10‏/11‏/2012

رسالة إلى أبي في ذكراه : هو أنت صحيح مش راجع تاني؟


هو انت فعلا مش جاي تاني خالص

خلاص كده، أكيد مش حشوفك تاني

طيب ازاي، انت عمرك ماعودتني على كده

ده حتى لما كنت بفوت يوم - علشان حمار - مش باجيلك فيه كنت بتكلمني تهزقني

حبطل اشوفك قاعد في الصالة زي زمان والنضارة محتارة على وشك من كمية الورق اللي حواليك، وانا مش هنا بس حاسس بالدفا

على فكرة يابابا الواد ايهاب بيقلدك، بيقعد زيك بالظبط، بيخبط بصوابعه على نفسه الكرسي، حابقى اقوله ميعملش كده تاني

بس هو انت صحيح مش جاي تاني

طيب انا بحب ابوس ايدك، واتأمل في عروقها النافرة، كنت بشوف فيها حاجات كتير، كنت فخور بيها، بتحسسني بجدري الممدود في الأرض

متزعلش مني علشان بكتب بالعامية، قولت أجرب مرة أكون مش شبهك

أصلهم ميعرفوش أنا بابقى مبسوط ازاي لما يقولوا اني شبهك بالظبط، متقولهومش بقى

أحمد أخويا بيضحك زيك بالظبط، وانا بغير جربت ضحكته في المراية 100 مرة ومعرفتش اقلدها

طول عمرك مزروع فينا

من يوم ما فارقت وانا ضهري مكسور، مش عارف يابا اطمن

لكن انا عارف انك

في كل واحد وواحدة فينا سايب حاجات

بس انا قولت سايبها علشان راجع تاني

طيب أكد على ماما، وانا عارف انها بتسمع كلامك متمشيش هي كمان

خليها معايا

بس هو انت بجد مش راجع تاني