10‏/08‏/2011

عمرو عربي

برنامج "ولاد الحرام مسابوش لولاد الحرام التانيين حاجة" راديو ميجا اف ام 92.7 ’ رمضان 2011

video
عمرو عربي..... لا لا عمروووووووووو ده الاسم اللي هو بيرد عليه، لانك لو قولتله يا عمرو حيعتبرك بتكلم واحد تاني غيره خاااااالص
المهنة بيشتغل وخلاص مش مهم ايه، المهم انها شغلانة ينفع يزوغ منها ساعتين الصبح ويقعد على القهوة، يضرب الفطيرة المشلتتة التمام، وحوالي 12 حجر شيشة.
عمروووو أول مدمن شيشة حقيقي في مصر، بعد ما بيخلص وصلة الصبح بيروح يمضي في الشغل، اللي مش مهم هو ايه،وجري يتغدى في البيت بسرعة وينامله ساعتين ينزل يروح بعدهم القهوة موطنه الأصلي.
اتهيألي كمان حتى وهو نايم بيبقى ماسك في ايده مبسم، لان اللي عرفته من تاريخ العيلة انه مكنش وهو صغير بياخد تيتينة في بقه زي بقية العيال الصغيرين علشان ميعيطش، لا كان بياخد مبسم شيشة حقيقي.
المهم انه على المغربية كده يكون مشرف على القهوة، واخد الشيشة بالحضن، لحد واحدة بالليل، ويقضيها بقى اما طاولة، أو يحلل ماتشات، مش مهم ، المهم ان الشيشة متفارقش بقه.
بس من كام يوم ياعيني درسه كان واجعه، ووشه ورم خالص لدرجة انه بقى تقريبا عنده وش تاني، بقه مبقاش بيتفتح ومحتاج اجنة يتفش بيها، كلنا ساعتها قولنا ده مش محتاج دكتور اسنان، ده محتاج واحد عجلاتي.
لكن عمرو مكنش فارق معاه حتى الوجع، وكان بيصرخ واحنا بنحاول نوديه المستشفى ويقول ودودني على القهوة، انا عايز اروح القهوة.
وفي الاخر هو اللي كسب ورحنا القهوة الاول، مسك لي الشيشة بايده والدمعة حتفر من عينيه، وقعد يدور على فتحة بقه في الوشين اللي بقوا عنده، واضطرينا نشده رغم تأثرنا بالموقف العاطفي في مشهد زي مشهد محمود المليجي في نهاية فيلم الأرض بالظبط.
وبعد ما خلصنا عند العجلاتي، قصدي الدكتور، وبعد ما عمرو ووو شال الخراج، عزمنا كلنا على زبادي بالفواكه في القهوة اللي قدام المستشفى، وهو حاضن الشيشة وبيقول، حد فيكم معاه فلوس يدفع الحساب.

ليست هناك تعليقات: