17‏/08‏/2011

طرطرة

عيل راح عالحيطة يطرطر .... يرسم قال بالشخة مدينة

صاحبه معدى عاكسه وهزر

طرطش خلى مدينته... بقت عالحيطة مدينة حزينة

حفرة فى جنب الحيطة.... حفرها واحد غيره

نقرة فى قلب مدينته صريحة

واحد تانى كتر خيره

جاب طباشيرة كتبها صريحة

"يسقط يسقط حكم العسكر"

كشر لحظة صاحبنا وفكر

بص وراه اتعفرت صفر

شافهم حاصروا الحيطة اتحصر

رصوا كلام جامد فى المحضر

ان صاحبنا "حمامته" وسيلة

لقلب نظام الحكم العالى

قال يطاوعهم تبقى جميلة

مد دراعه وجاب سكينة

وضحى بحلم رجولته الغالى

تانى يوم الصبح وبدرى

دهنوا الحيطة زيت وفخيم

عدى صاحبنا المخصى الفقرى

كتب بالدوكو ... كلام مفهوم

"عاش المجلس يسقط غيره

الفاتحة لذكرى المرحوم"


هناك 3 تعليقات:

غير معرف يقول...

رائعه,ولكن احزنتنى كثيرا

غير معرف يقول...

رائعه و معبره
بس ان شاء الله حمامنا كله بخير , و حلمنا مش هيضيع

ع.سالم يقول...

جميل جداً ... (بغض النظر عن الطرطرة)