تانت نعمات

برنامج "ولاد الحرام مسابوش لولاد الحرام التانيين حاجة" راديو ميجا اف ام 92.7 ’ رمضان 2011

تانت نعمات، اول ست في العالم تدخل جوزها موسوعة جينيس للارقام القياسية لأنه نجح وبعون الله وحده انه يخلف منها ولد رغم انها أرجل منه.
وتانت نعمات مش بس أرجل من جوزها لا دي من أرجل من رجالة كتير، لدرجة انها تم اتهامها تلات مرات بالتزوير في أوراق رسمية، لان الموظفين اللي شغالين معاها اتهموها بكتابة انثى في البطاقة على سبيل التزوير يعني.
من طفولتها وهي كده راجل لااجل يعني لدرجة ان البنات في الفصل في ابتدائي كانوا بيتكسفوا يقعدوا جنبها، ولا حتى كمان يلعبوا معاها، خاصة وهي كابتن فريق الكورة بتاع فصلها، أما في الجامعة فالكل كان مستنيها تتخرج وتخش الجيش يمكن يهدي طبعها شوية، بس للاسف تانت نعمات كانت وحيدة فمدخلتش الجيش.
امها وابوها طبعا يأسوا انها تتجوز ولا يتقدملها بنت الحلال، قصدي ابن الحلال وماتوا بالقهرة، لكن ده حصل لأن في عرسان مبدأهم قعدة الراجل بميت ست.
واتجوزت نعمات، ورغم اللخبطة اللي حصلت في الفرح، وعجز المأذون عن معرفة العريس من العروسة الا ان الجواز تم، لا وايه كمان خلفت، وده طبعا خلى كل اللي يعرفوها يضربوا كف بكف وهما بيقولوا سبحان الله، زمن المعجزات منتهاش.
بس تانت نعمات رغم ده كله متخلاش من لمحة انوثة، بس بتعتبر ده سر من أعظم أسرارها، ومبتجيبش سيرته لاي حد ولا حتى ابوها وامها قبل ما يموتوا، السر ده ان تانت نعمات بتموت في حاجة اسمها رشدي اباظة، لا وايه كمان بتعتبره مثلها الأعلى في الحياة لدرجة انها حاولت تربي شنبها زيه قبل كده بس معرفتش.
تانت نعمات ياجماعة راجل راجل تقدروا تعتمدوا عليها في اي وقت