موال القمر

زمان كان القمر ساكن معانا فى البيوت
يهل ويا الليل ويدخل فى سكوت
يقعد فى صحن الدار ..... نتلملم كبار وصغار
يدور الحكى فى الفناجين
يمشى القمر .... كل الكلام بيموت

***********

أبويا كان يحكى ان القمر صاحبه
ياما ف ليالى طويلة اتقابلو واتصاحبو
وف مرة سرقه النوم , قام القمر صاح به
اصحى يا صاحبى دى العشرة ليها شروط

*************
شرط القمر عشقه ..... أسطورة م الأساطير
عشاق النهار يشقوا ..... فى العشق ليه دساتير
فى الحسن له صورة , مرسومة فى الملكوت

*************

فاكر فى يوم وف ليله , فكرت من صغرى
من هبلى , قال دوغرى .... قررت أكلم فيه ... أصاحب فيه
وصحيت ومن بدرى
لقيتها شمس النهار .... صبغانا سطح و دار
كشرت أنا محتار
قالت فى شبه اعتذار :
صاحية أنا فى السما ... بس القمر نايم
بملا له كاسات من نور
حب القمر انما ... لازم تكون فاهم
يوم عالقمر حتثور
وان أخرة هواه , لازمن يا ابنى تموت