29‏/06‏/2008

رباعيــــــات

فتحت عينى زهقت منك يا نوم
شفت دنيا غريبة والكلام مكتوم
احترت انا فى الحكاية
اتارينى ميت واللقب مرحوم
وعجبى
ــــــــــــــــــــــــــــــــــــــــــــــــــــــــــــــــ
حبيبتى يا حبيبتى دايما بتبعدى
اقرب مهما اقرب برضو بتبعدى
هيا النهاية خلاص كــــــده
ولا بس من حبــــى بتتأكـدى
وعجبى
فى كل البحور درت و لفيــــــــت
فى كل بحر نار قايدة لقيــــــــت
ساعتهـــا بس عرفـــــت ازاى
اكون وحدى وسط الاهل والبيت
وعجبى
ـــــــــــــــــــــــــــــــــــــــــــــــــــــــــــــــــــــــــ
انسان يموت يتولد مليون وليد
هيا الدنيا كده ساعات بالعكس بالتقليد
مبقتش عارف انــــــــــــــــا
الدنيا هى اللى غبية ولا انا اللى بليد
وعجبى
على قد ما الدنيا دى كبيرة
لكنها صغيـــــــــرة
ايا منا فيها كتيرة
وأعمــارنا قصيرة
وعجبى
ـــــــــــــــــــــــــــــــــــــــــــــــــــــــــــــــــــــــــــــــ
الله يلعن أبوك يا هم
لا فرح بتخلى ولا عندك دم
تعبت قلبى تعبت عينى
انت وابنك اللى اسمه الغم
وعجبى
ـــــــــــــــــــــــــــــــــــــــــــــــــــــــــــــــــــــــــــــــــــ
انا البحر وانتى البر بينا مليون صدام
أجى عليكى تستحملى منى الالام
دقتى منى النحر والافتـــــــرا
وما شفت منك غير امان وسلام
وعجبى
انا زى البحر لكن البحر غــدار
نغضب قوى نهدى قوى مالناش أرار
نسمع كلام ونشوف بشــــــــر
لكن جوانا تفضل الاســـــــــرار
وعجبى
ــــــــــــــــــــــــــــــــــــــــــــــــــــــــــــــــــــــــــــــــ
دنــيـــــــــا شكل الكاريكاتير
الحزن فيها شــىء خطيـــــر
والضحك متمكن وعــالــــى
بس انا كداب كبيــــــــــــــر
وعجبى
________________________________________
السؤال نفس السؤال بس مش نفس الاجابة
هى ليه الدنيا مرة حلوة ومرة غابــــــــــة
قبل ما تفكر تجاوب يلا قولى
انت من صنف الملايكة ولا من الناس الديابة
وعجبى
ـــــــــــــــــــــــــــــــــــــــــــــــــــــــــــــــــــــــــــــــــ
يا ابويا وحشتنى حتى تجاعيدك
ولا ألف مليون راجل يقدر يعيدك
ولا حد فيه حتى حنانك
محتاج تعود بس ابوس ايدك
وعجبى
ـــــــــــــــــــــــــــــــــــــــــــــــ
منك لله يا مصر تعبتينى
بموت فيكى وانتى مطلعة دينى
وتهون عليا الدنيابس
أمًلى من ترابك عينى
وعجبى
ـــــــــــــــــــــــــــــــــــــــــــــــ
يوم ما تقوم القيامة
لا حينفعكم عيال ولا فلوس ياما
هو بس عملكم
ورحمة ربنا سايعانا
وعجبى
ـــــــــــــــــــــــــــــــــــــــــــــــــــــــــ
غريب عايش فى دنيــا غريبة
ماشى بادور فين رحتى ياطيبة
لا ولاد الحلال دلــــونى
ولا حد يعرف وهى دى المصيبة
وعجبى
ـــــــــــــــــــــــــــــــــــــــــــــــــــــــــــ
ـلما الصحاب مبقوش صحـــاب
واتمددت سنين الفرح فى حضن العذاب
واتبدل الحال مكان الحال
اتمنيت بس ياربى اكون تراب
عجبى
صاحبت بدل الواحد عشرة
متمرش فى ولا واحد عشرة
مبقتش عارف اعمل ايه
قلت الحل اصاحب حشرة
عجبى
ساعات الحزن يبقى دوا مع انه داء
تفوق من وهم متدارى فى حضن غباء
تخاوى الدمع فى ليالى
تبص تلاقى قلبك فاق
عجبى
عيش الحياة ولا يهمك
مين ده اللى يحرقلك دمك
واذا كنت ناوى عالشر فعلا
من بعدها حيشيل همك
عجبى
يللى بعتوا للناس الاوهام
بعتوا ليه وازاى وبكام
وفى النهاية كسبتوا ايه
خسارتكوا جاية مع الايام
عجبى
يا ابو البحور يا جميل
علمتنا نعشق نميل
لكن منين الحب ده
والقلب طبعه عليل
عجبى
ـــــــــــــــــــــــــــــــــــــــــــــــــــــــــــ
انا احسن واحد يقفش فيكى يا مصر
اثور اتضايق احس بقهـــــــــــــــر
أبقى زعــــــلان من جــــــــــــوه
بس ازعل عالصبح وانسى العصر
وعجبى
ـــــــــــــــــــــــــــــــــــــــــــــــــــــــــــــــــــ
فى ذات اليوم وفى نفس التاريخ
من كل عام صوات وصـــريخ
قال ايه سنوية الميــــــــــت
كنتوا عملتولوا ايه وهو حى جريح
وعجبى
ــــــــــــــــــــــــــــــــــــــــــــــــــــــــــــــــــــــــــــــ
الكوسة فى بلدنا اسرع من الصاروخ
فى حضنها تتدفى عمرك فى يوم ما تدوخ
ولوعريان تتغطى
اصلها عندنا اغلى كتير مالخوخ
وعجبى
ـــــــــــــــــــــــــــــــــــــــــــــــــــــــــــــــــــــــــــــــــ
دنيا زى السيف تسهى تقطعك
وحظ مالوش كيف غير انه يلطعك
عايش ومش عايش عارفلا مش عارف
اللى بتاخدو فى حياتك لابد يوصلك
وعجبى
ــــــــــــــــــــــــــــــــــــــــــــــــــــــــــــــــــــــــــــــ
يا ابويــا ياللى علمتنى الكلمـــة
ليه علمتنى اكون نسمة مش حمى
واعيش اتعذب انا بطيبتى
اللى فى الزمن ده تهمـــــــــة
وعجبى
ماشى عالحبل انا بوشوش الجماهير
مرعوب اقع خايف من المشاويــــر
بس مستمتع بلعبى لانى مهمـــا وقعت
قلبى السعيد حيطير
وعجبى
ــــــــــــــــــــــــــــــــــــــــــــــــــــــــــــــــــــــــــــ
قالوا ده صاحب قلت ده بوشين
قالوا حبيبك قلت بس منيـــــن
ده لا يعرف العشرة ولا يصونها
ده لو يطول كان باعنى مرتيــن
وعجبى
ـــــــــــــــــــــــــــــــــــــــــــــــــــــــــــــــــــــــــــــ
مخنوق ليه يا صوت البكا ولا الدموع مش كافيه
كل اللى حبتهم يا قلبى جابـــــــــولك الكافيـــــه
مبقتش فاهم حاجة خالص
هى الندالة سايقة الدنـيـــــــــــــــا بالعافيــــــــه
وعجبى
قلبى ضعيف بس الفــرح دواه
الحزن مالكو من براه ومن جواه
خايف اسلم يبقى قلبى عبد وذليل
للحزن بس هواه
وعجبى
طظ فيكى يا دنيا يا مهببة
لكل احزان البشر انتى متسببه
بحبك واكرهك معرفش ليه
مفيش مرة تحنى وتبقى طيبة
وعجبى
ـــــــــــــــــــــــــــــــــــــــــــــــــــــــــــــــــــــ
قــالوا السنين بالذكريــــــات
والعمر نحسب منه اللى فات
قلت نحسب الجى احسن
يا حبيبى ده اللى فات مــات
وعجبى
ـــــــــــــــــــــــــــــــــــــــــــــــــــــــــــــــــــــــــــ
ادم وحوا كانوا ابويا وامـــــــــى
ومش لاقى بنى ادم اشكيلوا همى
والمفروض كلنـــا اخــوات بس احسنلى
اسكت واتكسف على دمى
وعجبى
ــــــــــــــــــــــــــــــــــــــــــــــــــــــــــــــــــــــــــــــ
نرجع مرجوعنا تانى لموضوعنـــا
التوهه طويلة واخرتها رجوعنـــا
نتعب من شوقنا وليالى فراقنا
القلب يخانق فى البعد ضلوعنــــا
وعجبى
ــــــــــــــــــــــــــــــــــــــــــــــــــــــــــــــــــــــــــــــــــــــ
فى لحظة النصر متبقاش حاسس بنفسك
وساعة الخسارة اكيد بتموت من يأسك
والدنيا كده وكده بس المهم انك
عشان مكسب متخسرش نفسك
وعجبى
نفسى اقول يا صافيه زى اللبن بس اللبن غشوه
ده احنا بقينا فى زمن الواد بيبيع ابـــــــــــــــوه
وانتى معااهم علينا دايسين فوق رقابينا
يا مصر حتلحقينا ولا خلاص حنتــــــــــــــوه
وعجبى
واخد الدنيا فى حضنى فى رقصة
لا ناقص حزن ولا هى ناقصــــة
و بنمثل روايه جهنميه
لكن بموت فيها ف اخر القصة
وعجبى
قاللى ابويا اهم حاجة الكرامة
وطالما على حق مش مهم الملامة
وكبرت انا لقيت الدنيا اتغيرت
وان الندالة اول طريق السلامة
وعجبى

هناك 3 تعليقات:

bocycat يقول...

مبروك يا اسامة عالمدونة انا دخلت بس اقول مبروك وهدخل تانى اتمعن فى كتاباتك الجميلة واعلق
(ياريت تشيل الورد دى رخمة وقت التعليق )
نونا نونا

manal el shalakany يقول...

اه يا قلبى
جميل كالعادة يا اسامة

jahiza يقول...

:)
جميلة اوي الرباعيات دي