بــوجي

برنامج "ولاد الحرام مسابوش لولاد الحرام التانيين حاجة" راديو ميجا اف ام 92.7 ’ رمضان 2011

بوجي،بالوظة ، فيشو دي اسماء الدلع لبني ادم زينا تمام، يمكن ميشبهناش قوي لانه يشبه سيخ الشاورمة اكتر ، ويمكن كمان ألذ من الشاورمة، ، لكن برضو بني ادم بس موهبته وميزته الأساسية هي الفشر، ومن هنا جه دلع فيشو، لانه صعب جدا يتكلم تلات كلمات ورا بعض، ميكونش في نصهم فشرة، لدرجة ان نص اصحابنا ميعرفوش لحد دلوقتي مين ابوه وامه واخواته الحقيقيين، انا شخصيا اكتشفت ان في 3 اصحابه فاكرني أخوه، وقال ايه اتأكدوا لما لقوني بحب الشاورمة.
المشكلة الحقيقة بقى في التعامل مع بلبل هي الازمات اللي بيمر بيها، مبتبقاش عارف كصديق المفروض تقف جنبه وتساعده، ولا تعتبر المشكلة اللي بيحكيهالك فشرة جديدة، وهاتك يا افيهات عليها، وده طبعا بيجرح مشاعره لو كانت المشكلة حقيقية، بس الحل اللي اتوصلناله بعد شوية، انك لما يحكيلك مشكلة تسكت خالص، وتقوم متصل بصاحب مشترك بينكم، تخلي بوجي يحكيله المشكلة من اول وجديد، ،وهو غالبا و عمره ما حكى حكاية مرتين زي بعض، فده حيخليك تكتشف اذا كان بيفشر ولا بيقول الحقيقة، وغالبا حيطلع بيفشر.
لكن بصراحة اخر مرة كان شكلي وحش قوي، لما قالولي ان بوجي رجليه اتكسرت في الثورة، قلت ييه فشرة جديدة، من امتى يعني وبوجي بتاع ثورات، واكتشفت بعد عشر ايام ان فعلا رجليه كانت مكسورة.
اتكسفت قوي من نفسي، رحت واخد بعضى وجريت على بيته، اللي يارب يطلع بيته، وهناك سمعت قصة كسر رجله مرتين مرة منه ومرة من ابوه، مرة يوم جمعة الغضب ومرة يوم جمعة الرحيل، وهناك قابلت عم حنفي جاره اللي هو كمان كان بيزوره، اللي ياحرام وهو ماشي كان بيعتذر جدا لبوجي وابوه، انه خبطه بالعربية وهو بيركن، لما بوجي كان واقف تحت البيت قال ايه بيحكي للجيران عن ذكرياته قدام جامع مصطفى محمود.