31‏/08‏/2011

أحمد رمضان

برنامج "ولاد الحرام مسابوش لولاد الحرام التانيين حاجة" راديو ميجا اف ام 92.7 ’ رمضان 2011


أحمد رمضان، شاب مصري جدا، متفوق في شغله، شاطر كل الناس بيحبوه، وهو كمان بيحب كل الناس وهي دي مشكلة حياته.
أحمد ضعيف جدا قدام الجنس الناعم، عينه زايغة يعني زي ما بيقولوا ، يشوف الواحدة من دول قلبه يقع في رجليه، في ظرف خمستاشر دقيقة يكون حبها،وعزمها على فنجان قهوة ، تلاتين دقيقة يكون صاحبها ومتسألنيش ازاي هو موهوب بصراحة، كلمتين على كام نظرة من عيونه الخاضر البنت من دول متستحملش في ايده غلوة، بكرة الصبح بتكون العلاقة انتهت، لان الاخ أحمد زهق.
أو وهو مروح شاف واحدة تانية وقلبه الشرير سخسخ وحبها.
بس هو صاحب مبدأ ومبدأه في الحياة قعدة الراجل بميت ست، بس لو جت الست طظ في مليون راجل
ماكينة حب متنقلة، حبيب كما قال الكتاب، دون جوان عصره وأوانه، مهما كان فرحان او متضايق تعبان أو مشغول، أو حتى عيان، لازم يحب، بس لان المثل بيقول لكل جواد كبوة، احمد اتجوز من شهرين، اخيرا واحدة عرفت تكعبله وتخليه يتجوزها بعد ما قدرت تصمد معاه 3 ايام ورا بعض، أحمد دخل دنيا، بس ياريته ما دخل.
عارفين ليه
ادعوا لاحمد في الشهر الكريم ده يخف ويخرج من المستشفى اللي بيتعالج فيها من الصدمة العصبية اللي عنده، أحمد اكتشف بعد شهر ونص جواز ان حرمه المصون عندها ملف في الاداب والملف ده يادوب معمولها فيه حوالي 39 قضية بس ، المسكين مستحملش
وصدق اللي قال غلطة الشاطر بالف
 

أحمد مهدي

برنامج "ولاد الحرام مسابوش لولاد الحرام التانيين حاجة" راديو ميجا اف ام 92.7 ’ رمضان 2011


احمد مهدي شاب مصري زي الفل، تشوفه ترتاحله من أول نظرة، وحتبقوا اصحاب في ظرف نص ساعة، وبعد ساعة الا ربع حيكون بيكلمك وكأنه يعرفك من أيام ما كنتوا في الحضانة، ودود جدا ابو المهد، اه هو اسم الشهرة بتاعه ابو المهد
حاصل على بكالوريوس هندسة قسم سيارات، يعني مهندس قد الدنيا، اشتغل بدل المرة تلاتة مع انه يادوب متخرج من سنيتين، بس متفهمونيش غلط مش معنى كده انه مطلوب لا بالعكس ده حيشرحلنا مشكلة ابو المهد مع الحياة.
مهدي يا جدعان بني ادم فقر، لو مسك الدهب بايده يتحول تراب، لو دخل مسابقة لسوء الحظ تأكدوا انه حيطلع الأول بلا منافس، من كام سنة قرر وهو طالب يدخل مشروع مع واحد صاحبه المشروع مضمون حيسافر واحد فيهم الصين يشتري شوية حاجات ويرجع مصر يعملوا اوبن داي ويبيعوها
صاحبه سافر بالسلامة تفتكروا حصل ايه، لا لا دماغكم متروحش لبعيد كده الطيارة موقعتش وهو راجع ، صاحبه جاله سارس في الصين ومات، وراحت فلوسك يا مهدي، المهم انه محرمش، قرر يشارك واحد صاحبه تاني في مزرعة فراخ، هوب جت انفلونزا الطيور والحكومة قفلت المزرعة، زعل شوية بصراحة وقرر انه يتأنى شوية في مشروعه اللي جاي
واحد ابن حلال مكانش يعرفه كويس اقنعه يسيبه من المشاريع الاقتصادية ويفكر في السياسة، وانضم مهدي للحزب الوطني في 2010، وكان بشرة خير على مصر كلها وانتهى الحزب الوطني.
وأيام ثورة يناير كنت سعيد جدا بأن أبو المهد قرر ما يشاركش فيها ويفضل في البيت، بصراحة اطمنت على الثورة.
بس اليومين دول في مشكلة كبيرة قوي، أبو المهد مصر وكله عشم انه يسافر معايا الشهر الجاي وانا رايح تركيا، و اللي انا متأكد منه ان لا تركيا ولا هو حيحصلهم حاجة، بس انا ذنبي ايه اروح بلاش، انا غيرت رأيي ومش مسافر، حد عايز ينتحر يسافر مع ابو المهد بدل ما يسافر لوحده
 

حاتم شفيق

برنامج "ولاد الحرام مسابوش لولاد الحرام التانيين حاجة" راديو ميجا اف ام 92.7 ’ رمضان 2011\

حاتم شفيق، اغبى بني ادم ممكن تقابله في حياتك، تلاتة من مدرسينه في المرحلة الابتدائية انتحروا بسببه، وهو ساب المدرسة بعد 11 سنة، في الاعدادية مدرس العلوم بتاعه دخل مستشفى الأمراض العقلية، ومسكوا واحد على حدود ليبيا بيحاول يهرب، بس هو المرادي كان احسن وخد الاعدادية في خمس سنين، جه بقى في ثانوية عامة وحجرت معاه، لدرجة ان اخر استاذ حاول معاه، الاستاذ عرابي المشد اكتشف انه كان دفعته في اول ابتدائي، وساعتها بس حاتم صعبت نفسه عليه، وفهم ان طالما سنه وصل 30 سنة وما اخدش الثانوية العامة يبقى يجرب في حاجة تانية.
كان والده يا عيني ربنا رحمه وتوفي بعد ما اتشل من غباء حاتم، وفي ذكرى وفاة مامته اللي انتحرت لما فشلت تفهمه ان الرضاعة مش من صوابع رجلها، حاتم قرر يعتزل الدنيا.
باع كل املاك باباه وحطها في البنك وقرر يعيش في شقته وميخرجش منها غير علشان يقبض العائد أول كل شهر.
بس للاسف البنك غلط غلطة عمره وادى حاتم كارت ايه تي ام، وكان طبعا كل شهر بيروح البنك اكتر من خمس ست مرات، مرة يجيب الكارت اللي اتسحب في المكنة، مرة يغير الكارت اللي ضاع، مرة يسحب من الشباك وهكذا.
بس هو كان سعيد في البيت، وكان مرتاح انه مبيتعاملش مع بني ادين تانيين، بس المصيبة ان حاتم قرر يتجوز، ولانه كان وصل لسن ال39 كان لازم يدور على حد مناسب، ولان حاتم في اخر قياس لقدراته العقلية ثبت انه في مستوى تفكير دودة القز، قرر انه يتجوز واحدة زكية جدا، علشان مشكلته متتكررش في ولاده
والغريبة ان حاتم اتجوز في ظرف شهرين، بس الأغرب ان مراته اتطلقت بعد 13 يوم و رجعت بيت ابوها، بعد ما سابت حاتم على الحديدة، وحولت كل فلوسه في البنك لحسابه
وحاتم لحد دلوقتي قاعد قدام البنك كل يوم علشان يحاول يسحب العائد بتاعه، وكسر ييجي عشر مكن لانه بيقوله مفيش رصيد
ربنا يسهل ويموت من الجوع يمكن يرتاح
 

زيزو

برنامج "ولاد الحرام مسابوش لولاد الحرام التانيين حاجة" راديو ميجا اف ام 92.7 ’ رمضان 2011


زيزو مجنون كورة، يقدر بحمد الله يقولك نتيجة ماتش الاهلي واسكو سنة خمسة وتمانين في الدور الاول، ويوصفلك كمان الجون اللي جابه بيبو من باصة مختار مختار في الدقيقة تسعة وعشرين لما الماتش خلص واحد صفر.
حضر كل ماتشات الاهلى والمنتخب في الاستاد من سنة تسعين، عضو ناشط في كل منتديات الكورة على الانترنت، رئيس رابطة مشجعي الاهلي في مدينة دكرنس.
زيزو ياجماعة من الموهوبين اللي مخادوش فرصة، يقدر يحلل اي ماتش وهو قاعد على القهوة بعد الاستاد ويقولك عيوب الخطة وغلطات المدرب، يقدر كمان يقولك التشكيل المناسب لكل ماتش قبل ما يبدأ ولو اتحاد الكورة سمع عنه أكيد مش حيلاقي غيره يمسك المنتخب بعد الكابتن حسن شحاتة.
مشكلته انه اهلاوي متعصب، وده خلاه طلق مراته علشان اكتشف ان جوز بنت عمتها زملكاوي ، ابوه اللي هو ابوه قاطعة تلات سنين لانه حاول وهو في تانية اعدادي يمنعه يحضر المباراة المهمة بين الاهلي و الكروم، لكن كل ده مش مهم طالما الاهلي بيكسب وبياخد الدوري
المشكلة اليومين دول ان وليد بعد العمر ده كله قرر يلعب كورة، قال يمشي رجليه ويجرب يلعب بعد ما قضى العمر ده كله متفرج.
وبغض النظر عن انه بقى مسخرة الملعب، وانه خد ييجي تلاتين كوبري، وانه اترقص لدرجة متقدرش شاكيرا بذات نفسها متقدرش عليها، الا انه لما وقع على وشه في نهاية الماتش واتكسرله اربع ضلوع ومناخير مبقاش قادر يحضر ماتش الاهلى في دور التمانية في بطولة افريقيا.
وده بالنسبة لزيزو اوحش بكتير من يوم ابوه الله يرحمه ما مات يوم ماتش الاهلي والترجي واللي اضطر علشان يحضر العزا يروحه في الشوط التاني.
 

27‏/08‏/2011

بندق

برنامج "ولاد الحرام مسابوش لولاد الحرام التانيين حاجة" راديو ميجا اف ام 92.7 ’ رمضان 2011




بندق شاب مصري شعره شاب وهو بيحاول يفهم، بس الحقيقة عمره ما فهم حاجة خالص، وده نتيجة انه لجأ لكمية من المخدرات تكفي لنوم قطيع من الأفيال أصغر فيل فيهم عنده اتناشر سنة.
محاولة بندق للفهم انتهت في تالتة ابتدائي لما اكتشف انها مش فارقة كتير بين ايجيبت واليفانت، وان الجرامر هو النحو بتاع الانجليزي، وان المدرس بتاع الانجليزي اللي هو في الاصل مدرس جغرافيا لما كان بيديهم حصة العربي بيغلط في الاملاء.
وانه حتى لو ذاكر ونجح واتخرج في يوم من الأيام حيفضل برضو جاهل، وعلشان بندق فهم الفولة ساب الدراسة واكتفى بانه يكون حسب تصنيف وزارة التعليم للبني ادمين راسب تالتة ابتدائي، واشتغل في ورشة سمكرة سيارات.
هناك في الورشة لقى نفسه، الاسطى بتاعه لا بيعرف يقرا ولا يكتب لكن عليه ماسكة اجنة ولا تامر حسني وهو ماسك الجيتار، في ظرف سنة واحدة علمه كل حاجة، واترقى بندق من مجرد بلية، لاسطى صغير بيعمل المرمات اللي بتيجي الورشة، والمرمات دي اللي هو الحوادث الطياري، رفرف معوج والعربية ايه غير اربع رفارف، اكصدام واقع، كبوت عايز استعدال، المهم انه بقى صنايعي كسيب.
وبعد فترة لما زادت كمية المخدرات مع زيادة الدخل، بندق مبقاش قادر يشتغل، قرر انه يشتغل شغلانة اسهل، وليها علاقة برضو بالعربيات، بس مجهودها أقل، صاحبنا اشتغل سايس.
وتعريف السايس العلمي هو الراجل اللي بتشوفه وانت نازل من عربيتك بعد ما تكون خلاص ركنت، وبيجيلك جري وانت خارج بالعربية من مكان ركنتك علشان يقولك اكسر العجل، وغالبا لو سمعت كلامه حتخبط العربية اللي قدامك.
بندق دلوقتي ماشاء الله اشهر سايس في مصر الجديدة، بس المشكلة انه ابتدى يتعب من الشغلانة دي كمان، فعلشان خاطر الانسانية حد عنده وظيفة لبندق ميزيدش المجهود بتاعها عن أنه يبربش بعنيه.

ابتسام مجدي

برنامج "ولاد الحرام مسابوش لولاد الحرام التانيين حاجة" راديو ميجا اف ام 92.7 ’ رمضان 2011



ابتسام مجدي، اشهر مذيعة راديو في مصر، وصلت في سن التلاتين انها تكون مديرة لاشهر واكبر محطة راديو في مصر، عصبية شوية، وسر عصبيتها رغبتها المستمرة في التفوق والنجاح.
كل اللي اتعاملوا معاها بقوا عارفين انها اول ما تبرق حتزعق، بس الحقيقة قلبها طيب، طلعت قرار اداري من كام يوم بصرف عدد اتنين كيس قطن لكل موظف في الاذاعة علشان يسدوا ودانهم لما تزعق.
لا وكمان صرفت لكل موظف نص شهر بدل زعيق، مش بقولكم قلبها طيب.
مشكلة ابتسام بقى انها جنب عصبيتها ، نرفوزة، عارف انكم حتقولولي ايه يا ابو العريف الفرق بين العصبية والنرفزة، حقولكم العصبي بيتعصب، النرفوز بيتنرفز، ووئام لما بتتعصب بتزعق، لما بتتنرفز بتتخانق، واجارك الله لو اتخانقت معاك، حتفقد يا حاسة السمع يا النطق، بس صدقوني قلبها طيب، لو حصلك كده فعلا حتقدر تجيبلك قرار بالعلاج على نفقة الدولة.
بس ابتسام وهي رايقة حاجة تانية خالص، ضحك وتهريج وجدعنة ، صحيح حتخصمهم من بدل الزعيق بس مفيش اغلى من راحة البال، ومع الضيوف طبعا حاجة تانية خالص، تشبه كده ليلة دافية في شهر يناير في الساحل الشمالي.
بس مش عارف ليه حاسس انكم مش مصدقني لما بقولكم انها طيبة، لكن انا حاثبتلكم ده حالا، اول امبارح واحنا في الشهر الكريم اللي احنا فيه ده، وئام اتعصبت عليا، تخيلوا عملت ايه.
خدتني في الاستوديو المعزول علشان محدش يتأثر بالزعيق السلبي اللي تأثيره على ودانك بالظبط زي تأثير التدخين السلبي على صدرك، وادتني كيس قطن قبل ما تبدأ في الزعيق.
بذمتكم في حد في الزمن ده بالطيبة دي.

24‏/08‏/2011

هنيـــــــــــة

برنامج "ولاد الحرام مسابوش لولاد الحرام التانيين حاجة" راديو ميجا اف ام 92.7 ’ رمضان 2011




هنية بتاعة الفول والطعمية، أشهر ست في بولاق تمن، العمر كتيير توعى على فحت البحر، الحالة الاجتماعية أرملة جوزها مات ايام ثورة يوليو، ولادها خمسة كلهم ماتوا بسبب الشيخوخة ، احفادها اتناشر اصغر واحد عايش فيهم طلع على المعاش من سنتين.
هنية بسم الله ما شاء الله لسه بصحتها لا عندها زهايمر ولا مبتقدرش تتحرك زي الاصغر منها بتلاتين سنة، لا لسه بتقوم الصبح من النجمة، تخرج على نصبتها في الحارة تولع على الزيت وتقرص الطعمية وتقلب قدرة الفول وتبيع لزباينها.
ناس كتير احتاروا في سبب صحتها في السن ده، كتير قالوا السبب انها كانت بتستخدم زيت موبيل وان في قلية الطعمية وده خلاها تمام، ناس تانية قالوا انها من كتر اكل الفول المسوس، بقى عندها قدرة جبارة في تحمل الامراض، لكن في النهاية محدش عرف السر، بس الاكيد الكل بيحسدها على صحتها.
المشكلة الوحيدة عند هنية هي الوحدة، خاصة وان الدنيا اتغيرت ومبقاش في صلة رحم، والعيال ولاد احفادها كل واحد فيهم مشغول ببيته ومراته، اما احفادها فنصهم مات ونصهم مبقاش قادر يتحرك ويزورها، علشان كده هنية فكرت وقررت تبعت في بريد الجمهورية في باب أريد زوجاً.
الجواز هو الحل بدل ما تمشي مشي بطال، وكتبت في الاعلان ده، عروس ذات مال وعيال ، بيضاء اكلح لونها بفعل عوامل التعرية ترغب في زوج متدين، يرعى الله في بيته واسرته. الشروط الخاصة لا يزيد سنه عن خمسين سنة.
اه هنية مش عبيطة تتجوز واحد تشتغله ممرضة، هنية عايزة تدخل دنيا طالما فشلت تروح للأخرة.

وليد نبيل

برنامج "ولاد الحرام مسابوش لولاد الحرام التانيين حاجة" راديو ميجا اف ام 92.7 ’ رمضان 2011




وليد نبيل، شاب فيسبكاوي اصيل، ارتبطت حياته بالفيس بوك بعد أول أكاونت عمله عليه سنة 2007، بقى بيشتغل حوالي ساعتين في اليوم، وبينام اربع ساعات وبيعمل بقية الحاجات الحياتية التانية ما بين اكل وحمام ومواصلات في تلات ساعات وخمستاشر ساعة على الفيسبوك.
يعني قعد في الاربع سنين دول حوالي خمستاشر في تلتماية خمسة وستين في اربعة ييجي واحد وعشرين ألف وتسعمية ساعة يعني تسعمية واتناشر يوم يعني تلاتين شهر ونص، يعني سنتين ونص.
وليد قضى في اخر اربع سنين سنتين ونص على الفيس بوك، حب فيهم اتناشر فريند، اكتشف في النهاية ان ستة فيهم رجالة، واربعة اصغر واحدة فيهم عندها خمسين سنة، واتنين بيتعالجوا في مستشفى للامراض العصبية.
اتصاحب على اكتر من ميت صديق، لستة الفريندز عنده وصلت لالفين ونص، صحيح نصهم لاجنبيات لابسين مايوهات بيتكلموا لغات مبيعرفش يتكلمها لكن المايوه بيتكلم لغة موحدة لكل البشر.
نسيت اقولكم وليد في الاساس شغال موظف في الشهر العقاري، ولانه خلاص خطب وربنا هداه قرر يعمل ايفينت لفرحه على الفيسبوك، لانه خلاص لقى البنت اللي ممكن يعمل لها لايك، وققر يعمل اجنور لكل اللي فات، ويبطل يلعب فارم فيل ويركز في البيت سوسايتي لانه حيفتح بيت.
وليد خلاص حيكتب على الفيس بوك انجيجد، يعني حيعمل ريموف لكل المايوهات، وليد اللي خطيبته عندها تو اكاونت على الفيسبوك قرر يكتب استيتوس النهاردة يقول فيه
متضيعوش وقتكم يا شباب على الفيس، لانك بعد اربع سنين حتبقى عامل زي التيس

23‏/08‏/2011

توتي

برنامج "ولاد الحرام مسابوش لولاد الحرام التانيين حاجة" راديو ميجا اف ام 92.7 ’ رمضان 2011



توتي شاب فانكي كل أمله في الحياة يبقى مطرب ومغرق الدنيا كليبات، والكليبات يعني مزز كتير بترقص حواليه، ومطرب يعني ملايين المعجبات اللي حيموتوا عليه، توتي عنده مشروع شخصي قرر يشتغل عليه.
أول مواصفة هو تخيلها في كل مطرب انه لازم يبقى عنده جيتار، توتي اشترى بدل الجيتار اتنين، واحد عادي وواحد اليكتريك، برضو استايل يا جماعة.
تاني حاجة لازم يكون بادي بيلدنج، فينك ياجيم توتي بقى طول النهار في عضل جيم، وبالليل بيتعلم يعزف جيتار، الدامبلز بين ايديه الصبح، وبالليل الجيتار في حضنه.
توتي في ظرف سنتين بقى بيعرف يلعب على الجيتار، وبقى عامل زي ضلفة دولاب جدي اللي من الخشب الزان وساعتها بس عرف انه ابتدى الطريق.
لف كتير على مكاتب المنتجين، اللي كلهم حاولوا ياخدوا منه فلوس علشان ينتجوله، بس هو اقتناعه بموهبته منعه انه يشتري الفرصة.
فاتت سنة ورا سنة وحلم توتي مش عايز يتحقق، اتكسر الجيتار وجاب مكانه كام جيتار، عضل جيم عمله عضوية شرفية لانه اقدم واضخم عضو في المكان.
ولما توتي يأس ، ربنا منسيهوش، صاحبه الانتيم جابله حفلة في العجمي عاملها شوية شباب وجايبين فيها كام مطرب من اللي لسه بيبتدوا، وهو رشحلهم توتي اقتناعا بموهبته.
ولما توتي طلع على المسرح وابتدى يغني اغنية لعمرو دياب، فهم للمرة الأولى هو ليه كل السنين دي كان محتاج يعمل بادي بيلدنج.
علشان يستحمل كم الضرب اللي اتضربه أول ما الناس سمعت صوته، اللي يشبه كتير نوبة صحيان في اي وحدة عسكرية.
على فكرة توتي لسه ميأسش، توتي عارف ومدرك ان كل الناس اللي سمعت صوته ومعجبهاش جهلة ومعندهومش اذن موسيقية، وكفاية عليه ابراهيم عضل صاحب الجيم، اللي أول كل شهر وهو بيدفعله الشهرية بيسمع منه اغنية جديدة وهو سعيد بالفلوس.

22‏/08‏/2011

عمرو مصطفى

برنامج "ولاد الحرام مسابوش لولاد الحرام التانيين حاجة" راديو ميجا اف ام 92.7 ’ رمضان 2011



الفنان، ايوة الفنان وده مش لقب ده غصب واقتدار، صاحبنا في حلقة النهاردة اللي بقى شاعر ومغني بوضع اليد في الأصل ملحن، بس مبيحبش حد يناديه غير يا فنان، مع انه اشتهر في الوسط الفني الغنائي بالترزي، وده عاشان قدرته الفائقة في قلب أي أغنية زي الشراب المقلوب.
لحن أغنية وطنية قديمة بين ايديه في ثواني يبقى اغنية عاطفية، اوبريت لسيد درويش يقلبه موسقى تصويرية لفيلم أكشن، صاحبنا الترزي الفنان مفيش حاجة بتقف قدامه، موهوب بالفترة، كفاية انه رغم فشل عملية اللحمية اللي عملها خمس مرات أصر يغني، وعمل كده فعلا ومتمش تقديمه للمحاكمة لحد دلوقتي.
منظمة الصحة العالمية اعتبرته كيان فريد لأنه أول مطرب في تاريخ البشرية بيغني بلحميته، أما اليونسكو فطالب باعتباره محمية طبيعية، لكن مصر اعترضت وتم الاتفاق بعد تحكيم دولي على اعتبار مناخيره بس محمية طبيعية.
الجديد في صاحبنا الشاعر والملحن والمطرب انه قرر بعد ثورة خمسة وعشرين يناير يبقى كمان يبقى سياسي، وايه المانع ما السياسة فن وهو فنان، وابتدى من خلال الانترنت يروج لفكره السياسي اللي بيعتمد على نظرية المؤامرة.
صاحبنا شايف ان مصر في خطر، البلد اللي عدد سكانها فوق التمانين مليون بتتعرض لحرب خفية من التحالف الايراني الاسرائيلي الأمريكي السوداني، ولانه مقاتل وسلاحه جيتاره فهو لازم ينقذ مصر.
ولان الفنان مقتنع بأن المرحلة دي صعبة وهو لازم علشان يعديها يهزم الوحش في النهاية ، قرر يرشح نفسه لرياسة الجمهورية.
فعلشان خاطر الفن وعلشان خاطر مصر، لو رشح نفسه اعزائي المستمعين انتخبوه، يمكن يبطل يغني

عادل الكردوسي

برنامج "ولاد الحرام مسابوش لولاد الحرام التانيين حاجة" راديو ميجا اف ام 92.7 ’ رمضان 2011



عادل الكردوسي، شاب مصري أصيل، ابن نكتة دمه خفيف زيه زي كل المصريين، ملامحه مصرية جدا لدرجة انك تشك انه مسروق من المتحف المصري، وعمنا زاهي حواس لو خد بيه خبر حيكتشفه حيكتشفه.
شغال محاسب في شركة كبيرة للاستيراد والتصدير، متجوز وعنده ولد واحد، بس للاسف مراته عايزة تطلق، مع ان عادل راجل كسيب ماهيته فيها عدد من الاصفار اللي يخليه يفتح بيت مرتاح، شخصيته فيها مميزات تخللى أي ست تبقى سعيدة جنبه، ماعدا عيب واحد بس.
عادل الكردوسي بخيل جدا، لدرجة انه يوم ما تولد نزل في عربية باباه قبل ما يوصل بمامته المستشفى علشان يوفر تمن عملية الولادة، مكنش بيرضى من وهو صغير يشتري زي اصحابه شيبسي وبيبسي وكلام فارغ من ده، لا كان بيحوش، باباه اكتشف في ثانوية عامة ان عادل حوش كل مصروفه من كي جي 1 مصرفش منه غير 50 جنيه لما اتمسك وهو بيحاول يزوغ في مترو الانفاق علشان يوفر تمن التذكرة.
ده ميمنعش ان عادل بيقعد مع اصحابه على القهوة، صحيح دايماً يقول انه صايم، بغض النظر الوقت ليل ولا صبح، بس اصحابه بيطنشوا.
ولما قرر يتجوز كان مقتنع ان الجواز مشروع فاشل جدا، يجيب ليه واحدة غريبة يصرف عليها ويأكلها، لكن لما اكتشف ان الممرضة اللي حتقعد مع مامته بعد ما باباه مات حتتكلف اكتر، اتجوز الممرضة، واللي طبعا فقدت أهميتها بعد وفاة والدته، وبقت حمل زيادة على مصاريف عادل اللي مبتزيدش باي حال من الأحوال عن 150 جنيه في الشهر.
المصيبة كمان بالنسبة لعادل الاستاذ الصغير اللي شرف، وفتح معاه باب مصاريف جديدة ايشى بامبرز وايشي لبن ولا دوا لما يعيا.
عادل الحقيقة فكر في الملجأ بس برضه ده دمه ولحمه، وده خلاه عاجز عن التصرف لاول مرة في حياته.
بس اعتقد النهاردة بعد ما عادل فاض بيه الكيل وطفح قرر يضحي بالام اللي هي مراته ويكتفي بالابن علشان هو يقدر يعيش.

20‏/08‏/2011

فارس خشب


الااونا الادو

فتحوا المزاد

وناس كتير

اتجمعت من غير ميعاد

***

صرخ المنادى بالتمن

والثانية كان عمر الزمن

هتف المزايد وبشجن

رسيت عليه والصمت ساد

***

الااونا الادو

فتحوا المزاد

نادى قوى على تانى صنف

صوت كما الكرباج يطرقع

وصوت تانى كان ساكنه ضعف

ورقم يزيد ورا واو العطف

مالك جديد بفلوسه جاد

***

الااونا الادو

فتحوا المزاد

دورى انا مين يشترى

فى وش خاف

صوته جرى

سكت المنادى م الزهق

صرخ نهق

ما حد رد

ولا نطق

***

مين يشترى فارس خشب

سوس خلاص من التعب

صوت المنادى خلاص خفت

لجلج سكت

ورجعت تانى للرفوف

تبر التراب كسانى صوف

قررت فى ليلة

بلا اى خوف

انى انكسر

تعبت جدا م الكساد

قفلوا المزاد

19‏/08‏/2011

سليمان خاطر يبتسم من جديد


في الوقت الذي تبكي فيه ثلاث امهات ابنائهن الذين سالت دماهم على رمال سيناء، التي فيما يبدو قد أدمنت الدم، كان الشهيد سليمان خاطر يبتسم ساخراً في الأعالي، وفي ذات الوقت الذي حاول فيه البعض الاستفادة من الحدث، والترويع والترويج لفكرة أن اسرائيل على بوابة مصر الشرقية تستعد لاقتحامها، وان جيشنا يستعد لصدها، كان سليمان يتكأ في جلسته بجوار عازف الربابة المفضل لديه ليروي قصته، ذلك الفتى الشاب الذى كان يقوم بنوبة حراسته المعتادة بمنطقة رأس برقة أو رأس برجة بجنوب سيناء، اثناء فترة خدمته وتجنيده في الامن المركزي، ثم فوجئ بمجموعة من السياح الإسرائيليين يحاولون تسلق الهضبة التي تقع عليها نقطة حراسته فحاول منعهم وأخبرهم بالانجليزية أن هذه المنطقة ممنوع العبور فيها قائلا: (بالإنجليزية: stop no passing) إلا انهم لم يلتزموا بالتعليمات وواصلوا سيرهم بجوار نقطة الحراسة التي توجد بها أجهزة وأسلحة خاصة فأطلق عليهم الرصاص. كانت المجموعة تحتوي 12 شخصا، فقتل منهم سبعة في الخامس من أكتوبر عام 1985.
ثم تمت محاكمته عسكريا، ثم صدر الحكم عليه في 28 ديسمبر عام 1985 بالأشغال الشاقة المؤبدة لمدة 25 عامًا، وتم ترحيله إلى السجن الحربي بمدينة نصر بالقاهرة. بعد أن صدر الحكم علي خاطر نقل إلى السجن ومنه إلى مستشفى السجن بدعوى معالجته من البلهارسيا، وهناك وفي اليوم التاسع لحبسه، وتحديداً في 7 يناير 1986 أعلنت الإذاعة ونشرت الصحف خبر انتحار الجندي سليمان خاطر في ظروف غامضة.
ثم صدر قرار بمنع التحاق اي حامل مؤهل دراسي بالامن المركزي ، خوفا من تكرار ما فعله سليمان، والذي قال عنه مبارك "إنني في غاية الخجل، فقد قام أحد جنودي بفتح النار على مجموعة من الإسرائيليين اخترقوا الحدود، مما أدي إلى قتل سبعة منهم" !!!
********
من المؤكد ان واحداً من الشهداء الثلاثة لم يسمع سليمان عقب صدور الحكم عليه بالمؤبد حين قال "أنا لا اخشي الموت... ولا أرهبه... إنه قضاء الله وقدره، لكنني أخشي أن يكون للحكم الذي سوف يصدر ضدي آثار سيئة على زملائي ، تصيبهم بالخوف وتقتل فيهم وطنيتهم".
لأنهم لم يخافوا، وكيف يخاف جندي يحمل سلاحاً على أرض مصرية، الا أن يد الغدر التي قتلت سليمان في محبسه، امتدت لتسرق أعمارهم، بنفس الخسة والحقارة.
*******
وما بين سليمان الذي قال في مصر "أفكر في مصر أمي، أتصور أنها امرأة طيبة مثل أمي تتعب وتعمل مثلها، وأقولها يا أمي أنا واحد من أبنائك المخلصين.. من ترابك.. ودمي من نيلك. وحين أبكي أتصورها تجلس بجانبي مثل أمي في البيت في كل إجازة تأخذ رأسي في صدرها الحنون، وتقول: لا تبكي يا سليمان، أنت فعلت كل ما كنت أنتظره منك يا بني".
وبين هؤلاء الجنود الذين ما رأوا مصر اما يوما ما، ولم يشهدوا سوى تلك القسوة ما بين تضاريس الحياة، وقهر الفقر، ليصلوا الى مرحلة تجنيدهم، فيصيبهم الذل أيضا، افيحلمون بان تنتهي فترة التجنيد ليعاودوا الارتماء في احضان الفقر وحده، بجوار الارض التي كانت يوما ما طيبة.
*******
سليمان الذي نحروه قال البيان الرسمي عن انتخاره انه تم بمشمع الفراش، ثم قالت مجلة المصور أن الانتحار تم بملاءة السرير، وقال الطب الشرعي أن الانتحار تم بقطعة قماش من ما تستعمله الصاعقة. أمام كل ما قيل، تقدمت أسرته بطلب إعادة تشريح الجثة عن طريق لجنة مستقلة لمعرفة سبب الوفاة، وتم رفض الطلب مما زاد الشكوك وأصبح القتل سيناريو اقرب من الانتحار.
وجنودنا الذين يحاولون الان الترويج لنحرهم، بعد دفعهم في مهمة غامضة لم نعرف ملامحها حتى الان، سوف يصدر بيان اخر يخصهم قريبا، يحتوى على نفس الزيف، ولكنه هذه المرة يعطيهم الحق في ان يكونوا شهداء، الفارق ما بينهم وبين سليمان، أن الخسيس الذي قتله من مصلحته أن يجعله منتحرا، أما الخسيس الذي ساهم في قتل شهداء الأمس فمصلحته تحتم أن يكونوا شهداء، والفارق ما بين خسيس وخسيس ،تنحي واستفتاء
*******
ولكن علينا ألا ننسى قبل أن نبكي على شهدائنا أن خلال السنوات العشر الأخيرة قتل العدو الصهيوني لنا 15 شهيداً اخراً، وأصاب حوالي 7 اصابات خطيرة، دون أن يطرف لنا جفنا أو يهتز رمش، دون أن يصرخ احد قادة جيوشنا ويطالب بتهذيب العدو المتطاول، دون أن نسمع عن اغلب تلك الحالات، حينها كان سليمان يبكي ويستقبل زملائه الشهداء في موقعه المفضل بالجنة، اما شهداء اليوم، فهو في انتظارهم ليسمع سؤالهم حين يغني عازف الربابة مقولته التي قالها في السجن "طب السلاح ده أنا واخده ليه؟...... عشان ارقص بيه عشرة بلدي.... ولا عشان ادافع بيه عن تراب بلدي؟"، عن ما عاد لمصر من دمائهم، حتى يجيب قائلا" ولابد من يوم معلوم تترد فيه المظالم".
******
كشف بأسماء شهداء الصمت، اقرأوا لهم الفاتحة :

نوفمبر 2000 أصيب مواطن مصري يدعى سليمان قمبز وعمته برصاص إسرائيلي حينما كانا يجمعان محصول الزيتون بميدان صلاح الدين برفح سيناء

أبريل 2001 أصيبت سيدة مصرية بطلق ناري إسرائيلي أثناء وجودها بفناء منزلها القريب من الحدود مع غزة في مدينة رفح سيناء

أبريل 2001 قتل شاب مصري يدعى ميلاد محمد حميدة برصاص جنود إسرائيليين عندما حاول الوصول إلى غزة عبر بوابة صلاح الدين في رفح سيناء

مايو2001 أصيب مجند مصري يدعى أحمد عيسى برصاص إسرائيلي عندما كان يؤدي عمله على الحدود في رفح بِ شمال سيناء

مايو2001 أصيب مواطن مصري يدعى زامل أحمد سليمان (28 عاما) بنيران إسرائيلية في ركبته أثناء جلوسه بمنزله فِي رفح سيناء

يونيو 2001 قتل مجند يدعى السيد الغريب محمد أحمد بعد إصابته بأعيرة نارية إسرائيلية في الحدود الفاصلة بين مصر وإسرائيل

سبتمبر 2001 أصيب ضابط مصري برتبة نقيب يدعى عمر طه محمد (28 عاما) بطلق ناري وعدة شظايا في الفخذ اليسرى بنيران إسرائيلية برفح

نوفمبر 2001 أصيب ضابط الشرطة المصري الرائد محمد أحمد سلامة بالرصاص الإسرائيلي أثناء دورية له في منطقة الحدود برفح

ديسمبر 2001 أصيب الشاب المصري من أهالي رفح سيناء محمد جمعة البراهمة 17 عاما في كتفه بطلق ناري إسرائيلي

فبراير2002 أصيب الطفل فارس القمبز (5 سنوات) بشظية نيران إسرائيلية في فخذه أثناء لعبه وحده بفناء منزله في رفح سيناء

نوفمبر 2004 دبابة إسرائيلية تقتل ثلاثة جنود مصريين على الجانب المصري برفح على الحدود مع غزة

ديسمبر2007 قتل المجند المصري محمد عبد المحسن الجنيدى بطلق ناري إسرائيلي في رفح سيناء على الحدود مع غزة

يناير 2008 قتل المواطن حميدان سليمان سويلم (41 عاما) من رفح سيناء برصاص إسرائيلي أثناء ذهابه لعمله

فبراير 2008 قتلت الطفلة سماح نايف (14 عاما) برصاص القوات الإسرائيلية أمام منزلها على الحدود قرب معبر كرم سالم

مايو 2008 قتلت القوات الإسرائيلية المواطن سليمان عايد موسى (32 سنة) بحجة تسلله داخل الأراضي الإسرائيلية قرب كرم سالم

مايو 2008 قتل عايش سليمان موسى (32 عاما) برصاص الجيش الإسرائيلي عند منفذ العوجة

يوليو 2008 قتل الضابط بالجيش المصري محمد القرشي بنيران القوات الإسرائيلية برصاص إسرائيلي على الحدود

سبتمبر 2008 قتلت القوات الإسرائيلية المواطن سليمان سويلم سليمان (26 عاما) من منطقة القسيمة بوسط سيناء بحجة أنه حاول التسلل

ديسمبر 2008 قتل فلسطيني وضابط مصري في تبادل لإطلاق النار عند معبر رفح بعد محاولة العشرات من سكان غزة اقتحام المعبر هربا من قصف إسرائيلي، وقالت مصر إن الضابط قتل برصاص حركة حماس.

أغسطس 2009 قال الجيش الإسرائيلي إن جنوده أصابوا بالرصاص جنديا مصريا بعد أن ظنوا خطأ أنه "عدو يحاول التسلل عبر الحدود"

فيلم وثائقي عن البطل الشهيد سليمان خاطر

مدام جانجاه

برنامج "ولاد الحرام مسابوش لولاد الحرام التانيين حاجة" راديو ميجا اف ام 92.7 ’ رمضان 2011



مدام جنجا، ست مش حتقابلها كتير في حياتك، والحقيقة انك مش حتقابلها خالص اساساً لانها مبتمشيش في الشارع زينا، علاقتها بمصر عاملة زي علاقتك بهرم منقرع، زرته مرة قبل كده وبتقرا عنه في كتب التاريخ، وساعات بتضحك لما تسمع اسمه.
وحتى لما هي قررت تقوي العلاقة دي وتعيش فيها، برضو عاشت بطريقتها الخاصة، تصحى الصبح الساعة اتنين الضهر تاخد فطارها في جنينة الفيلا في الكومباوند اللي هي عايشة فيه، تعدي عليها الكوافيرة تسرحلها شعرها، مدام جنجا مش حتسرح لنفسها زي وزيك يعني، وبعد شوية المانيكير والباديكير والذي منه، تطلع قوام على الجيم، تمارس رياضتها الصباحية الساعة سبعة المغرب، نسيت اقولكم الجيم برضو في الكومباوند.
ترجع ترتاح وتتغدى وتكلم صاحباتها بروين، وشاهي علشان يسهروا النهاردة في المكان الفلاني، اللي هو مش في الكومباوند، بس في الكومباوند اللي جنبه، وهكذا يامعلم.
أقصى مجهود بتبذله مدام جنجا انها تحاول تكلم السواق بتاعها بالعربي، حاجة كده ياحرام زي "اتلا الا الجيم" مسكينة التعليم بره أكلها لسانها.
بس من كام شهر من الحسد والقر اللي في عينيا وودانكم مدام جنجا يا حرام جالها اكتئاب شديد، لانها مدام بروين صاحبتها الانتيم صارحتها بالحقيقة، ان الخدامة الفليبينية اللي هي خطفتها من عدوتها اللدودة لي لي واللي كانت شغالة في بيت وزير من الوزار الكبار اللي شرفوا في السجن، مكانتش رقم واحد عنده في الفيلا، وكان في قبلها واحدة اندونيسية راحت تشتغل عند لي لي.
ياحرام جنجا لبست الفلبينية

تيكا "دوجز"

برنامج "ولاد الحرام مسابوش لولاد الحرام التانيين حاجة" راديو ميجا اف ام 92.7 ’ رمضان 2011




تيكا دوجز، المرادي انا مختلف قلت الاسم والمهنة مرة واحدة، لا متفهمونيش غلط اللي حاتكلم عنه النهاردة لا هو شغال في مطعم بيعمل هوت دوجز، ولا هو كلب، بني أدم يا جدعان زينا بالظبط، بس هو الحقيقة غريب شوية.
من صغره وبيحب الكلاب لدرجة انه مبيصحابش غيرهم، ولما كبر والدنيا اجبرته يتعلم ويتخرج، اول ما اشتغل عمل مزرعة كلاب مع ان معاه بكالوريوس هندسة، وسماها بكل فخر "تيكا دوجز" ، وعملها كمان جروب على الفيسبوك.
بس مش هو ده الغريب اللي فيه خالص ، الغريب انه مثلاً ممكن يهوهو في نص الكلام، في الاول اللي بيكلمه بياخدها على سبيل التهريج، بس بعد شوية لما بيبدأ يشمشم فيه، بيقلق، وتبقى مصيبة لو زعله لانه حيعضه حيعضه.
مامته ياحرام اغمى عليها لما في يوم وهي بتنضف لقيته مخبي اكل تحت السرير، باباه جابلوا اكتر من عشرين عروسة، بس هو كل مرة يطلع فيها عيب، يقولك دي ودانه مش واقفة، العروسة دي الكسحة بتاعة رجلها مش تمام، لا دي عايزة تتشرس، والاخيرة ياعيني قوله ديلها بيقول ان جدها كان بلدي.
المشكلة الجديدة اللي ظهرت كمان انه مبقاش مركز مع حمام البيت، ابوه بقى مضطر ياخده كل يوم يمشيه في الشارع علشان يعمل زي الناس، او مش زي الناس قوي يعني، بس اللي زاد الطينة بله انه مبقاش عاجبه يمشي جنبه كده، لا بيطالب بطوق وسلسلة، بجد ربنا يكون في عون ابوه.
تيكا ياجماعة سابوا من عالم البشر خالص، وعاش في عالم الكلاب، معرفش ده هروب من المجتمع وأزماته، ولا هو اللي بيحب العضم.

17‏/08‏/2011

طرطرة

عيل راح عالحيطة يطرطر .... يرسم قال بالشخة مدينة

صاحبه معدى عاكسه وهزر

طرطش خلى مدينته... بقت عالحيطة مدينة حزينة

حفرة فى جنب الحيطة.... حفرها واحد غيره

نقرة فى قلب مدينته صريحة

واحد تانى كتر خيره

جاب طباشيرة كتبها صريحة

"يسقط يسقط حكم العسكر"

كشر لحظة صاحبنا وفكر

بص وراه اتعفرت صفر

شافهم حاصروا الحيطة اتحصر

رصوا كلام جامد فى المحضر

ان صاحبنا "حمامته" وسيلة

لقلب نظام الحكم العالى

قال يطاوعهم تبقى جميلة

مد دراعه وجاب سكينة

وضحى بحلم رجولته الغالى

تانى يوم الصبح وبدرى

دهنوا الحيطة زيت وفخيم

عدى صاحبنا المخصى الفقرى

كتب بالدوكو ... كلام مفهوم

"عاش المجلس يسقط غيره

الفاتحة لذكرى المرحوم"


إيمان قدري

برنامج "ولاد الحرام مسابوش لولاد الحرام التانيين حاجة" راديو ميجا اف ام 92.7 ’ رمضان 2011




ايمان قدري، شابة مصرية مختلفة، علاقة اي بني أدم بيها بتتوقف على قدرته على السمع، وطولة باله، وصبره لأنه بمجرد ما حتشوفك أو حتكلمك في التليفون انت يادوب حتقول ألو وخد عندك" انت فين من زمان، كنت في سيرتك امبارح مع مروة، مروة خطيبة ماجد، عارف ماجد اللي كان بيلعب بنج بونج في نادي الزمالك اللي كان عيان، بس خلاص اتعالج عند الدكتور حازم، اصل الدكتور حازم شاطر قوي على فكرة عيادته في وسط البلد، بمناسبة وسط البلد تخيل أول امبارح وانا ماشية هناك في حرامي سرق شنطتي، تخيل الناس بقت عاملة ازاي، بس الحمد لله عادل الظابط خطيب شريهان جابهالي، عارف شريهان مين اخت مروة اللي كنت بجيب في سيرتك معاها امبارح"
واتحداك يا مسكين لو لحقت تفتح بقك ونطقت كلمة، وبغض النظر عن انك ممكن تكون متعرفش ولا اسم من اللي اتقالوا في المكالمة، وان دي يادوب الافتتحاية بس وانا شخصياً مش حقدر اكملها علشان وقت البرنامج، بس ايمان عقاب الهي بيصيب كل اللي يعرفوها، وبتلاقي اودانهم بعد فترة كده بتدلدل، وياحرام بيجيلهم فوبيا التليفونات.
ايمان مكنة رغي متنقلة، اول ما بتدوس على الزرار بتنطلق، وللاسف نسيوا يعملولها زرار ايقاف، لما بشوف نمرتها على تليفوني بابقى متأكد اني عملت حاجة غلط النهاردة وربنا بيعاقبني.
عارف انكم مستغربين وبتسألوا " طيب بترد ليه يا فالح.
نسيت أقولكم ايمان دي مديرتي في الشغل، ايه ده أنا أصلاً مقولتلكوش أنا شغال ايه، أنا شغال مدرس اشارة في مدرسة للصم والبكم.

16‏/08‏/2011

محسن القليوبي

برنامج "ولاد الحرام مسابوش لولاد الحرام التانيين حاجة" راديو ميجا اف ام 92.7 ’ رمضان 2011




محسن القليوبي، هو بيحب ينطقها كده، بيعتبر أليوبي دي شتيمة وميصحش واحد في ثقافته يتنازل عن انه يتنادى باسمه صح، محسن بقى مثقف اصلي من مثقفين وسط البلد، اللي هما مطولين شعورهم، لابسين بنطلونات جينز مسمعتش عن اختراع الغسالة، لابسين نضارة ودقنهم دايماً طويلة، ضاربين تحت باطهم كتاب أو اتنين، ومعلقين على ضهرهم شنطة فيها اللاب توب بتاعهم، ومتسألنيش ليه مش حاطين الكتب في الشنظة لاني معرفش.
محسن القليوبي لازم لما يتكلم ينظر، تحس كده وهو قاعد على القهوة البلدي بيضرب القهوة في كوباية طبعا، انه واقف على مسرح بيخطب في المعجبين، ولازم يستشهد في كلامه بأراء فلاسفة وكتاب مشاهير، وياسلام لو اتريق على رأي واحد فيهم بس علشان يأكد للمستمعين ان عنده وجهة نظر.
محسن عادة مبيبقاش في جيبه اكتر من 3 جنيه، بيدفع بيهم حق القهوة، اللي هو اتنين جنيه ونص، ويروح بالنص جنيه اجرة اي توك توك.
من مستلزمات اي محسن برضو مزة من مزز وسط البلد، اللي هما برضو بيشبهوا بعض كتير، جينز وكوتشي وشعرها لاماه ببندانه، وعلى كتافها شال علشان القضية الفلسطينية، وطبعا بتشرب شيشة، محسن بيشرب سجاير برضو بس حسب الظروف، مصري مستورد مش مهم، المهم انه ينفخ الدخان في وش اللي بيكلمه.
محسن واحد من مئات المحاسن، قصدي المساوىء بتاعة مدعين وسط البلد، اللي عمق ثقافتهم ميزيدش عن رغيف كايزر، حافظين كام كلمة وبيرددوها من غير فهم ولا معنى، معارضين كل شىء حتى وجودهم.
لو حصل وشفتوه يوم في الأيام، متحاولوش تقنعوه يسرح شعره، ولا يغسل بنطلونه.
بس نادوا عليه بصوت عالي وقولوا يا أليووووووووووووووووبي

15‏/08‏/2011

خالد زكي

برنامج "ولاد الحرام مسابوش لولاد الحرام التانيين حاجة" راديو ميجا اف ام 92.7 ’ رمضان 2011



خالد زكي.. الشهير بـ"بعلزبول"، وبعلزبول دي يعني ابن الشيطان، بس ده كان وهو صغير، لان خالد بعد ما كبر قدر يثبت ان الشيطان نفسه مبقاش شاطر، لا ويمكن كمان يطلع معاش قريب.
خالد بيحب أي حاجة غلط، أو شمال يعني زي ماهو بيقول، يعملها من غير مايفكر، وعنده قدرة كمان يخللي اللي حواليه يعملوها وهما مقتنعين، لدرجة ابليس يا جماعة شخصياً كان بيكلمه يستشيره في حاجات كتير، وخالد لأنه مجدع وصاحب صاحبه بجد، كان بينصحه بكل اخلاص.
حتى زي اليومين دول في رمضان وابليس متسلسل في جهنم، بيبقى عامل حسابه وسايب لخالد ليستة بالحاجات اللي مخلصتش علشان يعملها مكانه، ولما بيرجع في العيد مبيسألوش لأنه متأكد ان خالد اكيد عملها احسن منه، ثقة متبادلة بين الاتنين.
خالد اساساً بيشتغل سلزجي، اه سلزجي يعني سيلز مان، مبيعات يعني بس هو بينطقها كده، وعلشان امكانياته المذهلة في الشيطنة يقدر يبعلك بيتك مرتين وتلاتة، رغم انه اصلا ملكك،ويبقى كمان عاجبك السعر وعايز تزودله بعلزبول ياجدعان.
ولكن برضو لانه في الاساس بني ادم، فميخلاش من كام حاجة حلوة، مثلاً يعني أي سفرية للساحل متحلاش من غيره، أي عطاية كده عطاية كده يا سلام لو هو فيها، النفسين من غيره ولايسووا.
خالد علامة مميزة حيفتكرها التاريخ لان زي ما كلنا عارفين ان اسلحة الشيطان في الاغراء تلاتة و هما الفلوس والستات والكيف زاد عليهم اليومين دول السلاح الأهم اللي هو خالد زكي.
اللي قبل ما تفكر في يوم انك تعمل حاجة شمال غلط يعني ، حتلاقيه واقف جنبك بيساعدك بس انت قرر وانوي وسيب الباقي عليه.

14‏/08‏/2011

حسني مبارك

برنامج "ولاد الحرام مسابوش لولاد الحرام التانيين حاجة" راديو ميجا اف ام 92.7 ’ رمضان 2011



فلان الفلاني... السن كتيييير تقريبا كده معدي التمانين، لا بيفهم ولا عايز يفهم، يمكن بحكم السن، ويمكن بحكم الغرور المهم انه دايما راكب دماغه والسلام.
فصيلة دمه ميم، ولما سألنا عليها الدكاترة قالوا يعني مفيش، مواصفاته ايد طويلة وضنير معدوم
بس الحقيقة هو عنده هوايتين كل واحدة فيهم اغرب من التانية، الهواية الاولى انه يبني كباري، في كل تقاطع، أو ميدان عمل كوبري، ولما سالنا دكاترة علم النفس قالوا ده دليل انه اتحرم يلعب بالميكانو وهو صغير، وزي ما احنا عارفين عقد الطفولة بتأثر فينا لما نكبر.
الهواية التانية الكراسي، واقع في غرام كرسيه، لدرجة انه لزق عليه سنين،وبيقول اسطوات النجارة عن الهواية دي ان اللزقة دي ميكفيهاش ولا ألف كيلو غرة، أما أصحاب المكتبات فبيقولوا انه علشان اللزقة دي كان محتاج يستورد كل انتاج العالم من الصمغ ييجي عشر سنين.
سمعه ضعيف، مبيسمعش غير نفسه، نظره اضعف من سمعه، فمشافش اي حاجة صح، اما احساسه فشبه معدوم علشان كده كان مستحيل يحس باللي بيحصل حواليه.
واللي حواليه ما بين قواد وطبال وحرامي، بيلاقي نفسه وسطهم ، وكأنهم بالظبط عصابة مافيا، وبيقول في ده العصبجية القدام اصحاب الخبرة الاجرامية انه راجع لكونه وهو صغير مكانش العيال زمايله في المدرسة بيرضوا يلعبوه معاهم عسكر وحرامية.
كمان وهو صغير المدرس بتاعه قاله والله ما انت نافع، ولما جاب تمانية واربعين في الميه في ثانوية عامة، اتاكد ان كلام المدرس كان صح، والايام بعد كده اثبتت ده جدا.
بصراحة انا نفسي مجبتنيش أقول اسمه في أول الحلقة ولا اخرها، وانتم برضو أكيد عرفتوه، اللي فقرنا وهبرنا وخرب البلد على دماغنا
اقولكم لو مش عارفينه، حتلاقوه في شرم الشيخ

13‏/08‏/2011

هند ياثين

برنامج "ولاد الحرام مسابوش لولاد الحرام التانيين حاجة" راديو ميجا اف ام 92.7 ’ رمضان 2011




هند ياثين، شابة مصرية طموحة جدا، من وهي صغيرة وهي بتحلم تبقى مذيعة، والبنت بصراحة عملت كل اللي عليها، ذاكرت واجتهدت وجابت مجموع دخلها كلية الاعلام واتخرجت وطلعت من الاوائل.
بس هند كان عندها مشكلة واحدة بس، هي صحيح مشكلة بسيطة بس وريتها الويل، المشكلة دي ان هند لذغة في السين اللي بتنطقها ثه، وكمان في الريه اللي بتنطقها لام.
علشان مده مفيش ولا قناة ولامحطة ولا اذاعة ولا حتى كوباية زبادي رضيت تشغلها مذيعة، جابت ييجي فدانين كوسة، علشان تشتغل بس ياحرام منفعش، بس هي عمرها ما يأست.
وفي عز ما كانت الثورة مشعللة ، وهند بتهتف في ميدان التحرير من كل قلبها "الشعب يليد اثقاط النظام" اتعرفت على أحمد ثلي مراسل قناة من قنوات الاخبار الاجنبية، وكيوبيد عمل عمايله وحبوا بعض خلال أيام بسيطة.
أحمد كأي حبيب يعني قرر يساعدها في تحقيق امنياتها، سجل معاها تقرير عن الثورة، اتشاف على اليوتيوب حوالي اربعين ألف مرة في يوم واحد ، كسر الدنيا يعني، صحيح الناس كانت بتشوفه علشان تضحك وهند بتقول " حثني لازم يمشي، لو لاجل ياخد قلاله بالتنحي، احنامش حنلوح بيوتنا، لازم يفهم انها ثولة، والثولة دي ثلها لغبة الشعب في التغييل، وشعالها الشعب يريد اثقاط اللئيث".
بس برضه هند مهماش، واعتبرت ده في حد ذاته نجاح لدرجة انها شيرت الفيديو ده عندها على الفيسبوك اكتر من عشرين مرة.
والنهاردة واحنا في الشهر الكريم ده، أحب أقولكم ان هند اشتغلت مذيعة، ايوة هند اشتغلت مذيعة، صحيح بلغة الاشارة للصم والبكم في قناة دينية، بس اشتغلت مذيعة، بس اللي نفسي اعرفه بقى هي لدغة كمان في لغة الاشارة ولا لأ.

سعيد نظيف

برنامج "ولاد الحرام مسابوش لولاد الحرام التانيين حاجة" راديو ميجا اف ام 92.7 ’ رمضان 2011




سعيد نظيف، اللي بمجرد ما بينطق اسمه الملايكة بيكتبوله سيئة علشان كدب، لانه بصراحة لا سعيد ولا نظيف، بس خلينا منتكلمش في موضوع هو ليه مش سعيد، علشان انا مبحبش اجيب في سيرة الناس، خلينا في موضوع مش نظيف ده، لانه تاعبني انا شخصيا ومكرهني ومكره نص شعب مصر في نصها التاني.
علاقة سعيد بالحمام غامضة جدا، وفي المرات النادرة اللي اتقابلوا فيها متفقوش مع بعض، لدرجة ان شركة الميه شكت في سعيد وركبتله تقريبا حسب ما عرفت عداد جديد بيقيس بالفيمو ميه على رأي الدكتور زويل.
ورغم كده عمر فاتورته ما زادت عن تلاتين قرش، انا اتهيألي هو بيكره الميه لدرجة انه مبيشربش كمان.
سعيد بقى موطنه الأصلى مترو الأنفاق، هناك بيلاقي نفسه وسط مئات من الروايح اللي تفتح القلب في عملية قلب مفتوح من الصدمة، بس اللي يغيظ انه عارف امكانياته، فعمره ما فرقت معاه زحمة، لانه اول ما يحس بالخطر وان الناس حتزنقه، هوب يروح رافع ايده ماسك ماسورة المترو، ومصدر للناس باطه اللي هو خط دفاعه الأول، يحصل نوع من الصدمة والرعب لكل اللي حواليه، تخليهم على الاقل يبعد من تلات لخمس خطوات، ولو كان المترو اوسع كانوا بعدوا اكتر.
سعيد طبعا عايش في البيت لوحده، لا حد بيزوره ولا بيزور حد، مين يعني حيستحمله، ولانه ميوعاش على باباه ومامته اللي تقريبا ماتوا هما الاتنين قبل ما يتولد، كانوا لما يسألوه في الفصل نفسك تطلع ايه لما تكبر، كان يسرح بخياله ويرد بكل حب ويقول : شجرة صبار
سعيد ياجماعة عنده مبدأ، أكيد حنختلف معاه فيه، بس لازم نحترمه، فمش لازم لو قابلتوه في الشارع يبان على وشكم القرف، علشان منجرحهوش، وده طبعا حيفرق حسب التوقيت اذا كان شتا ولا صيف، وطبعا الشتا أرحم بكتير.
بس انا نسيت اقولكم حاجة، ان سعيد نظيف المواطن المصري شغال في مرفق تجميل القاهرة.

12‏/08‏/2011

لعنة الفراعنة


مصر دولة عريقة، ليها تاريخ ممتد لاكتر من سبعتلاف سنة، زرع فيها تقاليد كتير زي تأليه الحاكم مثلاً، وده طبعا ميراث أجدادنا الفراعنة، لكن اللي احنا اكتشفنا حقيقته اليومين دول هو "لعنة الفراعنة"، اللي مطلعتش بتموت الناس وتدمر حياتهم لما يكتشفوا ويدخلوا مقابر الفراعنة العظام، لا... دي طلعت لعنة حطوها على كراسي السلطة في مصر.
أيوة لعنة الفراعنة هي لعنة اصابت كراسي السلطة في مصر، فتلاقي المسؤول من أول عضو مجلس محلي لحد رئيس جمهورية يبقى طيب ولذيذ كده قبل مايقعد على الكرسى، تصيبه ياحول الله لعنة الفراعنة يتحول وينسى أول ما ينسى الشعب اللي حطه على الكرسي ده.

الغريب ان الكرسي اللي بيعتبروه في الدول المتقدمة مجرد قطعة من الاثاث، اتحول بقدرة قادر في مصر لحلم، وهدف، وطريقة مثالية لرحلة المليار، وهو ده الفكر الجديد .
لعنة الفراعنة اتطورت في أخر تلاتين سنة علشان متكونش بس خاصة بالسلطة، لا كمان تبقى خاصة بالثروة، وبكده نقدر بكل فخر نواجه العالم كله ونتحدى كل المشككين في اصولنا الفرعونية ونقولهم، احنا المصريين أحفاد الفراعنة العظام والدليل اننا حافظنا على لعنتهم لا وكمان طورناها.

تعالوا بقى معايا نتكلم مثلا عن وظيفة رئيس الجمهورية، بصفتها صاحبة اكتر كرسي اصابته اللعنة دي، واللي سياسيا ودوليا وحتى بتحاليل الدي ان ايه ثبت انه مش أب للشعب، ولا اله مقدس وانه يادوب موظف حكومي بدرجة رئيس جمهورية وظيفته حسب المادة (73) في الدستور انه يسهر علي تأكيد سيادة الشعب‏ ، وعلي احترام الدستور‏،‏ وسيادة القانون‏،‏ وحماية الوحدة الوطنية‏ ،‏ والعدالة الاجتماعية‏ ،‏ ويرعى الحدود بين السلطات لضمان تأدية دورها فى العمل الوطنى‏. وطبعا ده اللي مبيحصلش خالص ولا عمرنا ما شفناه.
بس استنوا كده اتهيألي ان في جزء تاني من اللعنة دي كمان نسينا نتكلم عليها، الجزء اللي بيصيب الشعب بمجرد ما يشوف حد على الكرسي، ويقرر انه يحس باليتم فجأة ويبقى الريس بابا وماما وانور وجدي،لا والمصيبة الاكبر انه ساعات بيعبده، فرعوني فرعوني يعني، بس هواية عبادة الحاكم المرادي مش لعنة، ده اثبات نسب باننا مصريين فراعنة.



11‏/08‏/2011

أحمد عزت

برنامج "ولاد الحرام مسابوش لولاد الحرام التانيين حاجة" راديو ميجا اف ام 92.7 ’ رمضان 2011


احمد عزت شاب مصري طموووح، حاصل على بكالوريوس تجارة زي تمنتاشر ألف واحد بيتخرجوا سنويا، بيشتغل مندوب مبيعات في شركة عطور زيه زي غيره كتير، الفرق الوحيد بينه وبين غيره، ان احمد عنده مشروع شخصي، وبيشتغل على نفسه فيه.
نسيت اقولكم معلومة مهمة، احمد عزت منوفي ، وده في حد ذاته شىء عادي جدا، لكن عند أحمد لا ده شىء مش عادي.
أحمد اللي بيعتبر المنايفة اصحاب دم ازرق ملكي، وانهم كانوا دولة مستقلة من الاف السنين، قبل ما يتحدوا مع مصر ويحكموها، وبان اصول الفراعنة المنوفية اخفاها المؤرخين من الحقد والغيظ على الشعب المختار ده، تديله الحق في يوم انه يحكم مصر.
ايوة بمنتهى الصراحة أحمد بيحلم يحكم مصر، يبقى رئيس جمهورية، ولانه مدخلش الكلية الحربية، رغم انه قدم فيها اكتر من مرة، الا ان الامل ده اتجدد بعد ثورة 25 يناير ومطالبة الثورة برئيس مدني.
احمد ياجدعان مكدبش خبر، اشترى بكل ما يملك حوالي عشرين كتاب ايشى الليبرالية في غياب منظومة العدالة، الاشتراكية الحلم والكابوس، وهاتك يا قراية وتثقيف، ريس برضو لازم يعرف يتكلم وياخد ويدي، ضرب في السريع كورسين انجليزي، يخلوه على الاقل يعرف يقول ويلكوم ان ايجيبت.
اشترى كمان حوالي ست بدل بالتقسيط، وروح البلد طلب من والدته انها تطرزله اسمه على كل بدلة، جاب كل فيديوهات ناصر والسادات ومبارك من على اليوتيوب، وقدر يوصل لاسلوب تعامل الرؤساء في بر مصر، وفهم كويس انه مطلوب جدا انه يسمع بس، وبعد كده كأنه مسمعش حاجة، يعمل اللي هو شايفه، فهم كمان، انه بجنب البدلة محتاج برنامج انتخابي للترشيح، مش مهم انه ينفذه المهم انه يعرف يقدمه، ولانه مقتنع بمبدأ ان اللي بيقول مبيعملش، فالبرنامج فرصة انه يقول علشان ميعملش.
لكن أحمد للاسف عنده مشكلة واحدة، مش مخلياه ينام ولا ليل ولا نهار.
المشكلة دي انه مش المنوفي الوحيد في مصر، وان في اكتر من مليون منوفي ممكن يكونوا بيحلموا نفس الحلم، وانا بما اني انا كمان منوفي، بقوله عندك يا ابوحميد، انا كمان عايز ابقى رئيس جمهورية.
ووريني بقى مين اللي حيفوز.

سيد سلائون

برنامج "ولاد الحرام مسابوش لولاد الحرام التانيين حاجة" راديو ميجا اف ام 92.7 ’ رمضان 2011



سيد سلائون
مواطن مصرى
كتير منكم ميعرفهوش... لا تقريبا محدش يعرفه من اساسه
وانا النهاردة جى اعرفكم بيه
الاسم سيد سلائون .... سيد دى عارفينها انما سلائون ده اسم شهرة جه من مهنة ابوه
والسلائون دى مادة بيدهنوا بيها الخشب وابوه انتحر بشرب كمية مهوله منها
حاجة كده تدهن خشبتين مسرح
السن فشلو فى تحديده ولما غلبوا قالوا معدى التلاتين
الاب متوفى والام شبه متوفيه
يعنى مش ميته لكن باقى فيها نفسين
المهنه ولا حاجة عاطل من ضمن العاطلين
حاسس بسؤال بيتنطط جواكم كلكم
طيب بتكلمنا عنه ليه
ماهو واحد زى الملايين اللى بيمشوا فى الشارع
ومحدش حاسس بيهم
ولا زى ما بيقولوا فى الجرايد احد المهمشين
لكن يا جماعة سيد عنده ميزيتين
انه واحنا صغيرين كان بطل اسطورى بالنسبة ليا
كان بطل الشارع لا قول بطل العالم فى لعب البلى
عمر ما واحد عرف يكسب منه بلية واحدة لدرجة انى فى وقت من الاوقات اتخيلت انه حيشارك ضمن البعثة المصرية فى اولمبياد لوس انجلوس 84
كان عليه مسكة بليه ولا ابوتريكة وهو منفرد بالجون
ولما كبرنا وبطلنا بلى استمر سيد فى رياضته المفضلة
وفضل يكسب بلى اكترواكتر
الميزة التانية ان سيد مختل عقليا ايوه
مختل عقليا ودى حقيقة مهمة قوى لمستقبل سيد
لانها بترشحوا للعب دور مهم قوى فى المستقبل
مش بس مستقبله هو لا مستقبل مصر كلها
وترشحه
انه يكون بطل غلاف لجرايدنا القومية خلال وقت قريب
لما يتم اتهامه مثلا بحريق المسرح القومى
ولا اغتيال فلان بيه المهم ولا جريمة فتنة طائفيه
سيد يا جماعة مشروع نجم
لازم كلنا نهتم بيه
فافتكروا ملامحه كويس
طويل اسمر شعره اكرت عينيه دايما معمصة
وايديه بتوصل لركبه وهو ماشى تقريبا ده سر تفوقه فى البلى
حروفه كلها شبه بعض الالف بالظبط شكل البه
يعنى مش حتفهم منه كلمه وده حيسهل عليه قوى الاعتراف بالجريمة
عرفتوا بقى سيد سلائون
البطل الاوليمبى ونجم المستقبل

10‏/08‏/2011

حمادة رجب

برنامج "ولاد الحرام مسابوش لولاد الحرام التانيين حاجة" راديو ميجا اف ام 92.7 ’ رمضان 2011


حمادة رجب
بقال حتتنا
محدش يفتكر ان ده اعلان مدفوع الاجر لاسمح الله
بس انا لازم احكيلكم عن حمادة
صاحب محل بقالة فى شارع من الشوارع الجانبية فى مصر الجديدة
المحل تقريبا اتنين متر فى تلاته متر
علق عليه يافطة كبيرة كتب عليها اولاد رجب
وتقريبا حد فهمه ان ده انتحال شخصية سوبر ماركت بحالوا
فحط كارتونة بيض دارى بيها كلمة رجب
وبقى اولاد بس
باشوف حمادة يوميا بقالى اكتر من خمسة وعشرين سنة
لكن لحد دلوقتى ما اقدرش اوصف غير نصه الفوقانى لان نصه التحتانى دايما متدارى ورا فاترينة عريضة فيها لبان وبسكوت
ويمكن اشهر حاجة بتميز حمادة صلعته اللى مدياه شكل ستاند من الاستاندات اللى بيعرض عليها بضاعته
الاظرف كمان انه كان من اشد المعارضين للنظام القديم
وكان بيقاومه بطريقة مبتكرة ...انه بيغلى الاسعار تقريبا كل 8 ساعات
الغريب ان حماده عامل للاسعار شيفتات والاغرب ان اهل حتتنا المعارضين بيأيدوه ويشتروا منه
كمان بقى جنب موقفه الثوري ده كان عنده هواية عظيمة، انه
بيغش كمان فى الميزان، اصله مدارى الميزان ورا كوم من علب السمن عشان متشوفش قرايته
وفي يوم من الايام استفزتني الحركة دي وانا باشترى منه تمن لانشون اضربه فى رغيفين كايزر
وروحت قايله يا حمادة القرأن بيقول ويل للمطففين
والمطففين دول اللى بيغشوا يعني فى الميزان
قام ضحك بصوت عالى قوى
ضحكة اتهزت ليها قرعته
وقالى يا حبيبى ده كان ايام ما كان فى كفار
اما هو من حقه يغش فى الميزان
حمادة يا رجب يا بقال حتتنا
وانا باعملك اعلان اهو على ميجا اف ام
بوجهلك نداء انسانى
خلى الاسعار شيفيتن بس لانى مش عارف اكل لانشون
ربنا يخليك يا حمادة

مصطفى كامل

برنامج "ولاد الحرام مسابوش لولاد الحرام التانيين حاجة" راديو ميجا اف ام 92.7 ’ رمضان 2011


مصطفى كامل
لا لا فكركم ميروحش بعيد كده
مش قصدى المطرب العظيم
ولا الزعيم الوطنى اللى متسمى على اسم المطرب
انا قصدى بنى ادم كده زينا عايش معانا وحوالينا
بس هو مختلف
بجد مختلف
لانه مدمن سلف
اه لو مستلفش ممكن يهرش فى جسمه كله
ولانه مؤمن بمقولة السلف تلف والرد خسارة
عمره ما رد لحد فلوسه عشان ميخسروش
لا صديق عزيز عزيز بصراحة
المهنة اشتغل فى اى حاجة ممكن ياخد بيها بضاعة اجلة ميدفعش فيها فلوس
عشان يبيعها ويختفى وصاحب البضاعة ينوبه حرقة الدم
ربنا ادالو موهبة تمثيل لو اشتغل بيها
كان زمانه واخد جايزة مهرجان بنها السينمائى المحلى
يدخل على الواحد من دول يحكيله عن اعماله واستثماراته
ويعمله البحر طحينة
تانى او تالت يوم تلاقيه مربى دقنه اللى بتطلع تقريبا بمزاجه
يقولها اطولى هوب تملا وشه كله مكتئب بقى
ويخش عليك يشتكى نقص السيولة اللى حيخسره وحيخرب بيته
ويميل عليك كده ويقول بكسوف ممكن تسلفنى كذا وان شاء الله بعد بكره تكون فلوسك عندك ....دايما بيقول بعد بكره
وبعد بكره مش حتلاقى حتى طحينة البحر ومش حتلاقيه
نصاب ومحترف
انا شخصيا استلف منى تلت مرات
لا مش عبط منى
مقنع يا جماعة والله مقنع
تخيلوا بنى ادم استلف من اكتر من ألفين بنى ادم تانى
ومرجعش بريزة مش يبقى مقنع
بنى ادم شعاره اقفش فلوسك وبعدين يبقى القطر يدوسك
يعنى ياخد اى حاجة منك ويبقى يحلها حلال
مصطفى كامل
بنى ادم وشه مكشوف
ويمكن من كتر ما كشفه مش باقيلو وش
فاوعى يطلعلك فى طريقك
لانك حتسلفه غصب عنك
وهو مش حيرضالك الخسارة

عمرو عربي

برنامج "ولاد الحرام مسابوش لولاد الحرام التانيين حاجة" راديو ميجا اف ام 92.7 ’ رمضان 2011


عمرو عربي..... لا لا عمروووووووووو ده الاسم اللي هو بيرد عليه، لانك لو قولتله يا عمرو حيعتبرك بتكلم واحد تاني غيره خاااااالص
المهنة بيشتغل وخلاص مش مهم ايه، المهم انها شغلانة ينفع يزوغ منها ساعتين الصبح ويقعد على القهوة، يضرب الفطيرة المشلتتة التمام، وحوالي 12 حجر شيشة.
عمروووو أول مدمن شيشة حقيقي في مصر، بعد ما بيخلص وصلة الصبح بيروح يمضي في الشغل، اللي مش مهم هو ايه،وجري يتغدى في البيت بسرعة وينامله ساعتين ينزل يروح بعدهم القهوة موطنه الأصلي.
اتهيألي كمان حتى وهو نايم بيبقى ماسك في ايده مبسم، لان اللي عرفته من تاريخ العيلة انه مكنش وهو صغير بياخد تيتينة في بقه زي بقية العيال الصغيرين علشان ميعيطش، لا كان بياخد مبسم شيشة حقيقي.
المهم انه على المغربية كده يكون مشرف على القهوة، واخد الشيشة بالحضن، لحد واحدة بالليل، ويقضيها بقى اما طاولة، أو يحلل ماتشات، مش مهم ، المهم ان الشيشة متفارقش بقه.
بس من كام يوم ياعيني درسه كان واجعه، ووشه ورم خالص لدرجة انه بقى تقريبا عنده وش تاني، بقه مبقاش بيتفتح ومحتاج اجنة يتفش بيها، كلنا ساعتها قولنا ده مش محتاج دكتور اسنان، ده محتاج واحد عجلاتي.
لكن عمرو مكنش فارق معاه حتى الوجع، وكان بيصرخ واحنا بنحاول نوديه المستشفى ويقول ودودني على القهوة، انا عايز اروح القهوة.
وفي الاخر هو اللي كسب ورحنا القهوة الاول، مسك لي الشيشة بايده والدمعة حتفر من عينيه، وقعد يدور على فتحة بقه في الوشين اللي بقوا عنده، واضطرينا نشده رغم تأثرنا بالموقف العاطفي في مشهد زي مشهد محمود المليجي في نهاية فيلم الأرض بالظبط.
وبعد ما خلصنا عند العجلاتي، قصدي الدكتور، وبعد ما عمرو ووو شال الخراج، عزمنا كلنا على زبادي بالفواكه في القهوة اللي قدام المستشفى، وهو حاضن الشيشة وبيقول، حد فيكم معاه فلوس يدفع الحساب.

هايدي

برنامج "ولاد الحرام مسابوش لولاد الحرام التانيين حاجة" راديو ميجا اف ام 92.7 ’ رمضان 2011


هايدي، اه والله العظيم هايدي،بس اصحابها بيدلعوها يقولولها يا "هاي" ، الاسم تقيل يا جماعة برضو عليهم.
هاي بقى طالبة في الجامعة الامريكية، طالبة شاطرة جدا على فكرة، بس عندها مشكلة ضخمة جدا مبتخليهاش تعرف تنام.
كل واحد مننا ياجماعة فيه اللي مكفيه، ربنا يكون في عونها وبعيد عن السامعين يعني الشر بره وبعيد، مفيش اي لينير ولا ماسكارا بتستحمل دموعها، كلهم بينزلوا ساعة العياط وبيبقى شكلها مبهدل خالص، وهايدي اللي هي "هاي " يعني دمعتها قريبة، انهارت مثلا يوم الحلقة الاخير لاوبرا وينفري، مهانش عليها وداع اوبرا، بكت بالدموع جدا في حلقة فريندز اللي اتطلق فيها روس وراشيل ، وقعدت ياحرام 3 ايام مبتاكلش.
البنت حساسة بزيادة، مشكلة الاي لينر، والماسكارا قلبت حياتها جحيم، حاولت بكل الطرق ودورت في كل مكان لحد ما "سو" صاحبها الانتيم اللي هو اسمه احمد السوهاجي اصلاً ما قالها انه كان في بيروت الويك اند اللي فات مع صاحبتهم سوشي واشترت قدام عينيه ماسكارا ووتر بروف.
هاي عملت اللي عليها و خدت سو بالحضن، وفي اول ويك اند كانت في بيروت بتشتري الماسكارا الووتر بورف، ومنسيتش طبعا تجيب هدية ل"سو" اللي حل مشكلتها، نص دستة بوكسرات من النوع اللي بيحبه.
بس للاسف لان "هاي" مش محظوظة، وحظها في الدنيا قليل، لما روحت عرفت من بواب الفيلا بتاعتهم ، ان اخوها "ديدي" عمل حادثة بعربيتها وهي مسافرة، وانه في المستشفى دلوقتي.
ولان "هاي"حساسة جدا و بتموت في اخوها الصغير، اصرت قبل ما تجري تروح للمستشفى تطمن عليه، انها تحط الماسكار الجديدة، علشان تجرب تعيط براحتها على اخوها، وبالمرة كمان على عربيتها.

09‏/08‏/2011

أنصاري

برنامج "ولاد الحرام مسابوش لولاد الحرام التانيين حاجة" راديو ميجا اف ام 92.7 ’ رمضان 2011



انصارى
الشهير بفيس
شاب مصرى
عمره تقريبا اربعة وعشرين سنة
بيشتغل فى السياحة
بس بجد انصارى مثال حقيقى للشاب المصرى العصري
قلت اقدمه عشان ميبقاش كل واحد قدمته كان مثال سلبي ولا حاجة، خاصة بعد دور الشباب العظيم في ثورة 25 يناير، واللي أنصاري عمره ما كان واحد منهم
وعلشان كمان محدش يقول اني جي أشوه سمعة الناس كلها
اخترت انصاري ك مثال ناجح لشاب بيشق طريقه واقدمه
صحيح هو بيشتغل بالعافيه وبالزق بس بييشتغل
بيشرب سجاير وايه يعنى هى جت عالسجاير
كسلان جدا لدرجة ان اهله سابوه فى البيت تلات ايام رجعوا لقوه على نفس الكرسى
ونفس القعدة وبيتفرج على التلفزيون وقرب يموت من الجوع والعطش
لكن يعنى ده احساس بالثقة فى النفس والتعالى عن الصغائر
مرتبه بيخلص يوم 2 فى الشهر
وايه يعنى راجل فييس
عينه زايغة ومضيع فلوسه علي صحباته
رائع ده يطمنا على شباب المستقبل
مش فاهم حاجة من اللى بتحصل حواليه خالص
ويمكن كمان مش واخد باله
الله عليك يا ابنى بجد قدوة
ممكن ينام خمس ايام متواصلة
يبقى مؤمن بشعار ان الراحة عبادة
معندوش طموح ومش فارقة معاه
ده لان نظره بعيد وفاهم اللى فيها
ياجماعة انصارى من هواة الكرسى العالى
راجل رياضى رفع كل بارات وسط البلد ومصر الجديدة
بس فيه عيب واحد بس
حاقوله عشان اثبتلكوا ان مفيش حد كامل وزي ماقالوا زمان الحلو مبيكملش
انصارى للاسف
بيتكلم فرنساوى
تخيلوا بيتكلم فرنساوى
بس احنا كمان لازم نسامحه
لانه مثل وقدوة
ونشكر ربنا ونطلب رحمته ان مصر
لسه فيها شباب زى انصارى

بــوجي

برنامج "ولاد الحرام مسابوش لولاد الحرام التانيين حاجة" راديو ميجا اف ام 92.7 ’ رمضان 2011



بوجي،بالوظة ، فيشو دي اسماء الدلع لبني ادم زينا تمام، يمكن ميشبهناش قوي لانه يشبه سيخ الشاورمة اكتر ، ويمكن كمان ألذ من الشاورمة، ، لكن برضو بني ادم بس موهبته وميزته الأساسية هي الفشر، ومن هنا جه دلع فيشو، لانه صعب جدا يتكلم تلات كلمات ورا بعض، ميكونش في نصهم فشرة، لدرجة ان نص اصحابنا ميعرفوش لحد دلوقتي مين ابوه وامه واخواته الحقيقيين، انا شخصيا اكتشفت ان في 3 اصحابه فاكرني أخوه، وقال ايه اتأكدوا لما لقوني بحب الشاورمة.
المشكلة الحقيقة بقى في التعامل مع بلبل هي الازمات اللي بيمر بيها، مبتبقاش عارف كصديق المفروض تقف جنبه وتساعده، ولا تعتبر المشكلة اللي بيحكيهالك فشرة جديدة، وهاتك يا افيهات عليها، وده طبعا بيجرح مشاعره لو كانت المشكلة حقيقية، بس الحل اللي اتوصلناله بعد شوية، انك لما يحكيلك مشكلة تسكت خالص، وتقوم متصل بصاحب مشترك بينكم، تخلي بوجي يحكيله المشكلة من اول وجديد، ،وهو غالبا و عمره ما حكى حكاية مرتين زي بعض، فده حيخليك تكتشف اذا كان بيفشر ولا بيقول الحقيقة، وغالبا حيطلع بيفشر.
لكن بصراحة اخر مرة كان شكلي وحش قوي، لما قالولي ان بوجي رجليه اتكسرت في الثورة، قلت ييه فشرة جديدة، من امتى يعني وبوجي بتاع ثورات، واكتشفت بعد عشر ايام ان فعلا رجليه كانت مكسورة.
اتكسفت قوي من نفسي، رحت واخد بعضى وجريت على بيته، اللي يارب يطلع بيته، وهناك سمعت قصة كسر رجله مرتين مرة منه ومرة من ابوه، مرة يوم جمعة الغضب ومرة يوم جمعة الرحيل، وهناك قابلت عم حنفي جاره اللي هو كمان كان بيزوره، اللي ياحرام وهو ماشي كان بيعتذر جدا لبوجي وابوه، انه خبطه بالعربية وهو بيركن، لما بوجي كان واقف تحت البيت قال ايه بيحكي للجيران عن ذكرياته قدام جامع مصطفى محمود.

تانت نعمات

برنامج "ولاد الحرام مسابوش لولاد الحرام التانيين حاجة" راديو ميجا اف ام 92.7 ’ رمضان 2011



تانت نعمات، اول ست في العالم تدخل جوزها موسوعة جينيس للارقام القياسية لأنه نجح وبعون الله وحده انه يخلف منها ولد رغم انها أرجل منه.
وتانت نعمات مش بس أرجل من جوزها لا دي من أرجل من رجالة كتير، لدرجة انها تم اتهامها تلات مرات بالتزوير في أوراق رسمية، لان الموظفين اللي شغالين معاها اتهموها بكتابة انثى في البطاقة على سبيل التزوير يعني.
من طفولتها وهي كده راجل لااجل يعني لدرجة ان البنات في الفصل في ابتدائي كانوا بيتكسفوا يقعدوا جنبها، ولا حتى كمان يلعبوا معاها، خاصة وهي كابتن فريق الكورة بتاع فصلها، أما في الجامعة فالكل كان مستنيها تتخرج وتخش الجيش يمكن يهدي طبعها شوية، بس للاسف تانت نعمات كانت وحيدة فمدخلتش الجيش.
امها وابوها طبعا يأسوا انها تتجوز ولا يتقدملها بنت الحلال، قصدي ابن الحلال وماتوا بالقهرة، لكن ده حصل لأن في عرسان مبدأهم قعدة الراجل بميت ست.
واتجوزت نعمات، ورغم اللخبطة اللي حصلت في الفرح، وعجز المأذون عن معرفة العريس من العروسة الا ان الجواز تم، لا وايه كمان خلفت، وده طبعا خلى كل اللي يعرفوها يضربوا كف بكف وهما بيقولوا سبحان الله، زمن المعجزات منتهاش.
بس تانت نعمات رغم ده كله متخلاش من لمحة انوثة، بس بتعتبر ده سر من أعظم أسرارها، ومبتجيبش سيرته لاي حد ولا حتى ابوها وامها قبل ما يموتوا، السر ده ان تانت نعمات بتموت في حاجة اسمها رشدي اباظة، لا وايه كمان بتعتبره مثلها الأعلى في الحياة لدرجة انها حاولت تربي شنبها زيه قبل كده بس معرفتش.
تانت نعمات ياجماعة راجل راجل تقدروا تعتمدوا عليها في اي وقت