24‏/09‏/2010

نبــــــــوءة


الراوى

صلوا عالرسول الكريم
حاحكيلكم اليوم اسطورة
عن قلبين فى عز الضيم
قاوموا نبوءة مسطورة

*****


البطل
_______

صهيل الخيل ف قلب الليل
بيعلن عن شروق فارس
ودمعه عين بتسأل مين
لجرحى حزين
ولا يوالس



*****

البطله:
_____

نبوءة زمان ف يوم قالت
صهيل الخيل ف قلب الليل
ميلاد فارس
من الفرسان
قوى وشجاع لكنه حزين

و هيكون قلبه سبب حزنى
و هيكون قلبى سبب حزنه
قدر مكتوب على جبينى و على جبينه
طريق مفتوح لكن نهايته محتومه

فراق ولقا
نعيم وشقا
نبوءة وآن وقت تحقيقها
و لو اقدر محققهاش
و لو اقدر اعاند صوت صهيل الخيل
لو اقدر


*****

البطل
:
_____

قالولى السيف كده نصيبك
ومش مكتوب لقا حبيبك
توديك الدنيا وتجيبك
على الاحزان

قاومت بكل ما املك
نبوءة لابد تتحقق
طريقنا لابد متفرق
بدون عنوان


*****

البطله:
_____


قالولى هتتولدى فيوم لقياه
و هتحسى بإن الدنيا ضحكتلك
و هتحبى و هتغنى و هتطيرى مع النسمات

اميره هتكونى لعرش حبيبك الأبدى
حياتك راح تصير وردى

لكن فى نهاية الرحله
طريقكوا لابد متفرق
نبوءه لابد تتحقق
غمامة حزن هتعشش على قلوبكم
و دمعكوا مش فى يوم هيجف
قدر مكتوب
و مين يقدر فيوم يهرب من الاقدار







****


البطل
______


عينيها كل ما بحلم بتحوينى
هواها براحى يداوى جراحى
يأوينى
اذا كل الدراع يوم او ضاع
تخلينى
فارس من الاحلام

قالولى بعدنا قدرنا
مرسوم الحزن
متوانس بباب دارنا
لا مرة واقفنا او اخترنا
تكون نهايتنا بالايام

حلمنا نكمل للاخر
اتارى القدر منا كان ساخر
حلف يفرق القلبين
والفرح من عمرى بيتاخر

لابد احارب الاقدار
ومين يقدر يحاربها
حاربت الصحرا والامطار
نجوم السما قادر انا اجيبها

لكن دى نبوءة
موبوءة
خلاص
كتبت دواوينها



*****



البطله:
_______


قالولى راح يجوب الارض شرق و غرب
و مش هيلاقى راحته الا فى عنيكى
و هيحارب عشانك الاقدار
و هيجبلك نجوم يغزلها على توبك

قالولى حنان الدنيا فى حضنه
امان الدنيا هتحسيه و دراعاته محاوطينك

راح يقتل الخوف اللى عشش على قلبك
لا من ديب و لا انسان فيوم هتخافى و انتى معاه

حبيبك هو هيكون و هتكونى حبيبه له
و قلبه راح يصير دارك
و حبه دواكى و مرارك


هواه راح يجرى مجرى الدم فى عروقك
هيجتاحك و يسكن جوه جوه القلب
اتنين هتتقبلوا و تتفارقوا بروح واحده

حكولى كتير
و قالولى قدر مكتوب
و مين يقدر فيوم يهرب من الاقدار



*****


الراوى
______

لسه بعيد هما يا سامعنى
بس بيحلموا نفس الحلم


*****






البطل
______

غربتنى الليالى والصحارى
لاحد بيا حاسس ولا دراى
سيف فى ايد والتانية درع
بس جوه قلبى نارى

ميت حرب قول او يزيد
حاربت خضت وهل من مزيد
لو كنت مت
اكيد من جديد
لما اشوفك حبيبتى
اتولد من جديد

بس خوفى م النبوءة
بس خوفى م النبوءة



*****


البطله
_____

ميلاد جديد هيكون
حب و فرح و جنون


روح بتطلع من جوه روح
إنسلاخ..إنشطار..لجل ما تتوحدوا من جديد
على قد فرحة الميلاد ..على قد الوجع

مش عارفه ليه مش خايفه
صوت النبوءه فى ودنى
بيقولى حسبى ماللى جاى
بيقولى اجرى و اهربى
بيقولى حبه هيقتلك
بيقولى حضنه من كتر حنانه هتدفنى فيه حياتك

صوت النبوءه يخوف
وجع الميلاد راح يإلم
بس فرحة اللقا اكبر من كل ده


*****



البطل
_____


ايوه جايلك مهما كان
الخوف يخاف بان الامان
فينوا حضنك من زمان
خلاص فى قلبك حابنى بيت

وعشان بحبك وقلبى عاشق
سهم روحك فى قلبى راشق
وخلاص معاكى ابتديت

نبوءة ايه متخافيش
وانتى معايا جناح وريش
نعلى نونس السما
ميهزمناش ولا الف جيش


****


البطله
_____



سامعه صوته من بعيد
بيقلى اوعى تخافى

حاسه روحه محوطه قلبى
ضحكة عيونه منوره لى زمانى

ميهمنيش لو طرقنا نهايته ضلمه
مدام معاه
ميهمنيش لو الفراق كان قدرنا
يكفينى يوم عشته فهواه

ايوه بحبه
و ليه هكون ونس و بيت
ايوه بحبه
و بيه هطير و معاه هغنى




نبته جميله بتتولد جوه قلوبنا
زرع الهوى فرحه و بسمه فكل ركن
انا و هو بقينا واحد
بقينا اقوى من الف جيش


*****



الراوى
______


الشمس مسيرها ان غابت
تطلع تانى بقلب جديد
بعدوا كتير
وقلوبهم تاهت
بس اتقابلوا بحب كبير


*****


البطل
______

عديت عشانك بحور و جبال

مريت بميت مليون محال

و فضلى ليه نفس السؤال

أشوفك و لا لأ


نصيبى يمكن بس خايف

خايف و لكن قلبى عارف

جوايا ليكى حب جارف

و ليا فيكى الف حق


و قدام عنيكى وقفت حاير

ماسك ايديكى و قلبى طاير

تتغيرى يا كل المصاير

خلاص حبيبى قلبه دق


*****


البطله:
_______

صوت صهيل خيلك سمعته...كدبت ودنى

شفت طيفك جاى من بعيد..كدبت عينى

قلبى رفرف و قال آن أوان اللقا...صدقت قلبى

إنت هنا؟؟

جنبى..جوه عينى فحضن قلبى؟؟؟

إنت هنا؟؟؟

مفيش بحور و لا سدود بينا خلاص؟؟

يعنى خلاص؟؟ معدش فى خوف م النهارده؟؟

يعنى خلاص؟؟ لقيت أمانى؟؟يعنى خلاص أنت بجد هنا؟؟


*****



البطل:
______



و أنا بلمسك و لا ميت نبوءه تصدنى

إنت ليا و أنا ليكى

معادش حاجه تهمنى



*****


البطله:
______

عارف..عدت عليا سنين كتار

كل ليله أناجى نجمى البعيد ..أسئله إمتى اللقا

أقله إنى تعبت و مليت الانتظار

كنت خايفه اللقا يطلع سراب..حلم و خيال

كنت خايفه منتقابلش..كنت خايف متحبنيش

كنت خايفه يوم ميلادى ميتعلنش

كنت خايفه و كنت خايفه

دلوقتى عايزه أصرخ بعلو صوتى و أقول بحبك

أقول إنى ليك و أنت ليا

أقول لخوف السنين اللى عشش جوه قلبى إنه ما عاد ليه مكان



*****


البطل:
_____


غيرت بيكى الأبجديه

علمتينى حروف الحياه

و القصه كانت مبتديه

بحبى ليكى بخوف بأه

بس النهارده هنتولد..هنتوجد

بقلب واحد نفس الهويه


*****



البطله:
______

خد بإيدى و لف بيا بين البحور..بين الجبال..وسط السحاب

علمنى من جديد يبقى ايه طعم العسل..طعم الليمون

علمنى ازاى تدمع العيون من كتر الفرح

إمحى كل شىء عدى و راح و أكتب فى كتاب حياتى من جديد

علمنى أتنفس بنفسك..أهمس بصوتك

علمنى إزاى راح تتولد جوه ملامحى

علمنى أحيك أكتر و أكتر

علمنى أصلى و أشكر ربنا..إنك هنا..إنك أنا...إن النبوءه اتحققت



*****

الراوى:
______

يمكن ماتوا صحيح م الحب
يمكن ماتوا ف غارة ف حرب
بس انتصروا على النبوءة
سابوا وليدهم حته من القلب
يزرع خير
ويكون اسطورة
يملى الدنيا عدل وحب

"تمت"

كتابة مشتركة مع المتميزة مى خاطر التى قامت بكتابة البطلة

ركني المفضل


أعطي وجهي للحائط، ضاماً كتفاي لتلامسا الحوائط

ركني المفضل في المنزل ....هنا أبكي و هنا أختبأ من الخوف

أغمض عيناي داعيا الله أن يمضي في طريقه دون أن يراني

تصدر الرجفة صريرا بفعل خشب الأرضية فارجو الخشب ألا يفضحني

أشكر الله على قصر قامتي و اشكو إليه صغير سنى

ياليتني في سن أبي حتى أهزمه

يمر الوقت و ينتشر الضوء و يمضي تاركاً إياي في صحبة الخوف ،

تضربني أمي بعد أن تنتزعني من ركني المفضل لأني أغرقت الأرض

لماذا تضربني وانا الخائف

و لا تضرب ما يخيفني