مسابوش لولاد الحرام التانيين حاجة" راديو ميجا اف ام 92.7 ’ رمضان 2011


مصطفى كامل
لا لا فكركم ميروحش بعيد كده
مش قصدى المطرب العظيم
ولا الزعيم الوطنى اللى متسمى على اسم المطرب
انا قصدى بنى ادم كده زينا عايش معانا وحوالينا
بس هو مختلف
بجد مختلف
لانه مدمن سلف
اه لو مستلفش ممكن يهرش فى جسمه كله
ولانه مؤمن بمقولة السلف تلف والرد خسارة
عمره ما رد لحد فلوسه عشان ميخسروش
لا صديق عزيز عزيز بصراحة
المهنة اشتغل فى اى حاجة ممكن ياخد بيها بضاعة اجلة ميدفعش فيها فلوس
عشان يبيعها ويختفى وصاحب البضاعة ينوبه حرقة الدم
ربنا ادالو موهبة تمثيل لو اشتغل بيها
كان زمانه واخد جايزة مهرجان بنها السينمائى المحلى
يدخل على الواحد من دول يحكيله عن اعماله واستثماراته
ويعمله البحر طحينة
تانى او تالت يوم تلاقيه مربى دقنه اللى بتطلع تقريبا بمزاجه
يقولها اطولى هوب تملا وشه كله مكتئب بقى
ويخش عليك يشتكى نقص السيولة اللى حيخسره وحيخرب بيته
ويميل عليك كده ويقول بكسوف ممكن تسلفنى كذا وان شاء الله بعد بكره تكون فلوسك عندك ....دايما بيقول بعد بكره
وبعد بكره مش حتلاقى حتى طحينة البحر ومش حتلاقيه
نصاب ومحترف
انا شخصيا استلف منى تلت مرات
لا مش عبط منى
مقنع يا جماعة والله مقنع
تخيلوا بنى ادم استلف من اكتر من ألفين بنى ادم تانى
ومرجعش بريزة مش يبقى مقنع
بنى ادم شعاره اقفش فلوسك وبعدين يبقى القطر يدوسك
يعنى ياخد اى حاجة منك ويبقى يحلها حلال
مصطفى كامل
بنى ادم وشه مكشوف
ويمكن من كتر ما كشفه مش باقيلو وش
فاوعى يطلعلك فى طريقك
لانك حتسلفه غصب عنك
وهو مش حيرضالك الخسارة

عمرو عربي

برنامج "ولاد الحرام مسابوش لولاد الحرام التانيين حاجة" راديو ميجا اف ام 92.7 ’ رمضان 2011


عمرو عربي..... لا لا عمروووووووووو ده الاسم اللي هو بيرد عليه، لانك لو قولتله يا عمرو حيعتبرك بتكلم واحد تاني غيره خاااااالص
المهنة بيشتغل وخلاص مش مهم ايه، المهم انها شغلانة ينفع يزوغ منها ساعتين الصبح ويقعد على القهوة، يضرب الفطيرة المشلتتة التمام، وحوالي 12 حجر شيشة.
عمروووو أول مدمن شيشة حقيقي في مصر، بعد ما بيخلص وصلة الصبح بيروح يمضي في الشغل، اللي مش مهم هو ايه،وجري يتغدى في البيت بسرعة وينامله ساعتين ينزل يروح بعدهم القهوة موطنه الأصلي.
اتهيألي كمان حتى وهو نايم بيبقى ماسك في ايده مبسم، لان اللي عرفته من تاريخ العيلة انه مكنش وهو صغير بياخد تيتينة في بقه زي بقية العيال الصغيرين علشان ميعيطش، لا كان بياخد مبسم شيشة حقيقي.
المهم انه على المغربية كده يكون مشرف على القهوة، واخد الشيشة بالحضن، لحد واحدة بالليل، ويقضيها بقى اما طاولة، أو يحلل ماتشات، مش مهم ، المهم ان الشيشة متفارقش بقه.
بس من كام يوم ياعيني درسه كان واجعه، ووشه ورم خالص لدرجة انه بقى تقريبا عنده وش تاني، بقه مبقاش بيتفتح ومحتاج اجنة يتفش بيها، كلنا ساعتها قولنا ده مش محتاج دكتور اسنان، ده محتاج واحد عجلاتي.
لكن عمرو مكنش فارق معاه حتى الوجع، وكان بيصرخ واحنا بنحاول نوديه المستشفى ويقول ودودني على القهوة، انا عايز اروح القهوة.
وفي الاخر هو اللي كسب ورحنا القهوة الاول، مسك لي الشيشة بايده والدمعة حتفر من عينيه، وقعد يدور على فتحة بقه في الوشين اللي بقوا عنده، واضطرينا نشده رغم تأثرنا بالموقف العاطفي في مشهد زي مشهد محمود المليجي في نهاية فيلم الأرض بالظبط.
وبعد ما خلصنا عند العجلاتي، قصدي الدكتور، وبعد ما عمرو ووو شال الخراج، عزمنا كلنا على زبادي بالفواكه في القهوة اللي قدام المستشفى، وهو حاضن الشيشة وبيقول، حد فيكم معاه فلوس يدفع الحساب.

هايدي

برنامج "ولاد الحرام مسابوش لولاد الحرام التانيين حاجة" راديو ميجا اف ام 92.7 ’ رمضان 2011


هايدي، اه والله العظيم هايدي،بس اصحابها بيدلعوها يقولولها يا "هاي" ، الاسم تقيل يا جماعة برضو عليهم.
هاي بقى طالبة في الجامعة الامريكية، طالبة شاطرة جدا على فكرة، بس عندها مشكلة ضخمة جدا مبتخليهاش تعرف تنام.
كل واحد مننا ياجماعة فيه اللي مكفيه، ربنا يكون في عونها وبعيد عن السامعين يعني الشر بره وبعيد، مفيش اي لينير ولا ماسكارا بتستحمل دموعها، كلهم بينزلوا ساعة العياط وبيبقى شكلها مبهدل خالص، وهايدي اللي هي "هاي " يعني دمعتها قريبة، انهارت مثلا يوم الحلقة الاخير لاوبرا وينفري، مهانش عليها وداع اوبرا، بكت بالدموع جدا في حلقة فريندز اللي اتطلق فيها روس وراشيل ، وقعدت ياحرام 3 ايام مبتاكلش.
البنت حساسة بزيادة، مشكلة الاي لينر، والماسكارا قلبت حياتها جحيم، حاولت بكل الطرق ودورت في كل مكان لحد ما "سو" صاحبها الانتيم اللي هو اسمه احمد السوهاجي اصلاً ما قالها انه كان في بيروت الويك اند اللي فات مع صاحبتهم سوشي واشترت قدام عينيه ماسكارا ووتر بروف.
هاي عملت اللي عليها و خدت سو بالحضن، وفي اول ويك اند كانت في بيروت بتشتري الماسكارا الووتر بورف، ومنسيتش طبعا تجيب هدية ل"سو" اللي حل مشكلتها، نص دستة بوكسرات من النوع اللي بيحبه.
بس للاسف لان "هاي" مش محظوظة، وحظها في الدنيا قليل، لما روحت عرفت من بواب الفيلا بتاعتهم ، ان اخوها "ديدي" عمل حادثة بعربيتها وهي مسافرة، وانه في المستشفى دلوقتي.
ولان "هاي"حساسة جدا و بتموت في اخوها الصغير، اصرت قبل ما تجري تروح للمستشفى تطمن عليه، انها تحط الماسكار الجديدة، علشان تجرب تعيط براحتها على اخوها، وبالمرة كمان على عربيتها.

09‏/08‏/2011

أنصاري

برنامج "ولاد الحرام مسابوش لولاد الحرام التانيين حاجة" راديو ميجا اف ام 92.7 ’ رمضان 2011



انصارى
الشهير بفيس
شاب مصرى
عمره تقريبا اربعة وعشرين سنة
بيشتغل فى السياحة
بس بجد انصارى مثال حقيقى للشاب المصرى العصري
قلت اقدمه عشان ميبقاش كل واحد قدمته كان مثال سلبي ولا حاجة، خاصة بعد دور الشباب العظيم في ثورة 25 يناير، واللي أنصاري عمره ما كان واحد منهم
وعلشان كمان محدش يقول اني جي أشوه سمعة الناس كلها
اخترت انصاري ك مثال ناجح لشاب بيشق طريقه واقدمه
صحيح هو بيشتغل بالعافيه وبالزق بس بييشتغل
بيشرب سجاير وايه يعنى هى جت عالسجاير
كسلان جدا لدرجة ان اهله سابوه فى البيت تلات ايام رجعوا لقوه على نفس الكرسى
ونفس القعدة وبيتفرج على التلفزيون وقرب يموت من الجوع والعطش
لكن يعنى ده احساس بالثقة فى النفس والتعالى عن الصغائر
مرتبه بيخلص يوم 2 فى الشهر
وايه يعنى راجل فييس
عينه زايغة ومضيع فلوسه علي صحباته
رائع ده يطمنا على شباب المستقبل
مش فاهم حاجة من اللى بتحصل حواليه خالص
ويمكن كمان مش واخد باله
الله عليك يا ابنى بجد قدوة
ممكن ينام خمس ايام متواصلة
يبقى مؤمن بشعار ان الراحة عبادة
معندوش طموح ومش فارقة معاه
ده لان نظره بعيد وفاهم اللى فيها
ياجماعة انصارى من هواة الكرسى العالى
راجل رياضى رفع كل بارات وسط البلد ومصر الجديدة
بس فيه عيب واحد بس
حاقوله عشان اثبتلكوا ان مفيش حد كامل وزي ماقالوا زمان الحلو مبيكملش
انصارى للاسف
بيتكلم فرنساوى
تخيلوا بيتكلم فرنساوى
بس احنا كمان لازم نسامحه
لانه مثل وقدوة
ونشكر ربنا ونطلب رحمته ان مصر
لسه فيها شباب زى انصارى

بــوجي

برنامج "ولاد الحرام مسابوش لولاد الحرام التانيين حاجة" راديو ميجا اف ام 92.7 ’ رمضان 2011



بوجي،بالوظة ، فيشو دي اسماء الدلع لبني ادم زينا تمام، يمكن ميشبهناش قوي لانه يشبه سيخ الشاورمة اكتر ، ويمكن كمان ألذ من الشاورمة، ، لكن برضو بني ادم بس موهبته وميزته الأساسية هي الفشر، ومن هنا جه دلع فيشو، لانه صعب جدا يتكلم تلات كلمات ورا بعض، ميكونش في نصهم فشرة، لدرجة ان نص اصحابنا ميعرفوش لحد دلوقتي مين ابوه وامه واخواته الحقيقيين، انا شخصيا اكتشفت ان في 3 اصحابه فاكرني أخوه، وقال ايه اتأكدوا لما لقوني بحب الشاورمة.
المشكلة الحقيقة بقى في التعامل مع بلبل هي الازمات اللي بيمر بيها، مبتبقاش عارف كصديق المفروض تقف جنبه وتساعده، ولا تعتبر المشكلة اللي بيحكيهالك فشرة جديدة، وهاتك يا افيهات عليها، وده طبعا بيجرح مشاعره لو كانت المشكلة حقيقية، بس الحل اللي اتوصلناله بعد شوية، انك لما يحكيلك مشكلة تسكت خالص، وتقوم متصل بصاحب مشترك بينكم، تخلي بوجي يحكيله المشكلة من اول وجديد، ،وهو غالبا و عمره ما حكى حكاية مرتين زي بعض، فده حيخليك تكتشف اذا كان بيفشر ولا بيقول الحقيقة، وغالبا حيطلع بيفشر.
لكن بصراحة اخر مرة كان شكلي وحش قوي، لما قالولي ان بوجي رجليه اتكسرت في الثورة، قلت ييه فشرة جديدة، من امتى يعني وبوجي بتاع ثورات، واكتشفت بعد عشر ايام ان فعلا رجليه كانت مكسورة.
اتكسفت قوي من نفسي، رحت واخد بعضى وجريت على بيته، اللي يارب يطلع بيته، وهناك سمعت قصة كسر رجله مرتين مرة منه ومرة من ابوه، مرة يوم جمعة الغضب ومرة يوم جمعة الرحيل، وهناك قابلت عم حنفي جاره اللي هو كمان كان بيزوره، اللي ياحرام وهو ماشي كان بيعتذر جدا لبوجي وابوه، انه خبطه بالعربية وهو بيركن، لما بوجي كان واقف تحت البيت قال ايه بيحكي للجيران عن ذكرياته قدام جامع مصطفى محمود.

تانت نعمات

برنامج "ولاد الحرام مسابوش لولاد الحرام التانيين حاجة" راديو ميجا اف ام 92.7 ’ رمضان 2011



تانت نعمات، اول ست في العالم تدخل جوزها موسوعة جينيس للارقام القياسية لأنه نجح وبعون الله وحده انه يخلف منها ولد رغم انها أرجل منه.
وتانت نعمات مش بس أرجل من جوزها لا دي من أرجل من رجالة كتير، لدرجة انها تم اتهامها تلات مرات بالتزوير في أوراق رسمية، لان الموظفين اللي شغالين معاها اتهموها بكتابة انثى في البطاقة على سبيل التزوير يعني.
من طفولتها وهي كده راجل لااجل يعني لدرجة ان البنات في الفصل في ابتدائي كانوا بيتكسفوا يقعدوا جنبها، ولا حتى كمان يلعبوا معاها، خاصة وهي كابتن فريق الكورة بتاع فصلها، أما في الجامعة فالكل كان مستنيها تتخرج وتخش الجيش يمكن يهدي طبعها شوية، بس للاسف تانت نعمات كانت وحيدة فمدخلتش الجيش.
امها وابوها طبعا يأسوا انها تتجوز ولا يتقدملها بنت الحلال، قصدي ابن الحلال وماتوا بالقهرة، لكن ده حصل لأن في عرسان مبدأهم قعدة الراجل بميت ست.
واتجوزت نعمات، ورغم اللخبطة اللي حصلت في الفرح، وعجز المأذون عن معرفة العريس من العروسة الا ان الجواز تم، لا وايه كمان خلفت، وده طبعا خلى كل اللي يعرفوها يضربوا كف بكف وهما بيقولوا سبحان الله، زمن المعجزات منتهاش.
بس تانت نعمات رغم ده كله متخلاش من لمحة انوثة، بس بتعتبر ده سر من أعظم أسرارها، ومبتجيبش سيرته لاي حد ولا حتى ابوها وامها قبل ما يموتوا، السر ده ان تانت نعمات بتموت في حاجة اسمها رشدي اباظة، لا وايه كمان بتعتبره مثلها الأعلى في الحياة لدرجة انها حاولت تربي شنبها زيه قبل كده بس معرفتش.
تانت نعمات ياجماعة راجل راجل تقدروا تعتمدوا عليها في اي وقت


30‏/07‏/2011

وهابية وهابية... في وصف محمد بن حسان

أخذ الرجل يعبث في لحيته البيضاء وهو يتأمل أركان بيته الطيني البسيط في قرية "دموه" مركز دكرنس بمحافظة الدقهليه، وأثار انتباهه ذلك الشرخ في حائطه الأيمن والذي منعته ضائقة ذات اليد من إصلاحه خاصة بعد عودة ابنته الى البيت مع صغيرها ذو السنوات الثلاث.
أخرج صراخ الطفل الشيخ من تأملاته، وأسرع ناحيته متحملاً على الرغم من سنوات عمره الكثيرة اداء دور الاب الذي غاب، والذي لا يطيقه سنه خاصة مع هذا الطفل اليتيم الذي لا يلاعب حتى اقرانه في حارات القرية ويكتفي بالانزواء على "مصطبة" الدار وحيداً مستوحشاً.
*****
وفي صباح أحد تلك الايام الصيفية الرطبة، حين يكسو القرية ضجيج دورانها اليومي، اصطحب الجد حفيده الى "كتاب" القرية، حالماً بأن يزيد هذا التعليم من اندماج الفتى مع اقرانه، إلا أن الايام زادت في انعزال الفتي الذي حفظ القرآن كاملاً في 4 سنوات، لينبهر الجد بحفيده وينسى رغما عنه أنه طفلا لم يمارس طفولته يوما.
وتسحب الأيام بعضها بعضاَ ليقوم امام كتابه بتحفيظه متن أبى شجاع فى الفقة الشافعى و بعض متون العقيدة، ويساهم جده من خلال مكتبة مسجد القرية بتحفيظه كتاب رياض الصالحين.
ويلزم الطفل الذي بلغ 13 عاما منبر المسجد في قريته ليخطب الجمعة كل اسبوع، اعتمد خلالها على قدرته الفائقة في الحفظ مما اثار اعجاب الكبارن الذين ملوا ذلك الشيخ ذو الورقة المكتوبة والذي يعيد الخطبة ذاتها عدة مرات خلال الشهر الواحد، وتواصل الايام مرورها وينتقل الطفل الى مرحلة الشباب ويجتاز سنواته الجامعية في يسر ليتخرج من كلية الاعلام.
وتبقى أمنية جده الذي رحل منذ سنوات في أن يصير الحفيد شيخاً، وتبقى نظرة الانبهار في عيون مستمعي خبته تثير لديه شغفا، خاصة بعد أن أجبرت مكانته الدينية في القرية كبارها على أن يعاملوه بطريقة مختلفة عما كان جده يعامل، حيث يعتبر أعيان القرية وصفوتها رجل العالم على نفس المقدرة بغض النظر عن بساطة حاله، أو وا يملكه من الأرض، فيقرر الحفيد الالتحاق بمعهد الدراسات الاسلامية .
الا أن الظروف لا تمهله لينال شهادة دينية تدعمه في تحقيق حلمه ليصير شيخا جليلا، حيث يتم استدعائه للخدمة العسكرية في منتصف الثمانينيات، فيقوم خلالها باداء نفس الدور الذي اداه من قبل في قريته، لتنتهي الخدمة ويبقى هو في نفس المدينة ، مدينة السويس خطيباً لاحد جوامعها.
******
حتى مساء ذلك اليوم الذي أنهى فيه الشيخ الصغير صلاة العشاء في نهاية ثمانينيات القرن الماضي، وهو يستعد للعودة الى تلك الغرفة الصغيرة التي يسكنها خلف المسجد، معتمدا على ذلك الراتب القليل الذي يتلقاه نظير امامته للمسجد في تصريف شئون حياته البسيطة، ليجد من يطلب منه البقاء في المسجد، وخلال ساعات قليلة كانت هي عمر اللقاء بين الشيخ الشاب، وصديقه الشيخ الكبير الذي تعشقه مدينة السويس بالكامل وذلك الشيخ البدوي ذو اللهجة الخليجية، اقتنع صاحبنا بالسفر إلى المملكة السعودية ليعاود تلقى العلم مع راتب يسيل له اللعاب.
*****
سافر الشيخ إلى الرياض و تولى مسئولية مسجد الراجحى بمنطقة الربوة مواصلا تلقى العلم على يد الشيخ أبو صالح سليمان الراجحى، قبل أن ينتقل للدراسة على يد الشيخ عبد العزيز بن باز امام المذهب الوهابي، وقائد جماعة الامر بالمعروف ، ومفتي المملكة السعودية صاحب الاراء الحادة الشديدة التطرف, فسمع منه كثير من الشروح مثل شرح فتح البارى و النونية و الطحاوية و الواسطية و فى الفقة و أصوله و كثير من الشروح.
وبعد هذا كلفه مكتشفه الشيخ سليمان الراجحى بالإنتقال الى مسجده بالقصيم, و فى إفتتاح أحدى المشروعات و بحضور أكابر العلماء فى المملكة كلف الشيخ سليمان الشيخ محمد بالخطابة أمام كم كبير من أكابر العلماء, و قام بعد الخطبة الشيخ عبد الله بن منيع بتكليف من الشيوخ الإجلاء بمنح الشيخ محمد حسان شهادة الدكتوراه.
ليحصل الشيخ الشاب على شهادة دكتوراه على الرغم من أنه لم ينل حتى الماجستير، وعلى الرغم من أنه لم يدرس الفقه والشريعة في أي كلية معترف بها ليكلف بعدها بالتدريس فى جامعة الإمام محمد بن سعود الإسلامية فرع القصيم كليتى الشريعة و أصول الدين, بتزكية من شيخ شيوخ الوهابية محمد بن صالح العثيمين, بتدريس مادة الحديث و مادة مناهج المحدثين و مادة تخريج و طرق الحديث، ليعود بعدها الشيخ الشاب بعد ان تخطى منتصف الثلاثينيات في نهاية تسعينيات القرن الماضي الى وطنه، بعد أن تغير وضعه المادي، وتغير شكل الحلم الذي حلمه الجد ذات صباح ، لم يتغير مظهره لانه حفيده سيبقى شيخاً، ولكن تغير مضمونه لان هذا الحفيد سيواصل الدعوة للمذهب الوهابي، وليس الي ذلك الدين الحنيف الذي عبر عنه الجد من خلال تحفيظه للصبي كتاب رياض الصالحين.
******
وخلال سنوات قليلة ذاع صيت الشيخ الشاب، ومن خلال من سبقوه من شيوخ نفس المذهب في مصر والذين تستروا تحت اسم براق بديلاً لشيوخ المذهب الوهابي ، ليطلقوا على أنفسهم " السلفيون"، صار احد أئمتهم، الذين يسعون خلفه ويشدون الرحال الى ذلك المسجد الذي يخطب فيه أياً كان مكانه.
ومن خلال تواجده في مسجد "العزيز بالله" أكبر تجمع للشباب الذي وجد في هذا المذهب نفسه، فأطلق ذقنه التي لم تتعلم حتى بعد كيفية الخروج، وارتدى ما قصر من جلاليب بيضاء، ونقل ساعة يده الى الجانب الأيمن، معتبرين الشيخ الشاب مثلهم الاعلى، خاصة مع كبر سن كل الشيوخ الذين سبقوه، والذين بدأوا التبشير الوهابي الخليجي منذ بداية عصر البترودولار في نهاية السبعينيات، ليقود وحده بمعونة نفس السلاح البترودولاري تجديد المذهب والدعوة اليه.
*****
ومع بزوغ شمس الألفية الجديدة، ومع انتقال الاعلام الى عصر الفضائيات، ينتقل شيخنا لمرحلة جديدة، يصير خلالها مقدما لبرنامج في قناة دينية متخصصة، قبل أن ينشأ ذلك الشاب الذي تخطى الاربعين ببضع سنوات قناته الخاصة "بماله" الخاص ليزيد المريدون، ويزيد الأتباع .
يدعو الشيخ دائما من خلال دروسه إلى الحجاب، الى فضيلة الطهارة، المواظبة على الصلاة في المسجد، الزكاة، المظهر، حريصاً كل الحرص طيلة سنين طوال على عدم الخوض في سياسة البلد، حتى أنه عندما ضيق عليه ذات يوم ليقول رأيه دعا للرئيس المخلوع مبارك موافقاً اياه على حصار المسلمين في غزة، محافظا على نفسه وعلى قناته، الى ان صدر قرار باغلاق القنوات الدينية في نهاية عام 2010، فخرج الشيخ مباركا ومهللا على منابر المساجد التي يخطب فيها.
******
ومع اندلاع ثورة الخامس والعشرون من يناير حرص الشيخ على تطبيق مبدأ مذهبه الأعظم، ألا وهو تكفير وتحريم الخروج على الحاكم، لدرجة ان الشيخ وجدي غنيم المطرود خارج مصر اتهمه بعد ذلك بالنفاق وركوب الثورة حيث اتهم غنيم حسان بالتناقض وركوب موجة الثورة ، ومهاجمة الثورة قبل انتصارها بأيام قليلة، وبعد نجاحها أيدها ونزل ميدان التحرير .
وأضاف الشيخ غنيم ان حسان أوقع نفسه في مشكلة كبيرة مع شباب الثورة ، وأكد انه يحب محمد حسان ولكن الحق احق أن يتبع .
واضاف غنيم أنه حتى هذه اللحظة لا نعرف موقف حسان من المظاهرات ، لقد أخرج بيان موجه إلي الثورة وحملهم التخريب الذي حدث ، أليس من باب أولى ان يوجه البيان إلى الداخلية وأعوانها في الأساس .
واضاف ان تناقضات السلفية كبيرة ولا نعرف موقفه من التيار السلفي الذي كان يحرم الخروج على حسني مبارك ، ويعتبر المظاهرات حرام .
وذكر غنيم ان حسان قال عن وزير الأعلام الأسبق أنس الفقي بالنص " الأخ أنس الفقي " وأشاد به في أكثر من موقع ، رغم انه لا يقبل به وبمظهره الملتحي ،وقال غنيم عن حسان " لقد كثرت تناقضاتك يا مولانا"
وتابع غنيم ان من اخطر وأعظم هذه التناقضات من وجهة نظره موقف حسان من معمر القذافي الرئيس الليبي والذي ذهب إليه مرتين في ليبيا وقابله رغم أنه ينكر سنة النبي محمد، ويقتل العلماء هناك ، ويعد بذلك كافرا" علي حد وصف غنيم له " ويجب الخروج عليه .
ووجه غنيم اللوم الى حسان ، في عدم قيادة الاخير للمظاهرات ، وقال غنيم انه لو كان موجودا في مصر ولو لم يكن محكوما عليه بالسجن لنزل الى ميدان التحرير مع المتظاهرين .
الا أن الشيخ الشاب قد أتقن هذه المرة اللعبة، وقرر أن يستفيد بهذا الزخم التى يحيط بالحرية في مصر، وقرر الدفع بكل اعضاء التيار الوهابي المسمى بالسلفي، ليتركوا بيع "الهريسة" التي باعوها لاعوام طوال ليقل احتكاكهم مع المجتمع الكافلا وتجارته وناسه الى الوسط السياسي، وليقرر السلفيون بقيادة مجدد دعوتهم الذى صار على اعتاب الخمسينيات استعراض قوتهم في المجتمع.
يقودهم هذا الشيخ العلامة الذي لم يدرس العلم في كلية ولا جامعة الذي يذكرنا بمقارنة بين العالم الأزهري والعالم السلفي والتي وردت على لسان الشيخ على جمعة حين قال"الشاب من دول حيتعب نفسه ويدخل الازهر يقعد 4 سنين وبعدها ياخدله ست سنين ماجستير ودكتوراه يعني 10 سنين علشان يبقى شيخ، وهو ممكن يقراله كتابين في اسبوعين ويبقى شيخ سلفي" ولا يقعد كام سنة في السعودية يا شيخنا وياخد دكتوراه الشيخ عبد الله بن منيع.
*******
الشيخ الشاب الذي شاب بعد أن تجاوز حتى حلمه، وصار الحلم القديم متواضعا أمام ما حققه من مال وجاه، ينفذ وعن قناعة ذلك المخطط السعودي لوأد الثورة في مصر، ويمنح المجلس العسكري الفرصة ليثير خوف امريكا من سيطرة التيار الاسلامي على مصلا لتدعم بقائه.
الشيخ محمد حسان الذي لم يمارس السياسية طيلة 48 عاما،والذي - على حسب قوله - تستقبله السعودية رسميا وتنتظره السيارة تحت الطائرة؟
قرر فجأة أن يكون زعيما، الشيخ الذي هاجم الثورة يتحدث عن انحراف الثورة عن اهدافها،الشيخ الذي ترك يوما بيته المبني بالطوب اللبن ليدخل الجيش صار شيخاً مليونيرا من خلال الدعوة، أو كما فال المثل الشيخ الوهابي ان تاب .....


27‏/06‏/2011

في وداع جزمة


جزمة مقطعة
تمام زيى أنا .... رسم عليها تراب الطريق ميت ألف تجعيدة
ياما خدتنى وراحت فى الزحام ,, مشاوير بعيدة
وفى النهاية تترمى جنب السرير .. منهكة ...
لكن سعيدة

................................................

من كام سنة صاحبت خُطايا
مرة فى خير
مرااااااااات خطايا
لا عمرها يوم اشتكت
لكن بكت على صوت بكايا
على أهه منى على تنهيدة


.................................................

والنهاردة ميعاد طلوعها عالمعاش
مش باقى من نعلها حتة قماش
حتى رباطها اللى اتلضم ميت مرة باش
لكن سؤال واجعنى الليلة عاش
هى ديا المجدعة
انى ارمى جزمة مقطعة
دابت عشانى
عشانى أنا
يا مشاعرى البليدة

21‏/06‏/2011

طل ماتت


طل ماتت
أيوة ماتت, لما حاكم افتكر نفسه الاله
قرر الحاكم قدرها
ازاي تعيش ...بعد ما فكرت تعبد سواه

***
عمرها تسعتاشر سنة... بس ده مش مبرر
اللي فكر قد جنى... وجنايته انه بس فكر
ازاي بتطلب اصلاحات..هو الاله عمره قصر
ازاي بتطلب ديمقراطية.. طب كانت تفسر
العروش في بلادنا.. في السما مين بس يقدر
يطلب منها كرامته.. من غيرى ما يحني الجباه

***
بشار سجد له شعب سوريا... بس طل كانت ابية
في شرع بشار "الأبية" هي القضية.. هي الغبية
وعشانك انتي يا بلاد الشام ما يعيش غبي
بشار خلص عالصبية
بشار وصل الكرسي لغاية منتهاه

***
طل ماتت يا بلاد مفيهاش دكر
كلمة الحق البريئة اترمت في عذاب سقر
بس مين يوم يفتكر
البوعزيزي يوم ما انتحر
شعوب العرب عرفت معنى الحياه

04‏/05‏/2011

هذه ليلتي


مللت الكتاب الذى فى يدى فنحيته جانبا وتأملت الغرفة من حولى .....هذا الفراش العتيق الذى فقد لونه فصار عجوزا وحاشيته المتموجة من فعل الزمان ،تلك الخزانة التى فقدت ابوابها كما يفقد العجوز اسنانه، أيضاً ذلك الطلاء الحائل اللون الكالح بفعل الرطوبة.
ضحكت من نفسى لانى جعلت من هذه الغرفة فى هذا البنسيون الحقير نقطة انطلاقى للهجرة خارج الوطن خلال اختباراتى فى تلك السفارة الاجنبيه .
نقطة انطلاق من القاع الى القمة ............................
بدأ النوم يغزو عيناى، فقمت بهدوء لفتح النافذة حتى يجبرنى هواء ليل القاهرة الشتوى البارد على الاستيقاظ.
وألقيت نظرة على شوارع عاصمتنا المهزومة وتمثال رمسيس الاسير الذى يظهر من بعيد .
ولمحت غطاء عسكريا اسود يغطى جسدا ضئيلا فى احد اركان تلك الشوارع فنفثت دخان سيجارتى فى ملل.
ألقيت نظرة اخيرة على الغطاء الذى بدا من يرتجف وأغلقت النافذة لامنع الضيق من التسرب الى روحي.
* * *
وبعد اعواما طويله فى اول عودة لى لقاهرة المعز اسرعت مغادرا المطار ودون انتظار ركبت سيارة اجرة لتطير بى على محطة القطار لاسافر الى بلدتى وحضن امى الدافىء الذى افتقدته كثيرافى ليالى الغربه.
وهناك فى ميدان رمسيس تذكرت لا ادرى لماذا تلك الليله، وذلك الغطاء العسكرى الاسود فألقيت نظرة حولى، فوجدت غطاء اخر يشبه غطاء ليلتى تلك ولكنه يغطى اكثر من جسد، وتلفت حولى فرأيت الكثير والكثير من تلك الاغطيه تفترش ارصفة الشوارع في غياب تمثال رمسيس ، فاشعلت سيجارتى فى حزن.
كتبت في 2009

04‏/04‏/2011

سلفيو اليوم ..... خوارج الأمس!!


التقى الجيشان على أرض المعركة، على بن أبي طالب يقود جيش الحق، ليطالب معاوية بن أبي سفيان الذي يقود الجيش الآخر بالبيعة، والاعتراف بخلافة على بن ابي طالب وإمارته على المسلمين، ويلوح النصر لجيش الحق، حين كان الحق يبذل أخر محاولاته للإنتصار، حين كان مواطناً وليس غريبا طريدا.
يشير عمرو بن العاص لمعاوية برفع القرآن على آسنة الرماح والمطالبة بتحكيمه، إنقاذا لجيش يتمزق وينهزم، فيرفع جيش معاوية المصحف، وتخرج فئة من جيش علي لتجبره على قبول التحكيم، يرفض الامام أولا ثم يضطر للموافقة، وترفض نفس الفئة نتيجة التحكيم الذي قبله علي بن ابي طالب إيمانا بالعهد، ولا تكتفي برفض النتيجة بل تذهب إلى تكفير رابع الخلفاء الراشدين وأحد العشرة المبشرين بالجنة، والطريف أن تلك الفئة التي باعت جيش الحق قد كفرت علي وحاربته بعد ذلك في عدة معارك منها معركة "النهروان" ومعركة "الدسكرة" وغفرت لمعاوية وعمرو، واتخذت لنفسها منهجا وشريعة خاصة، ليعرف فجر الاسلام اول فرقه باسم "الخوارج".
قبل أن تخرج بعد ذلك على الدولة الأموية وتثور ضدها عدة مرات.
وقد قال فيهم رسول الله في حديث ذكره صحيح البخاري : أنه قيل للصحابي الجليل سهل بن حنيف الأنصاري رضي الله عنه: هل سمعت النبي صلى الله عليه وسلم يقول في الخوارج شيئا؟ قال: سمعته يقول، وأهوى بيده قبل العراق: يخرج منه قوم يقرؤون القرآن، لا يجاوز تراقيهم، يمرقون من الإسلام مروق السهم من الرَمِيّة.
وهم الذين حدد الامام على بن ابي طالب معاملتهم بقوله " .. إلا إن لكم عندي ثلاث خلال ما كنتم معنا : لن نمنعكم مساجد الله، ولا نمنعكم فيئا ما كانت أيديكم مع أيدينا، ولا نقاتلكم حتى تقاتلونا "
وهم يشبهون تماما فرقة السلفيين في هذا العصر، الذين خرجوا الأن عن ثورتنا ليطالبونا بالاستماع إليهم بل والانقياد لهم، وإلا كفرونا تماما كما كفر الخوارج كل من خالفهم، وكما باع الخوارج جيش الحق يوما يبيع السلفيون هذه الأيام ثورة الحق في بر مصر لمصلحتهم الشخصية، فيطالبون بالعجيب والغريب من أحكامهم المتشددة التي استوردوها من "الوهابية" في أرض الحجاز ليفرضوا علينا إسلاما ليس لنا، ورحمه الله الامام الشافعي عندما غير منهجه بالكامل ما بين العراق ومصر لان ما يصح في بغداد لا يصح في المحروسة ولا ينطبق، وهذه الميزة المطلقة للدين الاسلامي بصلاحيته لكل العصور والاقاليم.
وكما انشق الخوارج وحاربوا الطوائف وحاولوا تمزيق الدولة الاسلامية، ينقض هذا الفصيل الوهابي من السلفيين الان على الأضرحة وعلى الاقباط لينكلوا بهم ويحرقون مقابر المسلمين محدثين بهذا سابقة ليس لها أي اثر في السلف.
الخوارج يخونون الحق، ويحكمون بما أرادوا، والجناح الوهابي في زمرة السلفيين يخونون الحق ويحكمون بما يريده شيوخ الصحراء الذين قال فيهم يوما الامام الغزالي " اخشى ما أخشاه على الاسلام شيوخ الصحراء" .
أعزائي سلفيو هذا العصر الذين حرموا الخروج على الحاكم في مصر يوما، وحرموا التظاهر يوماً أخر، ثم احتفلوا بنجاح الثورة، قبل أن يحرموا التظاهر في المملكة العربية السعودية - حسب فتوي شيخهم محمد حسان - وكأن الريشة التي على رأس الملك عبدالله تمنحه الحق في الحكم دون إصلاح، وكأنه أفضل من سيدنا عمر بن الخطاب الذي قال له الصحابة يوما " إن أخطأت قومناك بحد السيف".
الخوارج ظنوا يوم خرجوا أنهم سيدخلون الجنة وحدهم، كذلك وهابيو السلفيين يعتقدون أن الجنة حكراً عليهم.
وتبقى في النهاية شهادة أحد شيوخهم عليهم الشيخ "بن باز" الذي قال : بعض تصرفاتهمقلة فهم ؛ لأنهم ما فهموا السنة ولا عرفوها كما ينبغي ، وإنما تحملهم الحماسه والغيرة لإزالة المنكر على أن يقعوا فيما يخالف الشرع كما وقعت الخوارج والمعتزلة ، حملهم حب نصر الحق أو الغيرة للحق ، حملهم ذلك على أن وقعوا في الباطل حتى كفروا المسلمين بالمعاصي كما فعلت الخوارج ، أو خلدوهم في النار بالمعاصي كما تفعل المعتزلة .
ويبقى الفارق الوحيد أن الخوارج خرجوا على كل حكام عصرهم، بينما اتبع السلفيون كل حكام عصرهم مهما كان فسادهم وطغيانهم، حتى قامت الثورة.
حسبي الله ونعم الوكيل فيكم يا خوارج العصر.